Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
VIII. Aṭṭhaka Nipāta
II: Mahā Vagga

Sutta 12

Sīha Senāpati Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


[179]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Tena kho pana samayena sambahulā abhiññātā abhiññātā Licchavī santhāgāre sannisinnā sannipatitā anekapariyāyena Buddhassa vaṇṇaɱ bhāsanti, Dhammassa vaṇṇaɱ bhāsanti, Saŋghassa vaṇṇaɱ bhāsanti.|| ||

[180] 2. Tena kho pana samayena Sīho senāpati Nigaṇṭhasāvako tassaɱ parisāyaɱ nisinno hoti.|| ||

Atha kho Sīhassa senāpatissa etad ahosi:|| ||

'Nissaɱsayaɱ kho so Bhagavā arahaɱ sammāsambuddho bhavissati.|| ||

Tathā h'ime sambahulā abhiññātā abhiññātā Licchavī santhāgāre sannisinnā sannipatitā anekapariyāyena Buddhassa vaṇṇaɱ bhāsanti, Dhammassa vaṇṇaɱ bhāsanti, Saŋghassa vaṇṇaɱ bhāsanti.|| ||

Yan nūnāhaɱ taɱ Bhagavantaɱ dassanāya upasaŋkameyyaɱ arahantaɱ sammāsambuddhan' ti.|| ||

3. Atha kho Sīho senāpati yena Nigaṇṭho Nātaputto ten'upasaŋkami.|| ||

Upasaŋkamitvā Nigaṇṭhaɱ Nātaputtaɱ etad avoca:|| ||

'Icchām ahaɱ bhante, samaṇaɱ Gotamaɱ dassanāya upasaŋkamitun' ti.|| ||

'Kiɱ pana tvaɱ Sīha, kiriyavādo samāno akiriyavādaɱ samaṇaɱ Gotamaɱ dassanāya upasaŋkamissasi?|| ||

Samaṇo hi Sīha, Gotamo akiriyavādo akiriyāya dhammaɱ deseti,||
tena ca sāvake vinetī' ti.|| ||

Atha kho Sīhassa senāpatissa yo ahosi gamiyābhisankhāro Bhagavantaɱ dassanāya,||
so paṭippassambhi.|| ||

4. Dutiyam pi kho sambahulā abhiññātā abhiññātā Licchavī santhāgāre sannisinnā sannipatitā anekapariyāyena Buddhassa vaṇṇaɱ bhāsanti, Dhammassa vaṇṇaɱ bhāsanti, Saŋghassa vaṇṇaɱ bhāsanti.|| ||

Dutiyam pi kho Sīhassa senāpatissa etad ahosi:|| ||

'Nissaɱsayaɱ kho so Bhagavā arahaɱ sammāsambuddho bhavissati.|| ||

Tathā h'ime sambahulā abhiññātā abhiññātā Licchavī santhāgāre sannisinnā sannipatitā anekapariyāyena Buddhassa vaṇṇaɱ bhāsanti, Dhammassa vaṇṇaɱ bhāsanti, Saŋghassa vaṇṇaɱ bhāsanti.|| ||

Yan nūnāhaɱ taɱ Bhagavantaɱ dassanāya upasaŋkameyyaɱ [181] arahantaɱ sammāsambuddhan' ti.|| ||

Atha kho Sīho senāpati yena Nigaṇṭho Nātaputto ten'upasaŋkami.|| ||

Upasaŋkamitvā Nigaṇṭhaɱ Nātaputtaɱ etad avoca:|| ||

'Icchām ahaɱ bhante, samaṇaɱ Gotamaɱ dassanāya upasaŋkamitun' ti.|| ||

'Kiɱ pana tvaɱ Sīha, kiriyavādo samāno akiriyavādaɱ samaṇaɱ Gotamaɱ dassanāya upasaŋkamissasi?|| ||

Samaṇo hi Sīha, Gotamo akiriyavādo akiriyāya dhammaɱ deseti,||
tena ca sāvake vinetī' ti.|| ||

