Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
VIII. Aṭṭhaka Nipāta
I: Mettā Vagga

Sutta 10

Kāraṇḍava Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Campāyaɱ viharati Gaggarāya pokkharaṇiyā tīre.|| ||

Tena kho pana samayena bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno aññenaññaɱ paṭicarati,||
bahiddhā kathaɱ apanāmeti,||
kopañ ca dosañ ca appaccayañ ca pātukaroti.|| ||

Atha kho Bhagavā bhikkhu āmantesi:|| ||

2. Niddhamath'etaɱ bhikkhave puggalaɱ,||
niddhamath'etaɱ bhikkhave, puggalaɱ.|| ||

Apaneyyo so bhikkhave puggalo.|| ||

Kiɱ vo paraputta viheṭheti?|| ||

Idha, bhikkhave, ekaccassa puggalassa tādisaɱ yeva hoti||
abhikkantaɱ paṭikkantaɱ ālokitaɱ vilokitaɱ sammiñjitaɱ pasāritaɱ saɱghāṭipatta cīvaradhāraṇaɱ,||
seyyathā pi aññesaɱ bhaddakānaɱ bhikkhūnaɱ,||
yāv'assa bhikkhū āpattiɱ na passanti,||
yato ca khvāssa bhikkhū āpattiɱ passanti,||
tam enaɱ evaɱ jānanti:|| ||

'Samaṇadūsī'vāyaɱ samaṇapalāpo samaṇakāraṇaḍavo' ti.|| ||

Tam enaɱ iti viditvā bahiddhā nāsenti.|| ||

Taɱ kissa hetu?|| ||

Mā aññe bhaddake bhikkhū dūsesī ti.|| ||

3. Seyyathā pi, bhikkhave, sampanne yavakaraṇe yavadūsī jāyetha,||
yavapalāpo yavakāraṇḍavo.|| ||

Tassa tādisaɱ yeva mūlaɱ hoti,||
seyyathā pi aññesaɱ bhaddakānaɱ yavānaɱ,||
Tādisaɱ yeva nālaɱ hoti,||
seyyathā pi aññesaɱ bhaddakānaɱ yavānaɱ,||
tādisaɱ yeva pattaɱ hoti,||
seyyathā pi aññesaɱ bhaddakānaɱ yavānaɱ,||
yāv'assa sīsaɱ na nibbattati,||
yato ca khvāssa sīsaɱ nibbattati.|| ||

Tam enaɱ evaɱ jātanti:|| ||

'Yavadūsī'vāyaɱ yavapalāpo yavakāraṇḍavo' ti.|| ||

Tam enaɱ iti viditvā samūlaɱ uppāṭetvā bahiddhā yavakaraṇassa chaḍḍhenti.|| ||

Taɱ kissa hetu?|| ||

Mā aññe bhadrake yave dūsesī ti.|| ||

Evam eva kho bhikkhave idh'ekaccassa puggalassa tādisaɱ yeva hoti||
abhikkantaɱ paṭikkantaɱ ālokitaɱ vilokitaɱ sammiñjitaɱ pasāritaɱ sanghāṭipatta cīvaradhāraṇaɱ,||
seyyathā pi aññesaɱ bhaddakānaɱ bhikkhūnaɱ||
yāv'assa bhikkhū āpattiɱ na passanti,||
yato ca khvāssa bhikkhū āpattiɱ passanti,||
tam enaɱ evaɱ jānanti:|| ||

'Samaṇadusī'vāyaɱ samaṇapalāpo samaṇakāraṇḍavo' ti.|| ||

Tam enaɱ iti viditvā bahiddhā nāsenti.|| ||

Taɱ kissa hetu?|| ||

Mā aññe bhadrake bhikkhū dūsesī ti.|| ||

4. Seyyathā pi, bhikkhave, mahato dhaññarāsissa vūvamānassa tattha yāni tāni dhaññāni daḷhāni sāravantāni,||
tāni eka-m-antaɱ puñjaɱ hoti,||
yāni pana tāni dhaññāni dubbalāni palāpāni,||
tāni vāto eka-m-antaɱ apavahati.|| ||

