Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta

Sutta 58

Pacalāyana suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati][bd] Evaɱ me sutaɱ:|| ||

Ekam samayaɱ Bhagavā Bhaggesu viharati Suɱsumāragire Bhesaka'āvane Migadāye.|| ||

Tena kho pana samayena āyasmā MahāMoggallāno Magadhesu Kallavā'amuttagāme pacalāyamāno nisinno hoti.|| ||

Addasā kho Bhagavā dibbena cakkhunā||
visuddhena atikkantamānusakena||
āyasmantaɱ MahāMoggallānaɱ Magadhesu Kallavā'amuttagāme pacalāyamānaɱ nisinnaɱ.|| ||

Disvā seyyathā pi nāma balavā puriso sammiñjitaɱ vā bāhaɱ pasāreyya,||
pasāritam vā bāhaɱ sammiñjeyya,||
evam eva Bhaggesu Suɱsumāragire Bhesaka'āvane Migadāye||
antarahito Magadhesu Kallavā'amuttagāme||
āyasmato MahāMoggallānassa pamukhe pātu-r-ahosi.|| ||

Nisīdi Bhagavā paññatte āsane.|| ||

Nisajja kho Bhagavā āyasmantaɱ MahāMoggallānaɱ etad avoca.|| ||

'Pacalāyasi no tvaɱ Moggallāna?||
Pacalāyasi no tvaɱ moggallānā?' ti.|| ||

Evaɱ bhante' ti.|| ||

[2][pts][ati][bd] Tasmā ti ha tvāɱ Moggallāna,||
yathā saññissa te vivarato taɱ middhaɱ okkamati,||
taɱ saññaɱ mā manasākāsi.|| ||

[86] Taɱ saññaɱ mā bahulam akāsi:||
Ṭhānaɱ kho pan'etaɱ vijjati,||
yaɱ te evaɱ viharato taɱ middhaɱ pahīyetha.|| ||

[3][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna||
yathāsutaɱ yathāpariyattaɱ dhammaɱ cetasā anuvitakkeyyāsi,||
anūvicāreyyāsi,||
manasānupekkheyyāsi.|| ||

Ṭhānaɱ kho pan'etaɱ vijjati,||
yaɱ te evaɱ viharato taɱ middhaɱ pahīyetha.|| ||

[4][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna,||
yathāsutaɱ yathāpariyattaɱ dhammaɱ vitthārena sajjhāyaɱ kareyyāsi:||
Ṭhānaɱ kho pan'etaɱ vijjati,||
yan te evaɱ viharato taɱ middaɱ pahīyetha.|| ||

[5][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna,||
ubho kaṇṇasotāni āvijeyyāsi pāṇinā gattāni anumajjeyyāsi.|| ||

Ṭhānaɱ kho pan'etaɱ vijjati||
yaɱ te evaɱ viharato taɱ middhaɱ pahīyetha.|| ||

[6][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna,||
uṭṭhāy āsanā udakena akkhīni anumajjitvā disā anuvilokeyyāsi.|| ||

Nakkhattāni tārakarūpāni ullokeyyāsi.|| ||

Ṭhānaɱ kho pan'etaɱ vijjati||
yaɱ te evaɱ viharato taɱ middhaɱ pahīyetha.|| ||

[7][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna,||
ālokasaññaɱ manasikareyyāsi,||
divā saññaɱ adhiṭṭheyyāsi.|| ||

Yathā divā tathā rattiɱ||
yathā rattiɱ tathā divā.|| ||

Iti vivaṭena cetasā apariyonaddhena sappabhāsaɱ cittaɱ bhāveyyāsi.|| ||

Ṭhānaɱ kho pan'etaɱ vijjati||
yaɱ te evaɱ viharato taɱ middhaɱ pahīyetha.|| ||

[87] [8][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna,||
pacchāpuresaññi cankamaɱ adhiṭṭheyyāsi||
antogatehi indriyehi,||
abahigatena mānasena.|| ||

Ṭhānaɱ kho panataɱ vijjati||
yaɱ te evaɱ viharato taɱ middhaɱ pahīyetha.|| ||

[9][pts][ati][bd] No ce te evaɱ viharato taɱ middhaɱ pahīyetha,||
tato tvaɱ Moggallāna||
dakkhiṇena passena sīhaseyyaɱ kappeyyāsi pādena pādaɱ accādhāya sato sampajāno uṭṭhānasaññaɱ manasikaritvā.|| ||

