Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 37

Paṭisambhidā Suttaɱ[ed1]

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Sattahi bhikkhave, dhammehi samannāgato bhikkhu na cirass'eva catasso paṭisambhidā sayaɱ abhiññā sacchikatvā upasampajja vihareyya.|| ||

Katamehi sattahi?|| ||

2. Idha, bhikkhave, bhikkhū 'idaɱ me cetaso līnattan' ti yathābhūtaɱ pajānāti.|| ||

Ajjhattaɱ saŋkhittaɱ vā cittaɱ 'ajjhattaɱ me saŋkhittaɱ cittan' ti yathābhūtaɱ pajānāti.|| ||

Bahiddhā vikkhittaɱ vā cittaɱ 'bahiddhā me vikkhittaɱ cittan' ti yathābhūtaɱ pajānāti.|| ||

Tassa viditā vedanā uppajjanti, viditā upaṭṭhahanti, viditā abbhatthaɱ gacchanti.|| ||

Viditā saññā uppajjanti, viditā upaṭṭhahanti, viditā abbhatthaɱ gacchanti.|| ||

Viditā vitakkā uppajjanti, viditā upaṭṭhahanti, viditā abbhaththaɱ gacchanti.|| ||

Sappāyāsappāyesu kho pan'assa dhammesu hīnappaṇītesu kaṇhasukkasappaṭibhāgesu nimittaɱ suggahītaɱ hoti sumanasikataɱ sūpadhāritaɱ suppaṭividitaɱ paññāya.|| ||

Imehi kho bhikkhave, sattahi dhammehi samannāgato bhikkhu na cirass'eva catasso paṭisambhidā sayaɱ abhiññā sacchikatvā upasampajja vihareyyā" ti.|| ||

Sattahi bhikkhave, dhammehi samannāgato Sāriputto catasso paṭisamrabhidā sayaɱ abhiññā sacchikatvā upasamjja viharati.|| ||

Katamehi sattahi?|| ||

Idha, bhikkhave, bhikkhū 'idaɱ me cetaso līnattan' ti yathābhūtaɱ pajānāti.|| ||

Ajjhattaɱ saŋkhittaɱ vā cittaɱ 'ajjhattaɱ me saŋkhittaɱ cittan' ti yathābhūtaɱ pajānāti.|| ||

Bahiddhā vikkhittaɱ vā cittaɱ 'bahiddhā me vikkhittaɱ cittan' ti yathābhūtaɱ pajānāti.|| ||

Tassa viditā vedanā uppajjanti, viditā upaṭṭhahanti, viditā abbhatthaɱ gacchanti.|| ||

Viditā saññā uppajjanti, viditā upaṭṭhahanti, viditā abbhatthaɱ gacchanti.|| ||

Viditā vitakkā uppajjanti, viditā upaṭṭhahanti, viditā abbhaththaɱ gacchanti.|| ||

Sappāyāsappāyesu kho pan'assa dhammesu hīnappaṇītesu kaṇhasukkasappaṭibhāgesu nimittaɱ suggahītaɱ hoti sumanasikataɱ sūpadhāritaɱ suppaṭividitaɱ paññāya.|| ||

Imehi kho bhikkhave sattahi dhammehi samannāgato Sāriputto catasso paṭisambhidā sayaɱ abhiññā sacchikatvā upasampajja viharatī" ti.

 


[ed1] BJT has this as two suttas.

 


Contact:
E-mail
Copyright Statement   Webmaster's Page