Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
VIII. Aṭṭhaka Nipāta
II: Mahā Vagga

Sutta 14

Khaluŋka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Aṭṭha ca bhikkhave assakhaluŋke desissāmi aṭṭha ca assadose,||
aṭṭha ca purisakhaḷuŋke aṭṭha ca purisadose,||
taɱ suṇātha sādhukaɱ manasi karotha bhāsissāmī ti.|| ||

'Evaɱ bhante' ti kho te bhikkhu Bhagavato paccassosuɱ.|| ||

Bhagavā etad avoca:|| ||

3. Katame ca bhikkhave, aṭṭha assakhaḷuŋkā aṭṭha ca assadosā?|| ||

Idha, bhikkhave, ekacco assakhaḷuŋko 'pehī' ti vutto viddho samāno codito sārathinā,||
pacchato paṭisakkati,||
[191] piṭṭhito rathaɱ paṭivatteti.|| ||

Evarūpo pi bhikkhave idh'ekacco assakhaḷuŋko hoti.|| ||

Ayaɱ bhikkhave, paṭhamo assadoso.|| ||

4. Puna ca paraɱ bhikkhave,||
idh'ekacco assakhaḷuŋko 'pehi' ti vutto viddho samāno codito sārathinā,||
pacchā laɱghati,||
kubbaraɱ hanti.|| ||

Tidaṇḍaɱ bhañjati.|| ||

Evarūpo pi bhikkhave,||
idh'ekacco assakhaluḍko hoti.|| ||

Ayaɱ bhikkhave, dutiyo assadoso.|| ||

5. Puna ca paraɱ bhikkhave,||
idh'ekacco assakhaḷuŋko 'pehi' ti vutto viddho samāno codito sārathinā,||
rathisāya satthiɱ ussajjitvā,||
rathisaɱ yeva ajjhomaddati.|| ||

Evarūpo pi bhikkhave, idh'ekacco assakhaḷuŋko hoti.|| ||

Ayaɱ bhikkhave, tatiyo assadoso.|| ||

6. Puna ca paraɱ bhikkhave,||
idh'ekacco assakhaḷuŋko 'pehī' ti vutto viddho samāno codito sārathinā,||
ummaggaɱ gaṇhāti,||
ubbaṭumaɱ rathaɱ karoti.|| ||

Evarūpo pi bhikkhave, idh'ekacco assakhaḷuŋko hoti.|| ||

Ayaɱ bhikkhave, catuttho assadoso.|| ||

7. Puna ca paraɱ bhikkhave,||
idh'ekacco assakhaḷuŋko 'pehī' ti vutto viddho samāno codito sārathinā,||
laŋghati purimaɱ kāyaɱ,||
paggaṇhāti purime pāde.|| ||

Evarūpo pi bhikkhave, idh'ekacco assakhaḷuŋko hoti.|| ||

Ayaɱ bhikkhave, pañcamo assadoso.|| ||

8. Puna ca paraɱ bhikkhave,||
idh'ekacco assakhaḷuŋko 'pehi' ti vutto viddho samāno codito sārathinā,||
anādiyitvā sārathīɱ anādiyitvā patodaɱ dantehi mukhādhānaɱ [192] viddhaɱsitvā,||
yenakāmaɱ pakkamati.|| ||

Evarūpo pi bhikkhave, idh'ekacco assakhaḷuŋko hoti.|| ||

Ayaɱ bhikkhave, chaṭṭho assadoso.|| ||

9. Puna ca paraɱ bhikkhave idh'ekacco assakhaḷuŋko 'pehi' ti vutto viddho samāno codito sārathinā,||
n'eva abhikkamati,||
no paṭikkamati,||
tatth'eva khīlaṭṭhāyī ṭhito hoti.|| ||

Evarūpo pi bhikkhave, idh'ekacco assakhaḷuŋko hoti.|| ||

Ayaɱ bhikkhave, sattamo assadoso.|| ||

10. Puna ca paraɱ bhikkhave idh'ekacco assakhaḷuŋko 'pehi' ti vutto viddho samāno codito sārathinā,||
purime ca pāde saɱharitvā pacchime ca pāde saɱharitvā tatth'eva cattāro pāde abhinisīdati.|| ||

Evarūpo pi bhikkhave, idh'ekacco assakhaḷuŋko hoti.|| ||

Ayaɱ bhikkhave, aṭṭhamo assadoso.|| ||

Ime kho bhikkhave,||
aṭṭha assakhaḷuŋkā aṭṭha ca assadosā.|| ||

 


 

11. Katame ca bhikkhave aṭṭha ca purisakhaḷuŋkā,||
aṭṭha ca purisadosā?|| ||

Idha, bhikkhave, bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno:|| ||

'Na sarāmī na sarāmī' ti asatiyā'va nibbeṭheti.|| ||

Seyyathā pi so bhikkhave,||
assakhaḷuŋko 'pehī' ti vutto viddho samāno codito sārathinā,||
pacchato paṭisakkati,||
piṭṭhito rathaɱ paṭivatteti.|| ||

