Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta
Avyākata Vaggo

Sutta 54

Sīha Senāpati Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] EVAṂ ME SUTAṂ.|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Atha kho Sīho senāpati yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisidi.|| ||

Eka-m-antaɱ nisinno kho Sīho senāpati Bhagavantaɱ etad avoca:|| ||

'Sakkā nu kho bhante sandiṭṭhikaɱ dānaphalaɱ paññāpetun' ti?|| ||

2. Tenhi Sīha, taɱ yev'ettha paṭipucchissāmi.|| ||

Yathā te khameyya tathā naɱ vyākareyyāsi.|| ||

Taɱ kiɱ maññasi Sīha?|| ||

Idh'assa dve purisā,||
eko puriso assaddho maccharī kadariyo paribhāsako,||
eko puriso saddho dānapati anuppadānarato.|| ||

Taɱ kiɱ maññasi Sīha?|| ||

Kaɱ nu kho arahanto paṭhamaɱ anukampantā anukampeyyuɱ:||
yo vā so puriso assaddho maccharī kadariyo paribhāsako,||
yo vā puriso saddho dānapati anuppadānarato' ti?|| ||

'Yo so bhante, puriso assaddho maccharī kadariyo paribhāsako,||
kin taɱ arahanto paṭhamaɱ anukampantā anukampessantī?|| ||

Yo ca kho so bhante, puriso saddho dānapati anuppadānarato,||
taɱ yeva arahanto paṭhamaɱ anukampantā anukampeyyuɱ.|| ||

3. Taɱ kiɱ maññasi Sīha?|| ||

Kaɱ nu kho arahanto paṭhamaɱ upa saŋkamantā upasaŋkameyyuɱ:||
yo vā so puriso assaddho maccharī kadariyo paribhāsako,||
yo vā puriso saddho dānapati anuppadānarato' ti?|| ||

'Yo so bhante, puriso assaddho machcharī kadariyo paribhāsako,||
kiɱ taɱ arahanto paṭhamaɱ upasaŋkamantā upasaŋkamissanti?|| ||

Yo ca kho so bhante, puriso saddho dānapati anuppadānarato,||
taɱ yeva arahanto paṭhamaɱ upasaŋkamantā upasaŋkameyyuɱ'.|| ||

4. Taɱ kiɱ maññasi Sīha?|| ||

Kassa nu kho arahanto paṭhamaɱ patigaṇhantā patigaṇheyyuɱ:||
yo vā so puriso assaddho maccharī kadariyo paribhāsako,||
yo vā puriso saddho dānapati anuppadānarato' ti?|| ||

'Yo so bhante, puriso assaddho machcharī kadariyo paribhāsako,||
kiɱ tassa arahanto paṭhamaɱ upasaŋkamantā upasaŋkamissanti?|| ||

Yo ca kho so bhante, puriso saddho dānapati anuppadānarato,||
tass'eva arahanto paṭhamaɱ patigaṇhantā patigaṇheyyuɱ'.|| ||

5. Taɱ kiɱ maññasi Sīha?|| ||

Kassa nu kho arahanto paṭhamaɱ dhammaɱ desentā deseyyum:||
yo vā so puriso assaddho maccharī kadariyo paribhāsako,||
yo vā puriso saddho dānapati anuppadānarato' ti?|| ||

'Yo so bhante, puriso assaddho machcharī kadariyo paribhāsako,||
kiɱ tassa arahanto paṭhamaɱ dhammaɱ desentā desissanti?|| ||

Yo ca kho so bhante, puriso saddho dānapati anuppadānarato,||
tass'eva arahanto paṭhamaɱ dhammaɱ desentā deseyyum'.|| ||

6. Taɱ kiɱ maññasi Sīha?|| ||

Kassa nu kho kalyāṇo kittisaddo abbhuggaccheyya:||
yo vā so puriso assaddho machcharī kadariyo parihāsako,||
yo vā puriso saddho dānapati anuppadānarato' ti?|| ||

'Yo so bhante, puriso assaddho maccharī kadariyo paribhāsako,||
kiɱ tassa kalyāṇo kittisaddo abbhuggacchissati?|| ||

Yo ca kho so bhante, puriso saddho dānapati anuppadānarato,||
tass'eva kalyāṇo kittisaddo abbhuggaccheyya.'|| ||