Paṭibuddhena ca te Moggallāna,||
khippaɱ yeva paccuṭṭhātabbaɱ:||
'Na seyyasukhaɱ na phassukhaɱ na middhasukhaɱ anuyutto viharissāmī' ti.|| ||

Evaɱ hi te Moggallāna, sikkhitabbaɱ.|| ||

[10][pts][ati][bd] Tasmā ti ha Moggallāna evaɱ sikkhitabbaɱ:||
'Na uccāsoṇḍaɱ paggahetvā kulāni upasaŋkamissāmī' ti.|| ||

Evaɱ hi te Moggallāna,||
sikkhitabbaɱ.|| ||

Sace Moggallāna,||
bhikkhū uccāsoṇḍaɱ paggahetvā kulāni upasaŋkamati,||
santi hi Moggallāna,||
kulesu kiccakaraṇīyānī yena manussā āgataɱ bhikkhūɱ na manasikarontī ti.|| ||

Tatra bhikkhussa evaɱ hoti:||
'Ko su nāma dāni maɱ imasmiɱ kule paribhindi,||
virattarūpā'dān'īme mayi manussā?' ti.|| ||

Iti sa alābhena maŋkubhāvo.|| ||

Mankubhutassa uddhaccaɱ.|| ||

Uddhatassa asaŋvaro.|| ||

Asaŋvutassa ārā cittaɱ samādhimhā.|| ||

Tasmā ti ha Moggallāna,||
evaɱ sikkhitabbaɱ:||
'Na viggāhikakathaɱ kathessāmī' ti.|| ||

Evaɱ hi te Moggallāna, sikkhitabbaɱ.|| ||

Viggāhikāya Moggallāna kathāya sati katābāhullaɱ pāṭikaŋkhaɱ.|| ||

Kathābāhulle sati uddhaccaɱ.|| ||

Uddhatassa asaŋvaro.|| ||

Asaɱvutassa ārā cittaɱ samādhimhā.|| ||

Nāhaɱ Moggallāna, sabbe h'eva saŋsaggaɱ vaññayāmi, na [88] panāhaɱ Moggallāna sabbe h'eva saŋsaggaɱ na vaññayāmi.|| ||

Sagahaṭṭhapabbajitehi kho ahaɱ Moggallāna saŋsaggaɱ na vaṇṇayāmi.|| ||

Yāni ca kho tāni senāsanāni appasaddāni appanigghosāni vijanavātāni manussarāhaseyyakāni paṭisallānasāruppāni, tathārūpehi senāsanehi saŋsaggaɱ vaṇṇayāmī' ti.|| ||

[11][pts][ati][bd] Evaɱ vutte āyasmā MahāMoggallāno Bhagavantaɱ etad avoca:||
'Kittāvatā nu kho bhante,||
bhikkhu saŋkhittena taṇhāsaŋkhayavimutto hoti accantaniṭṭho accantayogakkhemī accantabrahmacārī accantapariyosāno seṭṭho deva-manussānan' ti?|| ||

'Idha Moggallāna, bhikkhuno sutaɱ hoti||
sabbe dhammā nālaɱ abhinivesāyā ti.|| ||

Evaɱ c'etaɱ Moggallāna, bhikkhuno sutaɱ hoti||
sabbe dhammā nālaɱ abhinivesāyā ti.|| ||

So sabbaɱ dhammaɱ abhijānāti,
so sabbaɱ dhammaɱ abhiññāya||
sabbaɱ dhammaɱ parijānāti,
sabbaɱ dhammaɱ pariññāya yaɱ kiñci vedanaɱ vediyati sukhaɱ vā dukkhaɱ vā adukkha-m-asukhaɱ vā.|| ||

So tāsu vedanāsu aniccānupassī viharati,||
virāgānupassī viharati,||
nirodhānupassī viharati,||
paṭinissaggānupassī viharati.|| ||

So tāsu vedanāsu aniccānupassī viharanto,||
virāgānupassī viharanto,||
nirodhānupassī viharanto,||
paṭinissāggānupassī viharanto na ca kiñci loke upādiyati.|| ||

Anupādiyaɱ na paritassati.|| ||

Aparitassaɱ paccattaɱ yeva parinibkhāyati.|| ||

Khīṇā jāti||
vusitaɱ brahmacariyaɱ||
kataɱ karaṇīyaɱ||
nāparaɱ itthattāyā' ti pajānāti.|| ||

