Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta
Avyākata Vaggo

Sutta 59

Sattabhariyā Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

EVAṂ ME SUTAṂ.|| ||

Ekaɱ samayaɱ Bhagavā sāvattiyaɱ viharati Jetavane Anāthapiṇḍikassa ārāme.|| ||

Atha kho Bhagavā pubbaṇhasamayaɱ nivāsetvā pattacīvaraɱ ādāya yena Anāthapiṇḍikassa gahapatissa nivesanaɱ ten'upasaŋkami.|| ||

Upasaŋkamitvā paññatte āsane nisīdi.|| ||

Tena kho pana samayena Anāthapiṇḍikassa gahapatissa nivesane manussā uccāsaddā mahāsaddā honti.|| ||

Atha kho Anāthapiṇḍiko gahapati yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Anāthapiṇḍikaɱ gahapatiɱ Bhagavā etad avoca:|| ||

Kin nu te gahapati nivesane manussā uccāsaddā mahāsaddā, kevaṭṭā maññe macchavilopeti?|| ||

Ayaɱ bhante, sujātā gharasuṇhā aḍḍhā aḍaḍhakulā ānītā.|| ||

Sā n'eva sassuɱ ādiyati.|| ||

Na sasuraɱ ādiyati.|| ||

Na sāmikaɱ ādiyati.|| ||

Bhagavantampi na sakkaroti,||
na garukaroti na māneti,||
na pūjetī ti.|| ||

Atha kho Bhagavā sujātaɱ gharasuṇhaɱ āmantesi ehi sujāteti.|| ||

Evaɱ bhante' ti kho sujātā gharasuṇhā Bhagavato paṭissutvā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho sujātaɱ gharasuṇhaɱ Bhagavā etad avoca:|| ||

Satta kho imā sujāte, purisassa bhariyāyo.|| ||

Katamā satta?|| ||

Vadhakasamā,||
vorisamā,||
ayyasamā,||
mātusamā,||
bhaginīsamā,||
sakhīsamā,||
dāsisamā,||
imā kho sujāte, satta purisassa bhariyāyo|| ||

Tāsaɱ tvaɱ katamāti.|| ||

Na kho ahaɱ bhante,||
imassa Bhagavatā saŋkhittena bhāsitassa vitthārena atthaɱ ājānāmi.|| ||

Sādhu me bhante, Bhagavā tathā dhammaɱ desetu,||
yathā ahaɱ imassa Bhagavatā saŋkhittena bhāsitassa vitthārena atthaɱ ājāneyyanti.|| ||

Tena hi sujāte,||
sūṇāhi,||
sādhukaɱ manasikarohi,||
bhāsissāmiti.|| ||

Evaɱ bhante' ti kho sujātā gharasuṇhā Bhagavato paccassosi.|| ||

Bhagavā etad avoca:|| ||

 

Paduṭṭhacittā ahitānukampinī||
Aññesu rattā atimaññate patiɱ,||
Dhanena kītassa vadhāya ussukā,||
Yā evarūpā purisassa bhariyā||
Vadhakā ca bhariyāti ca sā pavuccati|| ||

Yaɱ itthiyā vindati sāmiko dhanaɱ||
Sippaɱ vaṇijjañca kasiɱ adhiṭṭhahaɱ,||
Appampi tasmā1 apahātumicchati,||
Yā evarūpā purisassa bhariyā||
Cori ca bhariyāti ca sā pavuccati.|| ||

Akammakāmā alasā mahagghasā||
Pharusā caṇḍī ca duruttavādinī,||
Uṭṭhāyakānaɱ abhibhūyya vattati,||
Yā evarūpā purisassa bhariyā||
Ayyā ca bhariyāti ca sā pavuccati.|| ||

Yā sabbadā hoti hitānukampinī||
Mātāva puttaɱ anurakkhate patiɱ,||
Tato dhanaɱ sambhatamassa rakkhati,||
Yā evarūpā purisassa bhariyā||
Mātā ca bhariyāti ca sā pavuccati.|| ||

Yathāpi jeṭṭhe bhaginī kaniṭṭhā||
Sagāravā hoti sakamhi sāmike,||
Hirimanā3 bhattuvasānuvattīnī,||
Yā evarūpā purisassa bhariyā||
Bhagini ca bhariyāti ca sā pavuccati.|| ||

Yā cīdha disvāna patiɱ pamodati||
Sakhī sakhāraɱva cirassamāgataɱ,||
Koleyyakā sīlavatī patibbatā,||
Yā eva rūpā purisassa bhariyā||
Sabhī ca bhariyāti ca sā pavuccati.|| ||

Akkuddhasantā vadhadaṇḍatajjitā,||
Aduṭṭhacittā patino titikkhati,||
Akkodhanā bhattuvasānuvattīnī,||
Yā evarūpā purisassa bhariyā||
Dāsī ca bhariyāti ca sā pavuccati.|| ||

Yā cīdha bhariyā vadhakāti vuccati,||
Cori ca ayāti ca yā pavuccati,||
Dussīlarūpā pharusā anādarā||
Kāyassa bhedā Nirayaɱ vajanti tā.|| ||

Yā cīdhāmātā bhaginī sakhī ca||
Dāsī ca hariyāti ca yā pavuccati,||
Sīle ṭhitattā cirarattasaɱvutā||
Kāyassa bhedā sugatiɱ vajanti tā.|| ||

Imā kho sujāte satta purisassa bhariyāyo.|| ||

Tāsaɱ tvaɱ katamāti?|| ||

[94] Ajjatagge maɱ bhante,||
Bhagavā dāsi samaɱ sāmikassa bhariyaɱ dhāretūti.|| ||

 


Contact:
E-mail
Copyright Statement   Webmaster's Page