Dutiyam pi kho Sīhassa senāpatissa yo ahosi gamiyābhisankhāro Bhagavantaɱ dassanāya,||
so paṭippassambhi.|| ||

5. Tatiyam pi kho sambahulā abhiññātā abhiññātā Licchavī santhāgāre sannisinnā sannipatitā anekapariyāyena Buddhassa vaṇṇaɱ bhāsanti, Dhammassa vaṇṇaɱ bhāsanti, Saŋghassa vaṇṇaɱ bhāsanti.|| ||

Tatiyam pi kho Sīhassa senāpatissa etad ahosi:|| ||

'Nissaɱsayaɱ kho so Bhagavā arahaɱ sammāsambuddho bhavissati.|| ||

Tathā h'ime sambahulā abhiññātā abhiññātā Licchavī santhāgāre sannisinnā sannipatitā anekapariyāyena Buddhassa vaṇṇaɱ bhāsanti, Dhammassa vaṇṇaɱ bhāsanti, Saŋghassa vaṇṇaɱ bhāsanti.|| ||

Kiɱ hi'me karissanti Nigaṇṭhā apalokitā vā anapalokitā vā,||
yan nūnāhaɱ anapalokitā'va Nigaṇṭhe taɱ Bhagavantaɱ dassanāya upasaŋakameyyaɱ arahantaɱ sammāsambuddhan' ti.|| ||

Atha kho Sīho senāpati pañcamattehi rathasatehi divādivassa Vesāliyā niyyāsi Bhagavantaɱ dassanāya.|| ||

Yāvatikā yānassa bhūmi,||
yānena gantvā yānā paccorohitvā pattiko'va ārāmaɱ pāvisi.|| ||

Atha kho Sīho senāpati yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Sīho senāpati Bhagavantaɱ etad avoca:|| ||

'Sutaɱ me taɱ bhante:|| ||

"Akiriyavādo samaṇo Gotamo||
akiriyāya [182] dhammaɱ deseti,||
tena ca sāvake vinetīti."|| ||

Ye te bhante, evam āhaɱsu:|| ||

Akiriyavādo Samaṇo Gotamo||
akiriyāya dhammaɱ deseti,||
tena ca sāvake vinetī ti.|| ||

Kacci te bhante, vuttavādino?|| ||

Na ca Bhagavantaɱ abhutena abbhācikkhanti,||
dhammassa cānudhammaɱ vyākaronti.|| ||

Na ca koci sahadhammiko vādānuvādo gārayhaɱ ṭhānaɱ āgacchati.|| ||

Anabbhakkhātukāmā hi mayaɱ bhante, Bhagavantan' ti.|| ||

6.1 Atthi Sīha, pariyāyo yena maɱ pariyāyena sammā vadamāno vadeyya:|| ||

Akiriyavādo Samaṇo Gotamo||
akiriyāya dhammaɱ deseti,||
tena ca sāvake vinetī ti.|| ||

6.2. Atthi Sīha, pariyāyo yena maɱ pariyāyena sammā vadamāno vadeyya:|| ||

Kiriyavādo Samaṇo Gotamo||
kiriyāya dhammaɱ deseti,||
tena ca sāvake vinetī ti.|| ||

6.3. Atthi Sīha, pariyāyo yena maɱ pariyāyena sammā vadamāno vadeyya:|| ||

Ucchedavādo Samaṇo Gotamo||
ucchedāya dhammaɱ deseti,||
tena ca sāvake vinetī ti.|| ||

6.4. Atthi Sīha, pariyāyo yena maɱ pariyāyena sammā vadamāno vadeyya:|| ||

Jegucchī Samaṇo Gotamo||
jegucchitāya dhammaɱ deseti,||
tena ca sāvake vinetī ti.|| ||

6.5. Atthi Sīha, pariyāyo yena maɱ pariyāyena sammā vadamāno vadeyya:|| ||

Venayiko Samaṇo Gotamo||
vinayāya dhammaɱ deseti||
tena ca sāvake vinetī ti.|| ||