7. Taɱ kiɱ maññasi Sīha?|| ||

Ko nu kho yañ ñad eva parisaɱ upasaŋkameyya,||
yadi khattiyaparisaɱ||
yadi brāhmaṇaparisaɱ||
yadi gahapatiparisaɱ||
yadi samaṇaparisaɱ,||
visārado upasaŋkameyya amaŋkubhuto:||
yo vā so puriso assaddho maccharī kadariyo paribhāsako,||
yo vā puriso saddho dānapati anuppadānarato' ti?|| ||

'Yo so bhante, puriso assaddho maccharī kadariyo paribhāsako,||
kiɱ so yañ ñad eva parisaɱ upasaŋkamissati,||
yadi khattīyaparisaɱ||
yadi brāhmaṇaparisaɱ||
yadi gahapatiparisaɱ||
yadi samaṇaparisaɱ,||
visārado upasaŋkamati amaŋkubhūto?|| ||

Yo ca kho so bhante, puriso saddho dānapati anuppadānarato,||
so yañ ñad eva parisaɱ upasaŋkameyya||
yadi khattiyaparisaɱ||
yadi brāhmaṇaparisaɱ||
yadi gahapatiparisaɱ||
yadi samaṇaparisaɱ,||
visārado upasaŋkameyya amaŋkubhuto'.|| ||

8. Taɱ kiɱ maññasi Sīha?|| ||

Ko nu ko kāyassa bhedā param maraṇā sugatiɱ saggaɱ lokaɱ upapajjeyya:||
yo vā so puriso assaddho maccharī kadariyo paribhāsako,||
yo vā puriso saddho dānapati anuppadānarato' ti?|| ||

'Yo so bhante puriso assaddho maccharī kadariyo paribhāsako,||
kiɱ so kāyassa bhedā param maraṇā sugatiɱ saggaɱ lokaɱ upapajjissati?|| ||

Yo ca ko so bhante, puriso dānapati anuppadānarato,||
so kāyassa bhedā param maraṇā sugatiɱ saggaɱ lokaɱ upapajjeyya.'|| ||

9. 'Yānimāni bhante, Bhagavatā cha sandiṭṭhikāni dānaphalāni akkhātāni,||
nāhaɱ ettha Bhagavato saddhāya gacchāmi —||
Aham p'etāni jānāmi.|| ||

Ahaɱ bhante, dāyako dānapati.|| ||

Maɱ arahanto paṭhamaɱ anukampantā anukampantī.|| ||

Ahaɱ bhante, dāyako dānapati.|| ||

Maɱ arahanto paṭhamaɱ upasaŋkamantā upasaŋkamanti.|| ||

Ahaɱ bhante, dāyako dānapati.|| ||

Mayhaɱ arahanto paṭhamaɱ patigaṇhantā patigaṇhanti.|| ||

Ahaɱ bhante, dāyako dānapati.|| ||

Mayhaɱ arahanto paṭhamaɱ dhammaɱ desentā desentī.|| ||

Ahaɱ bhante, dāyako dānapati.|| ||

Mayhaɱ kalyāṇo kitatisaddo abbhuggato:|| ||

"Sīho senāpati dāyako kārako saŋghūpaṭṭhāko," ti.|| ||

Ahaɱ bhante, dāyako dānapati.|| ||

Yañ ñad eva parisaɱ upasaŋkamāmi,||
yadi khattiyaparisaɱ,||
yadi brāhmaṇaparisaɱ,||
yadi gahapatiparisaɱ||
yadi samaṇaparisaɱ,||
visārado upasaŋkamāmi amaŋkūbhūto.|| ||

Yānīmāni bhante, Bhagavatā cha sandiṭṭhikāni dānaphalāni akkhātāni,||
nāhaɱ ettha Bhagavato saddhāya gacchāmi —||
aham petāni jānāmi.|| ||

Yaɱ ca kho maɱ bhante, Bhagavā evam āha:|| ||

"Dāyako Sīha, dānapati kāyassa bhedā param maraṇā sugatiɱ saggaɱ lokaɱ upapajjatī" ti|| ||

etāhaɱ na jānāmi.|| ||

Ettha ca panāhaɱ Bhagavato saddhāya gacchāmi' ti.|| ||

Evam etaɱ Sīha,||
evam etaɱ Sīha,||
dāyako Sīha, dānapati kāyassa bhedā param maraṇā sugatiɱ saggaɱ lokaɱ upapajjatī ti.|| ||

 


Contact:
E-mail
Copyright Statement   Webmaster's Page