Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
VIII. Aṭṭhaka Nipāta
III: Gahapati-Vagga

Sutta 22

Hatthigāmaka Ugga Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


[212]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Vajjīsu viharati Hatthigāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

Bhadante ti te bhikkhū Bhagavato paccassosuɱ.|| ||

Bhagavā etad avoca:|| ||

2. 'Aṭṭhahi bhikkhave, acchariyehi abbhutehi dhammehi samannāgataɱ Uggaɱ gahapatiɱ Hatthigāmakaɱ dhārethā' ti.|| ||

Idam avoca Bhagavā.|| ||

Idaɱ vatvā Sugato uṭṭhāy āsanā vihāraɱ pāvisi.|| ||

3. Atha kho aññataro bhikkhu pubbaṇhasamayaɱ nivāsetvā pattacīvaramādāya yena Uggassa gahapatino Hatthigāmakassa nivesanaɱ ten'upasaŋkami.|| ||

Upasaŋkamitvā paññatte āsane nisīdi.|| ||

Atha kho Uggo gahapati Hatthigāmako yena so bhikkhu ten'upasaŋkami.|| ||

Upasaŋkamitvā taɱ bhikkhuɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Uggaɱ gahapatiɱ Hatthigāmakaɱ so bhikkhu etad avoca:|| ||

[213] 4. Aṭṭhahi kho tvaɱ gahapati,||
acchariyehi abbhutehi dhammehi samannāgato Bhagavatā vyākato.|| ||

'Katame te gahapati, aṭṭha acchariyā abbhutā dhammā yehi tvaɱ samannāgato Bhagavatā vyākato' ti?|| ||

'Na kho ahaɱ bhante, jānāmi,||
katamehipahaɱ aṭṭhahi acchariyehi abbhutehi dhammehi samannāgato Bhagavatā vyākato.|| ||

Apica bhante, ye me aṭṭha acchariyā abbhutā dhammā saɱvijjanti te suṇāhi||
sādhukaɱ||
manasikarohi||
bhāsissāmī ti.|| ||

'Evaɱ gahapatī' ti so bhikkhu Uggassa gahapatino Hatthigāmakassa paccassosi.|| ||

Uggo gahapati Hatthigāmako etad avoca:|| ||

5. Yadāhaɱ bhante, Nāgavane paricārento Bhagavantaɱ paṭhamaɱ durato'va addasaɱ.|| ||

Saha dassanen'eva me bhante, Bhagavato cittaɱ pasīdi surāmado ca pahiyyi.|| ||

Ayaɱ kho me bhante, paṭhamo acchariyo abbhuto dhammo saɱvijjati.|| ||

So kho ahaɱ bhante, pasannacitto Bhagavantaɱ payirupāsiɱ.|| ||

Tassa me Bhagavā ānupubbīkathaɱ kathesi,||
seyyathīdaɱ:||
dānakathaɱ||
sīlakathaɱ||
saggakathaɱ||
kāmānaɱ ādīnavaɱ okāraɱ saŋkilesaɱ nekkhamme ānisaɱsaɱ pakāsesi.|| ||

6. Yadā maɱ Bhagavā aññāsi kallacittaɱ muducittaɱ vinīvaraṇacittaɱ udaggacittaɱ pasannacittaɱ,||
atha yā buddhānaɱ sāmukkaɱsikā dhammadesanā,||
taɱ pakāsesi:||
dukkhaɱ||
samudayaɱ||
nirodhaɱ||
maggaɱ.|| ||

Seyyathā pi nāma suddhaɱ vatthaɱ apagatakāḷakaɱ samma-d-eva rajanaɱ patigaṇheyya,||
evam eva kho me tasmiɱ yeva āsane virajaɱ vītamalaɱ dhammacakkhuɱ udapādi,||
'yaɱ kiñci samudayadhammaɱ||
sabbaɱ taɱ nirodhadhamman' ti. So kho ahaɱ bhante, diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaɱkatho vesārajjappatto aparappaccayo Satthu sāsane tatth' [214] eva Buddhaɱ ca dhammaɱ ca saŋghaɱ ca saraṇaɱ agamāsiɱ.|| ||

Brahmacariyapañcamāni ca sikkhāpadāni samādiyiɱ.|| ||

Ayaɱ kho me bhante, dutiyo acchariyo abbhuto dhammo saɱvijjati.|| ||

7. Tassa mayhaɱ bhante,||
catasso komāriyo pajāpatiyo ahesuɱ.|| ||

Atha khvāhaɱ bhante,||
yena tā pajāpatiyo ten'upasaŋkamiɱ.|| ||

Upasaŋkamitvā tā pajāpatiyo etad avocaɱ:|| ||

'Mayā kho bhaginiyo brahmacariyapañcamāni sikkhāpadāni samādinnāni.|| ||

Yā icchati sā idh'eva bhoge ca bhuñjatu!|| ||

Puññāni ca karotu!|| ||

Sakāni vā ñātikulāni gacchatu!|| ||

Hoti vā pana purisādhippāyā,||
kassa vo dammī' ti?|| ||

Evaɱ vutte sā bhante jeṭṭhā pajāpatī maɱ etad avoca:|| ||

'Itthaɱnāmassa maɱ ayya putta purisassa dehī' ti.|| ||

Atha khvāhaɱ bhante,||
taɱ purisaɱ pakkosāpetvā vāmena hatthena pajāpatiɱ gahetvā dakkhiṇena hatthena bhiŋkāraɱ gahetvā tassa purisassa oṇojesiɱ.|| ||