6.6. Atthi Sīha, pariyāyo yena maɱ pariyāyena sammā vadamāno vadeyya:|| ||

Tapassī Samaṇo Gotamo||
tapassitāya dhammaɱ deseti,||
tena ca sāvake vinetī ti.|| ||

6.7. Atthi Sīha, pariyāyo yena maɱ pariyāyena sammā vadamāno vadeyya:|| ||

Apagabbho Samaṇo Gotamo||
apagabbhatāya dhammaɱ deseti,||
tena ca sāvake vinetī ti.|| ||

6.8. Atthi Sīha, pariyāyo yena maɱ pariyāyena sammā vadamāno vadeyya:|| ||

Assāsako Samaṇo Gotamo||
assāsāya dhammaɱ deseti,||
tena ca sāvake vinetīti.

 


 

7.1. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Akiriyavādo Samaṇo Gotamo||
[183] akiriyāya dhammaɱ deseti,||
tena ca sāvake vinetī ti?|| ||

Ahaɱ hi Sīha, akiriyaɱ vadāmi kāyaduccaritassa||
vacīduccaritassa||
manoduccaritassa,||
anekavihitānaɱ pāpakānaɱ akusalānaɱ dhammānaɱ akiriyaɱ vadāmi.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Akiriyavādo Samaṇo Gotamo||
akiriyāya dhammaɱ deseti,||
tena ca sāvake vinetī ti.|| ||

7.2. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Kiriyavādo Samaṇo Gotamo||
kiriyāya dhammaɱ deseti,||
tena ca sāvake vinetī ti?|| ||

Ahaɱ hi Sīha, kiriyaɱ vadāmi kāyasucaritassa||
vacīsucaritassa||
manosucaritassa,||
anekavihitānaɱ kusalānaɱ dhammānaɱ kiriyaɱ vadāmi.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Kiriyavādo Samaṇo Gotamo||
kiriyāya dhammaɱ deseti,||
tena ca sāvake vinetī ti.|| ||

7.3. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Ucchedavādo Samaṇo Gotamo,||
ucchedāya dhammaɱ deseti,||
tena ca sāvake vinetī ti?|| ||

Ahaɱ hi Sīha, ucchedaɱ vadāmi rāgassa||
dosassa||
mohassa,||
anekavihitānaɱ pāpakānaɱ akusalānaɱ dhammānaɱ ucchedaɱ vadāmi.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Ucchedavādo Samaṇo Gotamo,||
ucchedāya dhammaɱ deseti,||
tena ca sāvake vinetī ti.|| ||

7.4. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Jegucchī Samaṇo Gotamo||
jegucchitāya dhammaɱ deseti,||
tena ca sāvake vinetī ti?|| ||

Ahaɱ hi Sīha, jigucchāmi kāyaduccaritena||
vacīduccaritena||
manoduccaritena,||
anekavihitānaɱ pāpakānaɱ akusalānaɱ dhammānaɱ samāpattiyā jigucchāmi.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Jegucchī Samaṇo Gotamo||
jegucchitāya dhammaɱ deseti,||
tena ca sāvake vinetī ti.|| ||

7.5. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Venayiko Samaṇo Gotamo||
vinayāya dhammaɱ deseti,||
tena ca sāvake vinetī ti?|| ||

Ahaɱ hi Sīha, vinayāya dhammaɱ desemi rāgassa||
dosassa||
mohassa,||
[184] anekavihitānaɱ pāpakānaɱ akusalānaɱ dhammānaɱ vinayāya dhammaɱ desemi.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Venayiko Samaṇo Gotamo||
vinayāya dhammaɱ deseti,||
tena ca sāvake vinetī ti.|| ||

7.6. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Tapassī Samaṇo Gotamo||
tapassitāya dhammaɱ deseti,||
tena ca sāvake vinetī ti?|| ||

