Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 39

Paṭhama Niddasavatthu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati Jetavane anātha piṇḍikassa ārāme.|| ||

Atha ko āyasmā Sāriputto pubbaṇhasamayaɱ nivāsetvā pattacīvaraɱ ādāya Sāvattiyaɱ piṇḍāya pāvisi.|| ||

Atha kho āyasmato Sāriputtassa etad ahosi:|| ||

'Atippago kho tāva Sāvatthiyaɱ piṇḍāya carituɱ,||
yan nūnāhaɱ yena aññatittiyānaɱ paribbājakānaɱ ārāmo ten'upasaŋkameyyan' ti.|| ||

Atha kho āyasmā Sāriputto yena aññatitthiyānaɱ paribbājakānaɱ ārāmo ten'upasaŋkami.|| ||

Upasaŋkamitvā tehi aññatitthiyehi paribbājakehi saddiɱ sammodi.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

2. Tena kho pana samayena tesaɱ aññatitthiyānaɱ paribbājakānaɱ sannisinnānaɱ sannipanitānaɱ ayam antarā kathā udapādi:|| ||

'Yo hi koci āvuso, dvādasa vassāni paripuṇṇaɱ parisuddhaɱ brahmacariyaɱ carati,|| ||

"Niddaso bhikkhū," ti|| ||

alaɱ vacanāyā' ti.|| ||

Atha kho āyasmā Sāriputto tesaɱ aññatitthiyānaɱ paribbājakānaɱ bhāsitaɱ n'eva abhinandi na ppaṭikkosi; anabhinanditvā appaṭikkositvā uṭṭhāy āsanā pakkāmi:|| ||

'Bhagavato santike etassa bhāsitassa atthaɱ ājānissāmī' ti.|| ||

3. Atha kho āyasmā Sāriputto Sāvattiyā piṇḍāya caritvā pacchābhattaɱ piṇḍapātapaṭikkanto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

'Idhāhaɱ bhante, pubbaṇhasamayaɱ nivāsetvā pattacīvaraɱ ādāya Sāvatthiyaɱ piṇḍāya pāvisiɱ.|| ||

Tassa mayhaɱ bhante, etad ahosi:|| ||

Atippago kho tāva Sāvatthiyaɱ piṇḍāya carituɱ,||
yan nūnāhaɱ yena aññatittiyānaɱ paribbājakānaɱ ārāmo ten'upasaŋkameyyan ti.|| ||

Atha khvāhaɱ bhante, yena aññatitthiyānaɱ paribbājakānaɱ ārāmo ten'upasaŋkamiɱ.|| ||

Upasaŋkamitvā tehi aññatittiyehi paribbājakehi saddhiɱ sammodiɱ.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisidiɱ.|| ||

Tena kho pana bhante, samayena tesaɱ aññatitthiyānaɱ paribbājakānaɱ sannisinnānaɱ sannipatitānaɱ ayam antarākathā udapādi:|| ||

'Yo hi koci āvuso, dvādasa vassāni paripuṇnaɱ parisuddhaɱ brahmacariyaɱ carati,|| ||

"Niddaso bhikkhū," ti|| ||

alaɱ vacanāyā' ti.|| ||

Atha khīvāhaɱ bhante, tesa aññatitthiyānaɱ paribbājakānaɱ bhāsitaɱ n'eva abhinandiɱ, na paṭikkosiɱ;||
anabhinanditvā appaṭikkositvā uṭṭhāy āsanā pakkāmiɱ|| ||

'Bhagavato santike etassa bhāsitassa atthaɱ ājānissāmi, ti.|| ||

Sakkā nu kho bhante, imasmiɱ dhamma-vinaye kevalaɱ vassagaṇanamattena niddāso bhikkhū paññapetūn' ti?|| ||

'Na kho Sāriputta, sakkā imasmiɱ dhamma-vinaye kevalaɱ vassagaṇanamattena niddaso bhikkhū paññāpetuɱ.|| ||

Satta kho imāni Sāriputta, niddasavatthūni mayā sayaɱ abhiññā sacchikatvā paveditāni.|| ||

Katamāni satta?|| ||

4. Idha Sāriputta, bhikkhu sikkhāsamādāne tibbacchando hoti||
āyatiñ ca sikkhāsamādāne avigatapemo.|| ||

Dhammanisantiyā tibbacchando hoti||
āyatiñ ca dhammanisantiyā avigatapemo.|| ||

Icchāvinaye tibbacchando hoti,||
āyatiñ ca icchāvinaye avigatapemo.|| ||

Paṭisallāne tibbacchando hoti,||
āyatiñ ca paṭisallāne avigatapemo.|| ||

Viriyārambhe tibbacchando hoti,||
āyatiñ ca viriyāramhe avigatapemo.|| ||

Satinepakke tibbacchando hoti,||
āyatiñ ca satinepakke avigatapemo.|| ||

Diṭṭipaṭivedhe tibbacchando hoti,||
āyatiñ ca diṭṭipaṭivadhe aigatapemo.|| ||

Imāni kho Sāriputta, satta niddasavatthūni mayā sayaɱ abhiññā sacchikatvā pavaditāni.|| ||

5. Imehi kho Sāriputta, sattahi niddasavatthūhi,||
samannāgato bhikkhū dvādasa ce pi vassāni paripuṇṇaɱ parisuddhaɱ brahmacariyaɱ carati,||
"Niddaso bhikkhū"||
ti alaɱ vacanāya.|| ||

Catuvīsatiɱ ce pi vassāni paripuṇṇaɱ parisuddhaɱ brahmacariyaɱ carati,||
"Niddaso bhikkhū"||
ti alaɱ vacanāya.|| ||

Chattiɱsati ce pi vassāni paripuṇṇaɱ parisuddhaɱ brahmacariyaɱ carati,||
"Niddaso bhikkhū"||
ti alaɱ vacanāya.|| ||

Aṭṭhacattārīsañ ce pi vassāni paripuṇṇaɱ parisuddhaɱ brahmacariyaɱ carati,||
"Niddaso bhikkhū"||
ti alaɱ vacanāya' ti.|| ||

 


Contact:
E-mail
Copyright Statement   Webmaster's Page