Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 34

U-N-A-B-B-R-E-V-I-A-T-E-D

Dutiya Sovacassatā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Imaɱ bhikkhave,||
rattiɱ aññatarā devatā abhikkantāya rattiyā abhikkantavaṇnā kevalakappaɱ Jetavanaɱ obhāsetvā yenāhaɱ ten'upasaŋkami.|| ||

Upasaŋkamitvā maɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhitā ko bikkhave,||
sā devatā maɱ etad avoca:|| ||

Satt'ime bhante,||
dhammā bhikkhuno aparihānāya saɱvattanti.|| ||

Katame satta?|| ||

Satthugāravatā,||
dhammagāravatā,||
saŋghagāravatā,||
sikkhāgāravatā,||
samādhigāravatā,||
sovacassatā,||
kalyāṇamittatā.|| ||

Ime kho bante,||
satta dhammā bhikkhuno aparihānāya saɱvattantī ti.|| ||

Idam avoca bhikkave, sā devatā.|| ||

Idaɱ vatvā maɱ abhivādetvā padakkhiṇaɱ katvā tatth'ev'antaradhāyī ti.|| ||

2. Evaɱ vutte āyasmā Sāriputto Bhagavantaɱ etad avoca:|| ||

3. Imassa kho ahaɱ bhante,||
Bhagavatā saŋkhittena bhāsitassa evaɱ vitthārena atthaɱ ājānāmi:|| ||

Idha bhante, bhikkhu||
attanā ca satthugāravo hoti||
satthugāravatāya ca vaṇñāvādī;||
ye c'aññe bhikkhū na satthugāravā,||
te ca satthugāravatāya samādapeti;||
ye c'aññe bhikkhū satthugāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca dhammagāravo hoti||
dhammagāravatāya ca vaṇñāvādī;||
ye c'aññe bhikkhū na dhammagāravā,||
te ca dhammagāravatāya samādapeti;||
ye c'aññe bhikkhū dhammmagāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca saŋghagāravo hoti||
saŋghagāravatāya ca vaṇñāvādī;||
ye c'aññe bhikkhū na saŋghagāravā,||
te ca saŋghagāravatāya samādapeti;||
ye c'aññe bhikkhū saŋghagāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca sikkhāgāravo hoti||
sikkhāgāravatāya ca vaṇñāvādī;||
ye c'aññe bhikkhū na sikkhāgāravā,||
te ca sikkhāgāravatāya samādapeti;||
ye c'aññe bhikkhū sikkhāgāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca samādhigāravo hoti||
samādhigāravatāya ca vaṇñāvādī;||
ye c'aññe bhikkhū na samādhigāravā,||
te ca samādhigāravatāya samādapeti;||
ye c'aññe bhikkhū samādhigāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca suvaco hoti||
suvacatāya ca vaṇñāvādī;||
ye c'aññe bhikkhū na suvacā,||
te ca suvacatāya samādapeti;||
ye c'aññe bhikkhū suvacā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca suvaco hoti||
suvacatāya ca vaṇñāvādī;||
ye c'aññe bhikkhū na suvacā,||
te ca suvacatāya samādapeti;||
ye c'aññe bhikkhū suvacā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca kalyāṇamitto hoti||
kalyāṇamittatāya ca vaṇñāvādī;||
ye c'aññe bhikkhū na kalyāṇamittā,||
te ca kalyāṇamittāya samādapeti;||
ye c'aññe bhikkhū kalyāṇamittā||
tesaɱ ca vaṇṇaɱ bhaṇati bhūtaɱ tacchaɱ kālena, ti.|| ||

Imassa kho ahaɱ bhante,||
Bhagavatā saŋkhittena bhāsitassa evaɱ vitthārena atthaɱ ājānāmi=ī ti.|| ||

5. Sādhu sādhu Sāriputta,||
sādhu kho tvaɱ Sāriputta,||
imassa mayā saŋkhittena bhāsitassa evaɱ vitthārena atthaɱ ajānāsi.|| ||

Idha Sāriputta, bhikkhu||
attanā ca satthugāravo hoti||
satthugāravatāya ca vaṇñāvādī;||
ye c'aññe bhikkhū na satthugāravā,||
te ca satthugāravatāya samādapeti;||
ye c'aññe bhikkhū satthugāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca dhammagāravo hoti||
dhammagāravatāya ca vaṇñāvādī;||
ye c'aññe bhikkhū na dhammagāravā,||
te ca dhammagāravatāya samādapeti;||
ye c'aññe bhikkhū dhammmagāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca saŋghagāravo hoti||
saŋghagāravatāya ca vaṇñāvādī;||
ye c'aññe bhikkhū na saŋghagāravā,||
te ca saŋghagāravatāya samādapeti;||
ye c'aññe bhikkhū saŋghagāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca sikkhāgāravo hoti||
sikkhāgāravatāya ca vaṇñāvādī;||
ye c'aññe bhikkhū na sikkhāgāravā,||
te ca sikkhāgāravatāya samādapeti;||
ye c'aññe bhikkhū sikkhāgāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca samādhigāravo hoti||
samādhigāravatāya ca vaṇñāvādī;||
ye c'aññe bhikkhū na samādhigāravā,||
te ca samādhigāravatāya samādapeti;||
ye c'aññe bhikkhū samādhigāravā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca suvaco hoti||
suvacatāya ca vaṇñāvādī;||
ye c'aññe bhikkhū na suvacā,||
te ca suvacatāya samādapeti;||
ye c'aññe bhikkhū suvacā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca suvaco hoti||
suvacatāya ca vaṇñāvādī;||
ye c'aññe bhikkhū na suvacā,||
te ca suvacatāya samādapeti;||
ye c'aññe bhikkhū suvacā||
tesaɱ ca vaṇṇaɱ bhaṇati bhūtaɱ tacchaɱ kālena.|| ||

Attanā ca kalyāṇamitto hoti||
kalyāṇamittatāya ca vaṇñāvādī;||
ye c'aññe bhikkhū na kalyāṇamittā,||
te ca kalyāṇamittāya samādapeti;||
ye c'aññe bhikkhū kalyāṇamittā||
tesaɱ ca vaṇṇaɱ bhaṇati bhūtaɱ tacchaɱ kālena, ti.|| ||

Imassa kho Sāriputta,||
mayā saŋkhittena bhāsitassa evaɱ vitthārena attho daṭṭhabbo' ti.|| ||


Contact:
E-mail
Copyright Statement   Webmaster's Page