Tapanīyāhaɱ Sīha, pāpake akusale dhamme vadāmi.|| ||

Kāyaduccaritaɱ||
vacīduccaritaɱ||
manoduccaritaɱ,||
yassa kho Sīha, tapanīyā pāpakā akusalā dhammā pahīnā ucchinnamūlā tālāvatthukatā anabhāvakatā āyatiɱ anuppādadhammā.|| ||

Taɱ ahaɱ tapassīti vadāmi.|| ||

Tathāgatassa kho Sīha,||
tapanīyā pāpakā akusalā dhammā pahīnā ucchinnamūlā tālāvatthukatā anabhāvakatā āyatiɱ anuppādadhammā.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Tapassī Samaṇo Gotamo||
tapassitāya dhammaɱ deseti,||
tena ca sāvake vinetī ti.|| ||

7.7. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Apagabbho Samaṇo Gotamo||
apagabbhatāya dhammaɱ deseti,||
tena ca sāvake vinetī ti.|| ||

Yassa kho Sīha, āyatiɱ gabbhaseyyā punabbhavābhinibbatti pahīnā,||
ucchinnamūlā tālāvatthukatā anabhāvakatā āyatiɱ anuppādadhammā,||
tamahaɱ apagabbhoti vadāmi.|| ||

Tathāgatassa kho Sīha, āyatiɱ gabbhaseyyā punabbhavābhinibbatti pahīnā ucchinnamūlā tālāvatthukatā anabhāvakatā āyatiɱ anuppādadhammā.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Apagabbho Samaṇo Gotamo||
apagabbhatāya dhammaɱ deseti,||
tena ca sāvake vinetī ti.|| ||

7.8. Katamo ca Sīha, pariyāyo yena maɱ pariyāyena sammā vadamāno vadeyya:|| ||

Assāsako Samaṇo Gotamo||
assāsāya dhammaɱ deseti,||
tena ca sāvake vinetī ti?|| ||

Ahaɱ hi Sīha, [185] assāsako paramena assāsena,||
assāsāya ca dhammaɱ desemi,||
tena ca sāvake vinemi.|| ||

Ayaɱ kho Sīha, pariyāyo yena maɱ pariyāyena sammā vadamāno vadeyya:|| ||

Assāsako Samaṇo Gotamo||
assāsāya dhammaɱ deseti,||
tena ca sāvake vinetī ti.|| ||

8. Evaɱ vutte Sīho senāpati Bhagavantaɱ etad avoca:|| ||

'Abhikkantaɱ bhante, abhikkantaɱ bhante.|| ||

Seyyathā pi bhante, nikkujjitaɱ vā ukkujjeyya,||
paṭicchannaɱ vā vivareyya,||
mūḷhassa vā maggaɱ ācikkheyya,||
andhakāre vā telapajjotaɱ dhāreyya cakkhumanto rūpāni dakkhintī ti.|| ||

Evam eva bhante aneka pariyāyena dhammo pakāsito.|| ||

Esāhaɱ bhante Bhagavantaɱ saraṇaɱ gacchāmi||
dhammaɱ ca||
bhikkhu-saŋghaɱ ca.|| ||

Upāsakaɱ maɱ bhante,|| ||

Bhagavā dhāretu ajja-t-agge pāṇupetaɱ saraṇaɱ gatan' ti.|| ||

'Anuviccakāraɱ kho Sīha, karohi,||
anuviccakāro tumhādisānaɱ ñātamanussānaɱ sādhu hotī' ti.|| ||

'Iminā p'ahaɱ bhante Bhagavato bhīyyosomattāya attamano abhiraddho,||
yaɱ maɱ Bhagavā evam āha:|| ||

"Anuviccakāraɱ kho Sīha, karohi,||
anuviccakāro tumhādisānaɱ ñātamanussānaɱ sādhu hotī" ti.|| ||

Maɱ hi bhante, aññatitthiyā sāvakaɱ labhitvā kevalakappaɱ Vesāliɱ paṭākaɱ parihareyyuɱ:|| ||

