Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta
Avyākata Vaggo

Sutta 50

Nandamātu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][upal] EVAṂ ME SUTAṂ.|| ||

Ekaɱ samayaɱ āyasmā ca Sāriputto āyasmā ca Mahāmoggallāno Dakkhiṇāgirismiɱ cārikaɱ caranti mahatā bhikkhu saŋghena saddhiɱ.|| ||

Tena kho pana samayena Veḷukaṇṭakī Nandamātā upāsikā rattiyā paccūsa-samayaɱ paccūṭṭhāya pārāyaṇaɱ sarena bhāsati.|| ||

Tena kho pana samayena Vessavaṇo Mahārājā uttarāya disāya dakkhiṇaɱ disaɱ gacchati kenaci-d'eva karaṇīyena.|| ||

Assosi kho Vessavaṇo Mahārājā Nandamātāya upāsikāya pārāyaṇaɱ sarena bhāsantiyā.|| ||

Sutvā kathāpariyosānaɱ āgamayamāno aṭṭhāsi.|| ||

Atha kho Nandamātā upāsikā pārāyaṇaɱ sarena bhāsitvā tuṇhī ahosi.|| ||

Atha kho Vessavaṇo Mahārājā Nandamātāya upāsikāya kathāpariyosānaɱ viditvā abbhanumodī:|| ||

'Sādhu bhagini, sādhu bhaginī' ti.|| ||

'Ko panesa bhadramukhā' ti?|| ||

'Ahaɱ te bhaginī bhātā Vessavaṇo Mahārājā' ti.|| ||

'Sādhu bhadramukha,||
tena hīyo me ayaɱ dammapariyāyo bhaṇito,||
idan te hotu ātitheyyan' ti.|| ||

'Sādhu bhaginī, etaɱ c'eva me [64] hotu ātitheyyaɱ:
sve ca Sāriputta-Moggallānapamukho bhikkhusaŋgho akatapātarāso Veḷukaṇṭakaɱ āgamissati.|| ||

Tañ ca bhikkhusaŋgaɱ parivisitvā mamaɱ dakkhiṇaɱ ādiseyyāsi,||
etañ ca me bhavissati ātitheyyan' ti.|| ||

2. Atha ko Nandamātā upāsikā tassā rattiyā accayena sake nivesane paṇītaɱ khādanīyaɱ bhojanīyaɱ paṭiyādāpesi.|| ||

Atha kho Sāriputta-Moggallānapamukho bhikkhusaŋgho akatapātarāso yena Veḷukaṇṭako tad avasarī.|| ||

Atha kho Nandamātā upāsikā aññataraɱ purisaɱ āmantesi:|| ||

'Ehi tvaɱ ambho purisa,||
ārāmaɱ gantvā bhikkhūsaŋghassa kālaɱ ārocehi:|| ||

"Kālo bhante, ayyāya Nandamātuyā nivesane niṭṭhitaɱ bhattan"' ti.|| ||

'Evaɱ ayye', ti kho so puriso Nandamātāya upāsikāya paṭissutvā ārāmaɱ gantvā bhikkhūsaŋghassa kālaɱ ārovesi:|| ||

'Kālo bhante, ayyāya Nandamātuyā nivesane niṭṭhitaɱ bhattan' ti.|| ||

Atha kho Sāriputata-Moggallānapamukho bhikkhusaŋgho pubbaṇhasamayaɱ nivāsetvā pattacīvaraɱ ādāya yena Nandamātuyā upāsikāya nivesanaɱ ten'upasaŋkami.|| ||

Upasaŋkamitvā paññatte āsane nisīdi.|| ||

Atha kho Nandamātā upāsikā Sāriputta-Moggallānapamukhaɱ bhikkhu-saŋghaɱ paṇītena khādanīyena bhojanīyena sahatvā santappesi sampavāresi.|| ||

Atha kho Nandamātā upāsikā āyasmantaɱ Sāriputtaɱ bhuttāviɱ onītapattapāṇīɱ eka-m-antaɱ nisīdi.

Eka-m-antaɱ nisinnaɱ kho Nandamātaraɱ upāsikaɱ āyasmā Sāriputto etad avoca:|| ||

'Ko pana te Nandamāte, bhikkhusaŋghassa abbhāgamanaɱ ārocesī ti?|| ||

'Idhāhaɱ bhante, rattiyā paccūsasamayaɱ paccuṭṭhāya pārāyaṇaɱ sarena bhāsitvā tuṇhī ahosiɱ.|| ||

Atha kho bhante, Vessavaṇo [65] Mahārājā mama kathāpariyosānaɱ viditvā abbhanumodi:|| ||

"Sādhu bhaginī, sādhu bhaginī", ti.|| ||

"Ko pan'eso bhadramukhā" ti?|| ||

"Ahaɱ te bhagini, bhātā Vessavaṇo Mahārājā" ti.|| ||

"Sādhu bhadramukha, tena hīyo me ayaɱ dhammapariyāyo bhaṇito,||
idaɱ te hotu ātitheyyan" ti.|| ||

"Sādhu bhagini, etañ c'eva me hotu ātitheyyaɱ:||
sve ca Sāriputta-Moggallānapamukho bhikkhusaŋgho akatapātarāso Veḷukaṇṭakaɱ āgamissati.|| ||

