Aṅguttara Nikāya


[Home]  [Sutta Indexes]  [Glossology]  [Site Sub-Sections]


 

Aṅguttara Nikāya
VIII. Aṭṭhaka Nipāta
II: Mahā Vagga

Suttas 17-18

Adapted from the 1995 edition of the digital version of the Sri Lanka Buddha Jayanti Tripitaka Series.

 


[196]

Sutta 17

Purisa-Bandhana Suttaṃ

[17.1][pts][olds][bodh] Evaṃ me sutaṃ:|| ||

Ekaṃ samayaṃ Bhagavā Sāvatthiyaṃ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

2. Aṭṭhahi bhikkhave ākārehi itthi purisaṃ bandhati.|| ||

Katamehi aṭṭhahi?

Rūpena bhikkhave itthi purisaṃ bandhati,||
hasitena bhikkhave itthi purisaṃ bandhati,||
bhaṇitena bhikkhave itthi purisaṃ bandhati,||
gītena bhikkhave itthi purisaṃ [197] bandhati,||
roṇṇena bhikkhave itthi purisaṃ bandhati,||
ākappena bhikkhave itthi purisaṃ bandhati,||
vana-bhaṅgena bhikkhave itthi purisaṃ bandhati,||
phassena bhikkhave itthi purisaṃ bandhati.|| ||

Imehi kho bhikkhave aṭṭhah'ākārehi itthi purisaṃ bandhati.|| ||

Tehi bhikkhave sattā subaddhā yeva pāsena baddhā ti.|| ||

 

§

 

Sutta 18

Itthi-Bandhana Suttaṃ

[18.1][pts][olds][bodh] Evaṃ me sutaṃ:|| ||

Ekaṃ samayaṃ Bhagavā Sāvatthiyaṃ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti te bhikkhū Bhagavato paccassosuṃ.|| ||

Bhagavā etad avoca:|| ||

2. Aṭṭhahi bhikkhave ākārehi puriso itthiṃ bandhati.|| ||

Katamehi aṭṭhahi?|| ||

Rūpena bhikkhave puriso itthiṃ bandhati,||
hasitena bhikkhave puriso itthiṃ bandhati,||
bhaṇitena bhikkhave puriso itthiṃ bandhati,||
gītena bhikkhave puriso itthiṃ bandhati,||
ruṇṇena- bhikkhave puriso itthiṃ bandhati,||
ākappena bhikkhave puriso itthiṃ bandhati,||
vana-bhaṅgena bhikkhave, puriso itthiṃ bandhati,||
phassena bhikkhave puriso itthiṃ bandhati.|| ||

Imehi kho bhikkhave aṭṭhahi ākārehi puriso itthiṃ bandhati.|| ||

Tehi bhikkhave sattā subaddhā yeva phassena baddhā ti.|| ||

 


Contact:
E-mail
Copyright Statement