Tam enaɱ sāmikā sāmikā sammajjaniɱ gahetvā bhiyyo somattāya apasammajjanti.|| ||

Taɱ kissa hetu?|| ||

Mā aññe bhadrake dhaññe dūsesī ti.|| ||

Evam eva kho bhikkhave idh'ekaccassa puggalassa tādisaɱ yeva hoti||
abhikkantaɱ paṭikkantaɱ ālokitaɱ vilokitaɱ sammiñjitaɱ pasāritaɱ sanghāṭipatta cīvaradhāraṇaɱ,||
seyyathā pi aññesaɱ bhaddakānaɱ bhikkhūnaɱ||
yāv'assa bhikkhū āpattiɱ na passanti,||
yato ca khvāssa bhikkhū āpattiɱ passanti,||
tam enaɱ evaɱ jānanti:|| ||

'Samaṇadusī'vāyaɱ samaṇapalāpo samaṇakāraṇḍavo' ti.|| ||

Tam enaɱ iti viditvā bahiddhā nāsenti.|| ||

Taɱ kissa hetu?|| ||

Mā aññe bhadrake bhikkhū dūsesī ti.|| ||

5. Seyyathā pi, bhikkhave, puriso udapānapaṇāliyā atthiko tiṇhaɱ kuṭhāriɱ ādāya vanaɱ paviseyya,||
so taɱ tad eva rukkhaɱ kuṭhāripāsena ākoṭeti.|| ||

Tattha yāni tāni rukkhāni daḷhāni sāravantāni,||
kuṭhāripāsena ākoṭitāni kakkhalaɱ paṭinadanti,||
yāni tāni rukkhāni antopūtīni avassutāni kasambujātāni,||
tāni kuṭhāripāsena ākoṭitāni daddaraɱ paṭinadanti.|| ||

Tam enaɱ mūle chindati,||
mūle chinditvā agge chindati,||
agge chinditvā anto suvisodhitaɱ visodheti,||
anto suvisodhitaɱ visodhetvā udapānapaṇāliɱ yojeti.|| ||

Evam eva kho bhikkhave idh'ekaccassa puggalassa tādisaɱ yeva hoti||
abhikkantaɱ paṭikkantaɱ ālokitaɱ vilokitaɱ sammiñjitaɱ pasāritaɱ sanghāṭipatta cīvaradhāraṇaɱ,||
seyyathā pi aññesaɱ bhaddakānaɱ bhikkhūnaɱ||
yāv'assa bhikkhū āpattiɱ na passanti,||
yato ca khvāssa bhikkhū āpattiɱ passanti,||
tam enaɱ evaɱ jānanti:|| ||

'Samaṇadusī'vāyaɱ samaṇapalāpo samaṇakāraṇḍavo' ti.|| ||

Tam enaɱ iti viditvā bahiddhā nāsenti.|| ||

Taɱ kissa hetu?|| ||

Mā aññe bhadrake bhikkhū dūsesī ti.|| ||

Saɱvāsāyaɱ vijānātha, pāpiccho kodhano iti,||
Makkhī thambhī palāsī ca issukī maccharī saṭho||
Sanhavāco janavati, samaṇo viya bhāsati,||
Raho karoti kaṭanaɱ pāpadiṭṭhi anādaro.||
Saɱsappī ca musāvādī, taɱ viditvā yathā kathaɱ?||
Sabbe samaggā hutvāna, abhinibbajjayātha naɱ.||
Kāraṇḍavaɱ niddhamatha, kasambuñ āpakassatha.||
Tato palāpe vāhetha, assamaṇe samaṇamānino||
Niddhamitvāna pāpicche, pāpa-akācāragocare,||
Suddhāsuddhehi saɱvāsaɱ, kappayavho patissatā Tato samaggā nipakā, dukkhass'antaɱ karissathā ti.|| ||

 


Contact:
E-mail
Copyright Statement   Webmaster's Page