Tañ ca bhikkhūsaŋghaɱ parivisitvā mamaɱ dakkhiṇaɱ ādiseyyāsi.|| ||

Etañ ca me bhavissati ātitheyyan" ti.|| ||

Yad idaɱ bhante, dāne puññaɱ hi taɱ Vessavaṇassa mahārājassa sukhāya hotū' ti.|| ||

3. 'Acchariyaɱ Nandamāte, abbhūtaɱ Nandamāte,||
yatra hi nāma Vessavaṇena mahārājena evaɱ mahiddhikena evaɱ mahesakkhena devaputtena sammukhā sallapissatī' ti.|| ||

'Na kho me bhante, es'eva acchariyo abbhūto dhammo.|| ||

Atthi me añño pi acchariyo abbhuto dhammo:

Idha me bhante Nando nāma eko puttako piyo manāpo.|| ||

Taɱ rājāno kismiñci-d'eva karaṇe okkassa pasayha jivitā voropesuɱ.|| ||

Tasmiɱ kho panāhaɱ bhante, dārake gahite vā gayhamāne vā vadhe vā vajjhamāne vā hate vā haññamāne vā nābhijānāmi cittassa aññathattan' ti.|| ||

4. 'Acchariyaɱ Nandamāte, abbhūtaɱ Nandamāte,||
yatra hi nāma cittuppādam pi parisodhessasī' ti.|| ||

'Na kho me [66] bhante, es'eva acchariyo abbhuto dhammo.|| ||

Atti me añño pi acchariyo abbhuto dhammo:|| ||

Idha me bhante, sāmiko kālakato aññataraɱ yakkhayoniɱ upapanno.|| ||

So me ten'eva purimena attabhāvena uddasseti.|| ||

Na kho panāhaɱ bhante, abhijānāmi tato nidānaɱ cittassa aññathattan' ti.|| ||

5. 'Acchariyaɱ Nandamāte, abbhūtaɱ Nandamāte,||
yatra hi nāma cittuppādam pi parisodhessatī' ti.|| ||

'Na kho me bhante, es'eva acchariyo abbhuto dhammo.|| ||

Atti me añño pi acchariyo abbhuto dhammo:|| ||

Yato'haɱ bhante, sāmikassa daharass'eva daharā ānītā,||
nābhijānāmi sāmikaɱ manasā pi aticarittā,||
kuto pana kāyenā' ti.|| ||

6. 'Acchariyaɱ Nandamāte, abbhutaɱ Nandamāte,||
yatra hi nāma cittuppādamattam pi parisodhessatī' ti.|| ||

'Na kho me bhante, es'eva acchariyo abbhuto dhammo.|| ||

Atthi me añño pi acchariyo abbhuto dhammo:|| ||

Yadāhaɱ bhante, upāsikā paṭidesitā,||
nābhijānāmi kiñci sikkhāpadaɱ sañcicca vītikkamitā' ti.|| ||

7. 'Acchariyaɱ Nandamāte, abbhutaɱ Nandamāte' ti.|| ||

Na kho me bhante, es'eva acchariyo abbhuto dhammo.|| ||

Atti me añño pi acchariyo abbhuto dhammo:|| ||

Idhāhaɱ bhante, yāva-d'eva ākaŋkhāmi||
vivicc'eva kāmehi||
vivicca akusalehi dhammehi
savitakkaɱ savicāraɱ
vicekajaɱ pīti-sukhaɱ
paṭhamaɱ-jhānaɱ upasampajja viharāmi.|| ||

Vitakkavicārānaɱ vūpasamā||
ajjhattaɱ sampasādanaɱ||
cetaso ekodibhāvaɱ||
avitakkaɱ avicāraɱ||
samādhijaɱ pīti-sukhaɱ||
dutiyaɱ-jhānaɱ upasampajja viharāmi.|| ||

Pītiyā ca virāgā||
upekkhakā ca viharāmi,||
satā ca sampajānā sukhañ ca [67] kāyena paṭisaɱvedemi.|| ||

Yaɱ taɱ ariyā ācikkhantī
'upekkhako satimā sukhavihāri' ti||
tatiyaɱ jhanaɱ upasampajja viharāmi.|| ||

Sukhassa ca pahānā||
dukkhassa ca pahānā||
pubb'eva somanassa domanassānaɱ attha-gamā||
adukkhaɱ-asukhaɱ||
upekkhā-sati-pārisuddhiɱ||
catutthaɱ-jhānaɱ upasampajja viharāmi' ti.|| ||

8. 'Acchariyaɱ Nandamāne abbhutaɱ Nandamāte' ti.|| ||

'Na kho me bhante es'eva acchariyo abbhuto dhammo.|| ||

Atti me añño pi acchariyo abbhuto dhammo:|| ||

Yānīmāni bhante, Bhagavatā desitāni pañcorambhāgiyāni saññojanāni,||
nāhaɱ tesaɱ kiñci attani appahīnaɱ samanupassāmi' ti.|| ||

'Acchariyaɱ Nandamāte, abbhutā Nandamāte' ti.|| ||

Atha kho āyasmā Sāriputto Nandamātaraɱ upāsikaɱ dhammiyā kathāya sa nadassetvā samādapetvā samuttejetvā sampahaɱsetvā uṭṭhāy āsanā pakkāmi ti.|| ||

 


Contact:
E-mail
Copyright Statement   Webmaster's Page