Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Sattaka Nipāta
Mahā Vaggo

Sutta 66

Sakkāragarukāra Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] EVAṂ ME SUTAṂ.|| ||

Sāvatthinidānaɱ.|| ||

2. Atha kho āyasmato Sāriputtassa rahogatassa patisallīnassa evaɱ cetaso paricitakko udapādi:|| ||

'Kin nu kho bhikkhu sakkatvā garukatvā upanissāya viharanto akusalaɱ pajaheyya kusalaɱ bhāveyyā' ti?|| ||

Atha kho āyasmato Sāriputtassa etad ahosi:|| ||

"Satthāraɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Dhammaɱ kho bhikkhu sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Saŋghaɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Sikkhaɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Samādhiɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Appamādaɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Paṭisanthāraɱ kho bhikkhu sakkatvā garukatvā upanissāya viharanto akusalaɱ pajaheyya,||
kusalaɱ bhāveyya" ti.|| ||

Atha kho āyasmato Sāriputtassa etad ahosi:|| ||

'Ime kho me dhammā parisuddhā pariyodātā,||
yan nūnāhaɱ ime dhamme gantvā Bhagavato āroceyyaɱ,||
evam me ime dhammā parisuddhā c'eva bhavissanti parisuddha-saŋkhatatarā ca.|| ||

Seyyathā pi nāma puriso suvaṇṇanikkhaɱ adigaccheyya parisuddhaɱ pariyodānaɱ,||
tassa evam assa:|| ||

"Ayaɱ kho me suvaṇnanikkho parisuddho parayodāto,||
yan nūnāhaɱ imaɱ suvaṇṇanikkhaɱ gantvā kammārānaɱ dasseyyaɱ,||
evam me ayaɱ sūvaṇṇanikkho kammāragato parisuddho c'eva bhavissati parisuddha-saŋkhattaro cā" ti.|| ||

Evam eva me ime dhammā parisuddhā pariyodātā,||
yan nūnāhaɱ ime dhamme gantvā Bhagavato āroceyyaɱ,||
evam me ime dhammā parisuddhā c'eva bhavissanti parisuddha-saŋkhatatarā cā' ti.|| ||

Atha kho āyasmā Sāriputto sāyaṇhasamayaɱ patisallānā vuṭṭhito yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

3. Idha mayhaɱ bhante, rahogatassa patisallīnassa evaɱ cetaso parivitakko udapādi:|| ||

"Kin nu kho bhikkhū sakkatva garukatvā upanissāya viharanto akusalaɱ pajaheyya,||
kusalaɱ bhāveyyā" ti?|| ||

Tassa mayhaɱ bhante etad ahosi:|| ||

'Satthāraɱ kho bhikkhū sakkatva garukatva upanissāya viharanto akusalaɱ pajaheyya,||
kusalaɱ bhāveyya.|| ||

Dhammaɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Saŋghaɱ ko bhikkhū sakkatā garukatā upanissāya viharanto akusalaɱ pajaheyya,||
kusalaɱ bhāveyya.|| ||

Sikkhaɱ kho bhikkhū sakkatva garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Samādhiɱ kho bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Appamādaɱ kho bhikkhū sakkatvā garukatvā unissāya viharanto akusalaɱ pajaheyya,||
kusalaɱ bhāveyya.|| ||

Paṭisatthāraɱ kho bhikkhu sakkatvā garukatvā upanissāya viharanto akusalaɱ pajaheyya,||
kusalaɱ bhāveyya' ti.|| ||

Tassa mayhaɱ bhante, etad ahosi:|| ||

'Ime kho me dhammā parisuddha pariyodā,||
yan nūnāhaɱ ime dhamme gantvā Bhagavato āroceyyaɱ,||
evam me ime dhammā parisuddhā c'eva bhavissanti parisuddha-saŋkhatatarā ca."|| ||

Seyyathā pi nāma purise suvaṇṇanikkhaɱ adhigaccheyya,||
parisuddhaɱ pariyodātaɱ,||
tassa evam assa:|| ||

"Ayaɱ kho me suvaṇṇanikkho parisuddho pariyodāto,||
yan nūnāhaɱ imaɱ suvaṇṇanikkhaɱ gantvā kammārānaɱ dasseyyaɱ,||
evam me ayaɱ suvaṇṇanikkho kammāragato parisuddho c'eva bhavissati parasuddha-saŋkhatataro cā" ti.|| ||

Evam eva me ime dhammā parisuddhā pariyodātā,||
yan nūnāhaɱ ime dhamme gantvā Bhagavato āroceyyaɱ,||
evam me ime dhammā parisuddhā c'eva bhavissanti parisuddha-saŋkhatatarā cā' ti.|| ||

