Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta
5. Mahāyaññā Vaggo

Sutta 41

Viññāṇaṭṭhiti Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][olds][upal] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Satt'imā bhikkhave viññāṇaṭṭhitiyo.|| ||

Katamā satta?|| ||

2. Santi, bhikkhave, sattā nānattakāyā||
nānattasaññino:||
seyyathā pi manussā||
ekacce ca devā||
ekacce va vinipātikā.|| ||

Ayaɱ paṭhamā viññāṇaṭṭhiti.|| ||

3. Santi, bhikkhave, sattā nānattakāyā
ekattasaññino:||
seyyathā pi devā brahmakāyikā
paṭhamābhinibbattā.|| ||

Ayaɱ dutiyā viññāṇaṭṭhiti.|| ||

4. Santi, bhikkhave, sattā ekattakāyā
nānattasaññino:||
seyyathā pi devā ābhassarā.|| ||

Ayaɱ tatiyā viññānaṭṭhiti.|| ||

5. Santi, bhikkhave, sattā ekattakāyā
ekattasaññino:||
seyyathā pi devā subakiṇhā.|| ||

Ayaɱ catutthā viññāṇaṭṭhiti.|| ||

6. Santi, bhikkhave, sattā sabbaso rūpa-saññānaɱ samatikkamā paṭighasaññānaɱ atthaŋgamā nānattasaññānaɱ amanasikārā||
'ananto ākāso' ti||
ākāsānañcāyatanūpagā.|| ||

Ayaɱ pañcamā viññāṇaṭṭhiti.|| ||

7. Santi, bhikkhave, sattā sabbaso ākāsānañcāyatanaɱ samatikkamma||
'anantaɱ viññāṇan' ti||
viññāṇañcāyatanūpagā.|| ||

Ayaɱ chaṭṭhā viññāṇaṭṭhiti.|| ||

8. Santi, bhikkhave, sattā sabbaso viññāṇañcāyatanaɱ samatikkamma||
'N'atthi kiñci' ti||
ākiñcaññāyatanūpagā.|| ||

Ayaɱ sattamā viññāṇaṭṭhiti.|| ||

Imā kho bhikkhave, satta viññāṇaṭṭhitiyo ti.|| ||

 


Contact:
E-mail
Copyright Statement   Webmaster's Page