"Sīho amhākaɱ senāpati sāvakattaɱ upagato" ti.|| ||

Atha ca pana maɱ Bhagavā evam āha:|| ||

"Anuviccakāraɱ kho Sīha, karohi,||
anuviccakāro tumhādisānaɱ ñātamanussānaɱ sādhu hotī" ti.|| ||

Esāhaɱ bhante, dutiyam pi Bhagavantaɱ saraṇaɱ gacchāmi||
dhammañ ca||
bhikkhu-saŋghañ ca,||
upāsakaɱ maɱ bhante,||
Bhagavā dhāretu ajjatagge pāṇupetaɱ saraṇaɱ gatan' ti.|| ||

'Dīgharattaɱ kho te Sīha,||
Nigaṇṭhānāɱ opānabhūtaɱ kulaɱ,||
yena n'esaɱ upagatānaɱ piṇḍakaɱ dātabbaɱ maññeyyāsī' ti.|| ||

'Iminā p'ahaɱ bhante,||
Bhagavato bhiyyosomattāya attamano abhiraddho,||
yaɱ maɱ Bhagavā evam āha:|| ||

"Dīgharattaɱ kho te Sīha,||
Nigaṇṭhānaɱ opānabhūtaɱ kulaɱ,||
yena n'esaɱ upagatānaɱ piṇḍakaɱ dātabbaɱ maññeyyāsī" ti.|| ||

Sutaɱ me taɱ bhante,||
Samaṇo Gotamo evam āha:|| ||

[186] "Mayham eva dānaɱ dātabbaɱ,||
na aññesaɱ dānaɱ dātabbaɱ,||
mayham eva sāvakānaɱ dānaɱ dātabbaɱ,||
na aññesaɱ sāvakānaɱ dānaɱ dātabbaɱ,||
mayham eva dinnaɱ mahapphalaɱ,||
na aññesaɱ dinnaɱ mahapphalaɱ,||
mayham eva sāvakānaɱ dinnaɱ mahapphalaɱ||
na aññesaɱ sāvakānaɱ dinnaɱ mahapphalan" ti.|| ||

Atha ca pana maɱ Bhagavā Nigaṇṭhesu pi dāne samādapeti.|| ||

Api ca bhante, mayam ettha kālaɱ jānissāma.|| ||

Esāhaɱ bhante tatiyam pi Bhagavantaɱ saraṇaɱ gacchāmi,||
Dhammañ ca||
bhikkhu-saŋghañ ca||
upāsakaɱ maɱ bhante,||
Bhagavā dhāretu ajjatagge pāṇupetaɱ saraṇaɱ gatan' ti.|| ||

9. Atha kho Bhagavā Sīhassa senāpatissa ānupubbīkathaɱ kathesi.|| ||

Seyyathīdaɱ: - dāna kathaɱ||
sīla kathaɱ||
sagga kathaɱ||
kāmānaɱ ādīnavaɱ okāraɱ saŋkilesaɱ nekkhamme ca ānisaɱsaɱ pakāsesi.|| ||

Yadā Bhagavā aññāsi Sīhaɱ senāpatiɱ kallacittaɱ muducittaɱ vinīvaraṇacittaɱ udaggacittaɱ pasannacittaɱ,||
atha yā buddhānaɱ sāmukkaɱsikā dhammadesanā, taɱ pakāsesi:|| ||

Dukkhaɱ||
Samudayaɱ||
Nirodhaɱ||
Maggaɱ.|| ||

Seyyathā pi nāma suddhaɱ vatthaɱ apagatakāḷakaɱ samma-d-eva rajanaɱ patigaṇheyya,||
evam eva Sīhassa senāpatissa tasmiɱ yeva āsane virajaɱ vītamalaɱ dhammacakkhuɱ udapādi:|| ||

'Yaɱ kiñci samudayadhammaɱ||
sabbantaɱ nirodhadhammman' ti.|| ||

10. Atha kho Sīho senāpati diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaŋkatho vesārajjappatto aparappaccayo Satthu sāsane Bhagavantaɱ etad avoca:|| ||