Komāriɱ kho panāhaɱ bhante,||
dāraɱ pariccajanto nābhijānāmi cittassa aññathattaɱ.|| ||

Ayaɱ kho me bhante,||
tatiyo acchariyo dhammo saɱvijjati.|| ||

8. Saɱvijjanti kho pana me bhante, kule bhogā||
te ca kho appaṭivibhattā sīlavantehi kalyāṇadhammehi.|| ||

Ayaɱ kho me bhante,||
catuttho acchariyo abbhuto dhammo saɱvijjati.|| ||

[215] 9. Yaɱ kho pana ahaɱ bhante,||
bhikkhuɱ payirupāsāmi,||
sakkaccaɱ yeva payirupāsāmi no asakkaccaɱ.|| ||

So ce me bhante, āyasmā dhammaɱ deseti,||
sakkaccaɱ yeva suṇāmi,||
no asakkaccaɱ.|| ||

No ce me so āyasmā dhammaɱ deseti,||
aham assa dhammaɱ desemi.|| ||

Ayaɱ kho me bhante, pañcamo acchariyo abbhuto dhammo saɱvijjati.|| ||

10. Anacchariyaɱ kho pana me bhante,||
saŋghe nimantite devatā upasaŋkamitvā ārocenti:|| ||

'Asuko gahapati, bhikkhu ubhato-bhāga-vimutto,||
asuko paññāvimutto,||
asuko kāyasakkhī,||
asuko diṭṭhappatto asuko saddhāvimutto,||
asuko saddhānusārī,||
asuko dhammānusārī,||
asuko sīlavā kalyāṇadhammo,||
asuko dussīlo pāpadhammo' ti.|| ||

Saɱghaɱ kho panāhaɱ bhante,||
parivisanto nābhijānāmi.|| ||

Evaɱ cittaɱ uppādetā:|| ||

'Imassa vā thokaɱ demi imassa vā bahukan' ti.|| ||

Atha khvāhaɱ bhante, samacitto'va demi.|| ||

Ayaɱ kho me bhante, chaṭṭho acchariyo abbhuto dhammo saɱvijjati.|| ||

11. Acchariyaɱ kho pana me bhante,||
devatā upasaŋkamitvā ārocenti:|| ||

'Svākkhāto gahapati Bhagavatā dhammo' ti.|| ||

Evaɱ vutte ahaɱ bhante,||
tā devatā evaɱ vadāmi:|| ||

'Vadeyyātha vā evaɱ kho tumhe devatā||
no vā vadeyyātha,||
atha kho svākkhāto Bhagavatā dhammo' ti.|| ||

Na kho panāhaɱ bhante, abhijānāmi tato nidānaɱ cittassa uṇṇatiɱ:|| ||

'Maɱ vā devatā upasaŋkamanti.|| ||

Ahaɱ vā devatāhi sallapāmī' ti.|| ||

Ayaɱ kho me bhante, sattamo acchariyo abbhuto dhammo saɱvijjati.|| ||

[216] 12. Sace kho panāhaɱ bhante, Bhagavato paṭhamataraɱ kālaɱ kareyyaɱ,||
anacchariyaɱ kho pan'etaɱ,||
yaɱ maɱ Bhagavā evaɱ vyākareyya:|| ||

'N'atthi taɱ saɱyojanaɱ,||
yena saɱyojanena saɱyutto Uggo gahapati Hatthigāmako puna imaɱ lokaɱ āgaccheyyā'ti.|| ||

Ayaɱ kho me bhante, aṭṭhamo acchariyo abbhuto dhammo saɱvijjati.|| ||

Ime kho bhante, aṭṭha acchariyā abbhutā dhammā saɱvijjanti.|| ||

No ca kho ahaɱ jānāmi,||
katamehipahaɱ aṭṭhahi acchariyehi abbhutehi dhammehi samannāgato Bhagavatā vyākato ti.|| ||

13. Atha kho so bhikkhu Uggassa gahapatino Hatthigāmakassa nivesane piṇḍapātaɱ gahetvā uṭṭhāy āsanā pakkāmi.|| ||

Atha kho so bhikkhu pacchābhattaɱ piṇḍapāta paṭikkanto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho so bhikkhu yāvatako ahosi Uggena gahapatinā Hatthigāmakena saddhiɱ kathāsallāpo,
taɱ sabbaɱ Bhagavato ārocesi.|| ||

14. Sādhu sādhu bhikkhu,||
yathā taɱ Uggo gahapati Hatthigāmako sammā vyākaramāno vyākareyya,||
imeh'eva kho bhikkhu, aṭṭhahi acchariyehi abbhutehi dhammehi samannāgato Uggo gahapati Hatthigāmako mayā vyākato.|| ||

Imehi ca pana bhikkhu aṭṭhahi acchariyehi abbhutehi dhammehi samannāgataɱ Uggaɱ gahapatiɱ Hatthigāmakaɱ dhārethā ti.|| ||

 


Contact:
E-mail
Copyright Statement   Webmaster's Page