Tathūpamāhaɱ bhikkhave, imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, paṭhamo purisadoso.|| ||

12. Puna ca paraɱ bhikkhave bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno [193] codakaɱ yeva paṭippharati:|| ||

'Kiɱ nu kho tuyhaɱ bālassa akhyattassa bhaṇitena,||
tvam pi nāma bhaṇitabbaɱ maññasī' ti?|| ||

Seyyathā pi so bhikkhave assakhaḷuŋko pehīti vutto viddho samāno codito sārathinā,||
pacchā laḷghi,||
pati kubbaraɱ hanti,||
tidaṇḍaɱ bhañjati.|| ||

Tathūpamāhaɱ bhikkhave imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, dutiyo purisadoso.|| ||

13. Puna ca paraɱ bhikkhave,||
bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno codakass'eva paccāropeti:|| ||

'Tvam pi kho'si itthannāmaɱ āpattiɱ āpanno.|| ||

Tvaɱ tāva paṭhamaɱ paṭikarohī' ti.|| ||

Seyyathā pi so bhikkhave,||
assakhaḷuŋko 'pehī' ti vutto viddho samāno codito sārathinā||
rathisāya satthiɱ ussajjitvā rathisaɱ yeva ajjhomaddati.|| ||

Tathūpamāhaɱ bhikkhave, imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, tatiyo purisadoso.|| ||

14. Puna ca paraɱ bhikkhave,||
bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno aññen'aññaɱ paṭicarati,||
bahiddhā kathaɱ apanāmeti,||
kopañ ca dosañ ca appaccayaɱ ca pātukaroti.|| ||

Seyyathā pi so bhikkhave,||
assakhaḷuŋko pehīti vutto viddho samāno codito sārathinā,||
ummaggaɱ gaṇhāti,||
ubbaṭumaɱ rathaɱ karoti.|| ||

Tathūpamāhaɱ bhikkhave, imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, catuttho purisadoso.|| ||

15. Puna ca paraɱ bhikkhave,||
bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno saŋghamajjhe bāhāvikkhepaɱ bhaṇati.|| ||

Seyyathā pi so [194] bhikkhave assakhaḷuŋko 'pehī' ti vutto viddho samāno codito sārathinā,||
laŋghati purimaɱ kāyaɱ,||
paggaṇhāti purime pāde.|| ||

Tathūpamāhaɱ bhikkhave, imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, pañcamo purisadoso.|| ||

16. Puna ca paraɱ bhikkhave,||
bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno anādiyitvā saŋghaɱ anādiyitvā codakaɱ sāpattiko va yenakāmaɱ pakkamati.|| ||

Seyyathā pi so bhikkhave, assakhaḷuŋko 'pehī' ti vutto viddho samāno codito sārathinā,||
anādiyitvā sārathiɱ
anādiyitvā patodaɱ dantehi mukhādhānaɱ vidaɱsitvā,||
yenakāmaɱ pakkamati.|| ||

Tathūpamāhaɱ bhikkhave, imaɱ puggalaɱ vadāmi.|| ||

Eva rūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, chaṭṭho purisadoso.|| ||

17. Puna ca paraɱ bhikkhave bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno:|| ||

'Nevāhaɱ āpanno'mhi,||
na panāhaɱ āpanno'mhī' ti.|| ||

So tuṇhibhāvena saŋghaɱ viheseti.|| ||

Seyyathā pi so bhikkhave,||
assakhaḷuŋko 'pehī' ti vutto viddho samāno codito sārathinā,||
n'eva abhikkamati,||
no paṭikkamati,||
tatth'eva khīlaṭṭhāyī ṭhito hoti.|| ||

Tathūpamāhaɱ bhikkhave, imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, sattamo purisadoso.|| ||

18. Puna ca paraɱ bhikkhave bhikkhū bhikkhuɱ āpattiyā codenti.|| ||

So bhikkhu bhikkhūhi āpattiyā codiyamāno evam [195] āha:|| ||

'Kiɱ nu kho tumhe āyasmanto atibāḷhaɱ mayi vyāvaṭā yava,||
idānāhaɱ sikkhaɱ paccakkhāya hīnāyāvattissāmī' ti?|| ||

So sikkhaɱ paccakkhāya hīnāyāvattitvā evam āha:|| ||

'Idāni kho tumhe āyasmanto attamanā hothā' ti.|| ||

Seyyathā pi so bhikkhave assakhaḷuŋko 'pehī' ti vutto viddho samāno codito sārathinā purime ca pāde saɱharitvā pacchime ca pāde saɱharitvā tatth'eva cattāro pāde abhinisīdati.|| ||

Tathūpamāhaɱ bhikkhave, imaɱ puggalaɱ vadāmi.|| ||

Evarūpo pi bhikkhave, idh'ekacco purisakhaḷuŋko hoti.|| ||

Ayaɱ bhikkhave, aṭṭhamo purisadoso.|| ||

Ime kho bhikkhave, aṭṭha purisakhaḷuŋkā aṭṭha ca purisadosā ti.|| ||

 


Contact:
E-mail
Copyright Statement   Webmaster's Page