Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta
Avyākata Vaggo

Sutta 55

Arakkheyya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][olds] EVAṂ ME SUTAṂ.|| ||

Ekaɱ samayaɱ Bhagavā Sāvatthiyaɱ viharati.|| ||

Cattārimāni bhikkhave, Tathāgatassa arakkheyyāni,||
tīhi ca anupavajjo.|| ||

Katamāni cattāri Tathāgatassa arakkheyyāni?|| ||

2.1. Parisuddha-kāya-samācāro bhikkhave, Tathāgato.|| ||

N'atthi Tathāgatassa kāyaduccaritaɱ,||
yaɱ Tathāgato rakkheyya||
"mā me idaɱ paro aññāsī" ti.|| ||

2.2. Parisuddha-vacī-samācāro bhikkhave, Tathāgato.|| ||

N'atthi Tathāgatassa vacīduccaritaɱ,||
yaɱ Tathāgato rakkheyya||
"mā me idaɱ paro aññāsī" ti.|| ||

2.3. Parisuddha-mano-samācāro bhikkhave, Tathāgato.|| ||

N'atthi Tathāgatassa manoduccaritaɱ,||
yaɱ Tathāgato rakkheyya||
"mā me idaɱ paro aññāsī" ti.|| ||

2.4. Parisuddhā-jivo bhikkhave, Tathāgato.|| ||

Natti Tathāgatassa micchājivo||
yaɱ Tathāgato rakkheyya||
"mā me idaɱ paro aññāsī" ti.|| ||

Imāni cattāri Tathāgatassa arakkheyyānī.|| ||

Katamehi tīhi anupavajjo?|| ||

3.1. Svākkhātadhammo bhikkhave, Tathāgato.|| ||

Tatra vata maɱ samaṇo vā brāhmaṇo vā devo vā Māro vā Brahmā vā koci vā lokasmiɱ sahadhammena paṭicodessati:|| ||

"Iti pi te na svākkhātadhammo" ti.|| ||

Nimittam etaɱ bhikkhave,||
na samanupassāmi.|| ||

Etam p'ahaɱ bhikkhave, nimittaɱ asamanupassanto khemappatto abhayappatto vesārajjappatto viharāmi.|| ||

3.2. Supaññattā kho pana me bhikkhave,||
sāvakānaɱ nibbānagāmiṇī paṭipadā,||
yathā paṭipannā mama sāvakā āsavānaɱ khayā||
anāsavaɱ ceto-vimuttiɱ||
paññā-vimuttiɱ||
diṭṭhe va dhamme sayaɱ abhiññā sacchikatvā upasampajja viharanti.|| ||

Tatra vata maɱ samaṇo vā brāhmaṇo vā devo vā Māro vā Brahmā vā koci vā lokasmiɱ sahadhammana paṭicodessati:|| ||

"Iti pi te na supaññattā sāvakānaɱ nibbānagāmiṇī paṭipadā,||
yathā paṭipannā Tathāgata sāvakā āsavānaɱ khayā||
anāsavaɱ ceto-vimuttiɱ||
paññā-vimuttiɱ||
diṭṭhe va dhamme sayaɱ abhiññā sacchikatvā upasampajja viharantī" ti.|| ||

Nimittam etaɱ bhikkhave,||
na samanupassāmi.|| ||

Etam p'ahaɱ bhikkhave, nimittaɱ asamanupassanto khemappatto abhayappatto vesārajjappatto viharāmi.|| ||

3.3. Anekasatā kho pana me bhikkhave,||
sāvakaparisā āsavānaɱ khayā||
anāsavaɱ ceto-vimuttiɱ||
paññā-vimuttiɱ||
diṭṭhe va dhamme sayaɱ abhiññā sacchikatvā upasampajja viharantī.|| ||

Tatra vata maɱ samaṇo vā brāhmaṇo vā devo vā Māro vā Brahmā vā koci vā lokasmiɱ sahadhammena paṭicodessati:|| ||

"Iti pi te na anekasatā sāvakaparisā āsavānaɱ khayā||
anāsavaɱ ceto-vimuttiɱ||
paññā-vimuttiɱ||
diṭṭhe va dhamme sayaɱ abhiññā sacchikatvā upasampajja viharantī" ti.|| ||

Nimittame taɱ bhikkhave,||
na samanupassāmi.|| ||

Etam p'ahaɱ bhikkhave, nimittaɱ asamanupassanto khemappatto abhayappatto vesārajjappatto viharāmi.|| ||

Imehi tīhi anupavajjo.|| ||

Imāni kho bhikkhave, cattāri Tathāgatassa arakkheyyāni.|| ||

Imehi tīhi anupavajjo ti.|| ||

 


Contact:
E-mail
Copyright Statement   Webmaster's Page