Sādhu sādhu Sāriputta.|| ||

Satthāraɱ kho Sāriputta, bhikkhu sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Dhammaɱ kho Sāriputta, bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Saŋghaɱ ko Sāriputta, bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Sikkhaɱ kho Sāriputta, bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Samādhiɱ kho Sāriputta bhikkhū sakkatvā garukatvā upanissā viharanto akusalaɱ pajaheyya,||
kusalaɱ bhāveyya.|| ||

Appamādaɱ kho Sāriputta, bhikkhu sakkatva garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Paṭisatthāraɱ kho Sāriputta, bhikkhū sakkatvā garukatvā upanissāya viharanto akusalaɱ pajaheyya,||
kusalaɱ bhāveyya.|| ||

Evaɱ vutte āyasmā Sāriputto Bhagavantaɱ etad avoca:|| ||

3. 'Imassa kho ahaɱ bhante Bhagavatā saŋkhittena bhāsitassa evaɱ vitthārena atthaɱ ājānāmi:|| ||

So vata bhante, bhikkhū Satthari agāravo dhamme sagāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari agāravo,||
dhamme pi so agāravo.|| ||

So vata bhante, bhikkhū Satthari agāravo dhamme agāravo saŋghe sagāravo bhavissatī ti||
n'etaɱ ṭhānaɱ vijjatī.|| ||

Yo so bhante bhikkhū Satthari agāravo dhamme agāravo, saŋghe pi so agāravo.|| ||

So vata bhante, bhikkhū Satthari agāravo, dhamme agāravo, saŋgho agāravo sikkhāya sagāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari agaravo, dhamme agāravo, saŋgho agāravo sikkhāya pi so agāravo.|| ||

So vata bhante, bhikkhū Satthari agāravo, dhamme agāravo, saŋghe agāravo, sikkhāya agāravo samādismiɱ sagāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari agāravo, dhamme agāravo, saŋgho agāravo, sikkhāya agāravo, samādhismim pi so agāravo.|| ||

So vata bhante, bhikkhū Satthari agāravo, dhamme agāravo, saŋghe agāravo, sikkhāya agāravo, samādhismiɱ agāravo appamāde sagāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari agāravo, dhamme agaravo, saŋghe agāravo, sikkhāya agāravo, samādhismiɱ agāravo appamāde pi so agāravo.|| ||

So vata bhante bhikkhu Satthari agāravo, dhamme agāravo, saŋghe agāravo, sikkhāya agāravo, samādismiɱ agāravo, appamāde agaravo, paṭisatthāre sagāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhu Satthari agāravo, dhamme agaravo, saŋghe agāravo, sikkhāya agāravo, samādismiɱ agāravo, appamāde agāravo paṭisatthāre pi so agāravo.|| ||

 


 

So vata bhante, bhikkhū Satthari sagāravo||
dhamme agāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari sagāravo||
dhamma pi so sagāravo.|| ||

So vata bhante, bhikkhū Satthari sagāravo, dhamme sagāravo,||
saŋghe agāravo bhavissatī ti||
n'etaɱ ṭhānaɱ vijjati|| ||

Yo so bhante, bhikkhū Satthari sagāravo, dhamme sagāravo||
saŋghe pi so sagāravo.|| ||

So vata bhante bhikkhū Satthari sagāravo, dhamme sagāravo, saŋghe sagāravo,||
sikkhāya agāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari sagāravo, dhamme sagāravo, saŋghe sagāravo||
sikkhāya pi so sagāravo.|| ||

So vata bhante, bhikkhū Satthari sagāravo, dhamme sagāravo, saŋgho sagāravo, sikkhāya sagāravo,||
samādhismiɱ agāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari sagāravo, dhamme sagāravo, saŋghe sagāravo, sikkhāya sagāravo||
samādismiɱ pi so sāgāravo.|| ||

So vata bhante, bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādhismiɱ sagāravo||
appamāde agāravo bhavissatī ti||
n'etaɱ ṭhānaɱ vijjati.|| ||

Yo so bhante bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādhismiɱ sagāravo||
appamāde pi so sagāravo.|| ||

So vata bhante, bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādismiɱ sagāravo, appamāde sagāravo||
paṭisatthāre agāravo bhavissatī ti||
n'etaɱ ṭhānaɱ vijjati.|| ||

Yo so bhante, bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādismiɱ sagāravo, appamāde sagāravo||
paṭisatthāre pi so sagāravo' ti.|| ||