Ettāvatā kho Moggallāna, bhikkhū saŋkhittena taṇhāsaŋkhayāvimutto hoti accantaniṭṭho accantayogakkhemi accantabrahmacārī accantapariyosāṇo. Seṭṭho deva-manussānan' ti.|| ||

 

§

 

Sutta 59a

Māpuññabhāyi Suttaɱ[1]

Mā bhikkhave, puññānaɱ bhayittha.|| ||

Sukhassetaɱ bhikkhave,||
adhivacanaɱ yad idaɱ puññanti.|| ||

1. Abhijānāmi kho panāhaɱ bhikkhave, dīgha-rattaɱ katānaɱ puññānaɱ dīgha-rattaɱ iṭṭhaɱ kantaɱ manāpaɱ vipākaɱ paccanubhūtaɱ.|| ||

Sattavassāni mettaɱ cittaɱ bhāvesiɱ.|| ||

Sattavassāni mettaɱ cittaɱ bhāvetvā sattasaɱvaṭṭhavivaṭṭakappe nayimaɱ lokaɱ punarāgamāsiɱ. Saɱvaṭṭamānassudāhaɱ bhikkhave,||
loke ābhassarūpago homi.|| ||

Vivaṭṭamāne loke suññaɱ Brahma-vimānaɱ upapajjāmi.|| ||

Tatra sudaɱ bhikkhave,||
(sattakkhattuɱ) Brahmā homi Mahā-Brahmā abhibhū anabhibhūto aññadatthu daso vasavattī.|| ||

Chattiɱsakkhattuɱ kho panāhaɱ bhikkhave Sakko ahosiɱ devānam indo.|| ||

Anekasatakkhattuɱ rājā ahosiɱ cakkavatti dhammiko dhammarājā cāturanto vijitāvi janapadatthāvariyappatto sattaratanasamannāgato.|| ||

Tassa mayhaɱ bhikkhave,||
imāni sattaratanānī ahesuɱ.|| ||

Seyyathīdaɱ:||
cakkaratanaɱ hatthiratanaɱ assaratanaɱ maṇiratanaɱ itthiratanaɱ gahapatiratanaɱ parināyakaratanameva sattamaɱ.|| ||

Parosahassaɱ kho pana me bhikkhave,||
puttā ahesuɱ sūrā vīraŋgarūpā parasenappamaddanā.|| ||

Sohaɱ imaɱ paṭhaviɱ sāgarapariyan taɱ adaṇḍena asatthena dhammena ahivijiya ajjhāvasinti.|| ||

 

Passa puññānaɱ vipākaɱ kusalānaɱ sukhesino||
Mettaɱ cittaɱ vībhāvetvā sattavassāni bhikkhave,||
Satta saɱvaṭṭa- vivaṭṭakappe nayimaɱ lokaɱ punāgamaɱ.|| ||

Saɱvaṭṭamāne lokambhi homi ābhassarūpago,||
Vivaṭṭamāne lokambhi suññaɱ brahmūpago ahuɱ.|| ||

Sattakkhattuɱ Mahā-Brahmā vasavatti tadā ahuɱ.||
Chattiɱsakkhattuɱ devindo devarajjamakārayiɱ|| ||

Cakkavatti ahuɱ rājā Jambudīpassa issaro||
Muddhāvasitto khattiyo manussādhipatī ahuɱ.|| ||

Adaṇḍena asatthena vijeyya paṭhaviɱ imaɱ||
Asāhasena dhammena samena anusāsiyaɱ.|| ||

Dhammena rajjaɱ kāretvā asmiɱ paṭhavimaṇḍale||
Mahaddhane mahābhoge aḍḍhe ajāyisaɱ kule|| ||

Sabbakāmehi sampanno ratanehi ca sattahi,||
Buddhā saŋgāhakā loke tehi etaɱ1 sudesitaɱ.|| ||

Esa hetumahantassa pathavyo yena vuccati.||
Pahūtavittūpakaraṇo rājā homi patāpavā|| ||

Iddhimā yasavā homi jambusaṇḍassa issaro.||
Ko sutvā nappasīdeyya api kaṇhābhijātiyo.|| ||

Tasmā hi atthakāmena mahattamabhikaŋkhatā||
Saddhammo garukātabbo saraɱ buddhāna sāsanaɱ.|| ||

 


[1] From here to the end as a separate sutta in BJT.

 


Contact:
E-mail
Copyright Statement   Webmaster's Page