'Adhivāsetu me bhante, Bhagavā [187] svātanāya bhattaɱ saddhiɱ bhikkhusaŋghenā' ti.|| ||

Adhivāsesi Bhagavā tuṇhībhāvena.|| ||

Atha kho Sīho senāpati Bhagavato adhivāsanaɱ viditvā uṭṭhāy āsanā Bhagavantaɱ abhivādetvā padakkhiṇaɱ katvā pakkāmi.|| ||

Atha kho Sīho senāpati aññataraɱ purisaɱ āmantesi:|| ||

'Gaccha tvaɱ ambho purisa,||
pavattamaɱsaɱ jānāhī' ti.|| ||

Atha kho Sīho senāpati tassā rattiyā accayena sake nivesane paṇītaɱ khādanīyaɱ bhojanīyaɱ paṭiyādāpetvā Bhagavato kālaɱ ārocāpesi.|| ||

'Kālo bhante, Sīhassa senāpatissa nivesane niṭṭhitaɱ bhattan' ti.|| ||

11. Atha kho Bhagavā pubbaṇhasamayaɱ nivāsetvā pattacīvaram ādāya yena Sīhassa senāpatissa nivesanaɱ ten'upasaŋkami,||
upasaŋkamitvā paññatte āsane nisīdi saddhiɱ bhikkhu-saŋghena.|| ||

Tena kho pana samayena sambahulā Nigaṇṭhā Vesāliyaɱ rathikāya rathikaɱ siŋghāṭakena siŋghāṭakaɱ bāhā paggayha kandanti:|| ||

'Ajja Sīheno senāpatinā thullaɱ pasuɱ vadhitvā samaṇassa Gotamassa bhattaɱ kataɱ.|| ||

Taɱ Samaṇo Gotamo jānaɱ uddissa kaṭaɱ maɱsaɱ paribhuñjati paṭicca kamman' ti.|| ||

Atha kho aññataro puriso yena Sīho senāpati ten'upasaŋkami,||
upasaŋkamitvā Sīhassa senāpatissa upakaṇṇake ārocesi.|| ||

'Yagegha bhante, jāneyyāsi:||
ete sambahulā Nigaṇṭhā Vesāliyaɱ rathikāya rathikaɱ siŋghāṭakena siŋghāṭakaɱ bāhā paggayha kandanti.|| ||

Ajja Sīhena senāpatinā thullaɱ pasuɱ vadhitvā samaṇassa Gotamassa bhattaɱ kataɱ,||
taɱ Samaṇo Gotamo jānaɱ uddissa kaṭaɱ maɱsaɱ pari- [188] bhuñjati paṭicca kamman' ti.|| ||

'Alaɱ ayyo, dīgharattam hi te āyasmanto avaṇṇakāmā Buddhassa,||
avaṇṇakāmā Dhammassa,||
avaṇṇakāmā Saŋghassa||
na ca pana te āyasmanto jīranti taɱ Bhagavantaɱ asatā tucchā musā abhūtena abbhācikkhantā,||
na ca mayaɱ jīvitahetū pi sañcicca pāṇaɱ jīvitā voropeyyāmā' ti.|| ||

12. Atha kho Sīho senāpati Buddhapamukhaɱ bhikkhu-saŋghaɱ paṇītena khādanīyena bhojanīyena sahatthā santappesi sampavāresi.|| ||

Atha kho Sīho senāpati Bhagavantaɱ bhuttāviɱ onītapattapāṇīɱ eka-m-antaɱ nisīdi.|| ||

Eka-m-antaɱ nisinnaɱ kho Sīhaɱ senāpatiɱ Bhagavā dhammiyā kathāya sandassetvā samādapekvā samuttejetvā sampahaɱsetvā uṭṭhāy āsanā pakkāmī ti.|| ||

 


Contact:
E-mail
Copyright Statement   Webmaster's Page