Imassa kho ahaɱ bhante, Bhagavatā saŋkhittena bhāsitassa evaɱ vitthārena atthaɱ ājānāmi.|| ||

 


 

Sādhu sādhu Sāriputta.|| ||

Sādhu kho tvaɱ Sāriputta,||
imassamayā saŋkhittena bhāsitassa evaɱ vitthārena atthaɱ ājānāsi.|| ||

So vata Sāriputta, bhikkhū Satthari agāravo dhamme sagāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari agāravo,||
dhamme pi so agāravo.|| ||

So vata Sāriputta, bhikkhū Satthari agāravo dhamme agāravo saŋghe sagāravo bhavissatī ti||
n'etaɱ ṭhānaɱ vijjatī.|| ||

Yo so Sāriputta bhikkhū Satthari agāravo dhamme agāravo, saŋghe pi so agāravo.|| ||

So vata Sāriputta, bhikkhū Satthari agāravo, dhamme agāravo, saŋgho agāravo sikkhāya sagāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari agaravo, dhamme agāravo, saŋgho agāravo sikkhāya pi so agāravo.|| ||

So vata Sāriputta, bhikkhū Satthari agāravo, dhamme agāravo, saŋghe agāravo, sikkhāya agāravo samādismiɱ sagāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari agāravo, dhamme agāravo, saŋgho agāravo, sikkhāya agāravo, samādhismim pi so agāravo.|| ||

So vata Sāriputta, bhikkhū Satthari agāravo, dhamme agāravo, saŋghe agāravo, sikkhāya agāravo, samādhismiɱ agāravo appamāde sagāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari agāravo, dhamme agaravo, saŋghe agāravo, sikkhāya agāravo, samādhismiɱ agāravo appamāde pi so agāravo.|| ||

So vata Sāriputta bhikkhu Satthari agāravo, dhamme agāravo, saŋghe agāravo, sikkhāya agāravo, samādismiɱ agāravo, appamāde agaravo, paṭisatthāre sagāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhu Satthari agāravo, dhamme agaravo, saŋghe agāravo, sikkhāya agāravo, samādismiɱ agāravo, appamāde agāravo paṭisatthāre pi so agāravo.|| ||

 


 

So vata Sāriputta, bhikkhū Satthari sagāravo||
dhamme agāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari sagāravo||
dhamma pi so sagāravo.|| ||

So vata Sāriputta, bhikkhū Satthari sagāravo, dhamme sagāravo,||
saŋghe agāravo bhavissatī ti||
n'etaɱ ṭhānaɱ vijjati|| ||

Yo so Sāriputta, bhikkhū Satthari sagāravo, dhamme sagāravo||
saŋghe pi so sagāravo.|| ||

So vata Sāriputta bhikkhū Satthari sagāravo, dhamme sagāravo, saŋghe sagāravo,||
sikkhāya agāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari sagāravo, dhamme sagāravo, saŋghe sagāravo||
sikkhāya pi so sagāravo.|| ||

So vata Sāriputta, bhikkhū Satthari sagāravo, dhamme sagāravo, saŋgho sagāravo, sikkhāya sagāravo,||
samādhismiɱ agāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari sagāravo, dhamme sagāravo, saŋghe sagāravo, sikkhāya sagāravo||
samādismiɱ pi so sāgāravo.|| ||

So vata Sāriputta, bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādhismiɱ sagāravo||
appamāde agāravo bhavissatī ti||
n'etaɱ ṭhānaɱ vijjati.|| ||

Yo so Sāriputta bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādhismiɱ sagāravo||
appamāde pi so sagāravo.|| ||

So vata Sāriputta, bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādismiɱ sagāravo, appamāde sagāravo||
paṭisatthāre agāravo bhavissatī ti||
n'etaɱ ṭhānaɱ vijjati.|| ||

Yo so Sāriputta, bhikkhū Satthari sagāravo, dhamme sagāravo, saŋghe sagāravo, sikkhāya sagāravo, samādismiɱ sagāravo, appamāde sagāravo||
paṭisatthāre pi so sagāravo' ti.|| ||

Imassa kho ahaɱ Sāriputta, Bhagavatā saŋkhittena bhāsitassa evaɱ vitthārena atthaɱ ājānāmi.|| ||

Imassa kho Sāriputta, saŋkhittena bhāsitassa evaɱ vitthārena atthā daṭṭhabboti.|| ||

 


Contact:
E-mail
Copyright Statement   Webmaster's Page