Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
VIII. Aṭṭhaka Nipāta
IV. Dāna Vagga

Sutta 39

Puññābhisanda Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

2. Aṭṭh'ime bhikkhave,||
puññābhisandā kusalābhisandā sukhassāhārā sovaggikā sukhavipākā saggasaɱvattanikā iṭṭhāya kantāya manāpāya hitāya sukhāya saɱvattanti.|| ||

Katame aṭṭha?|| ||

1. Idha, bhikkhave, ariyasāvako Buddhaɱ saraṇaɱ gato hoti.|| ||

Ayaɱ bhikkhave, paṭhamo puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

2. Puna ca paraɱ bhikkhave, ariyasāvako dhammaɱ saraṇaɱ gato hoti.|| ||

Ayaɱ bhikkhave, dutiyo puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

3. Puna ca paraɱ bhikkhave, ariyasāvako saɱghaɱ saraṇaɱ gato hoti.|| ||

Ayaɱ bhikkhave, tatiyo puññābhisando kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

4. Pañcimāni [246] bhikkhave, dānāni mahādānāni aggaññāni rattaññāni vaɱsaññāni porāṇāni asaŋkiṇṇāni asaŋkiṇṇapubbāni na saŋkīyanti na saŋkīyissanti appatikuṭṭhāni samaṇehi brāhmaṇehi viññūhi.|| ||

Katamāni pañca?|| ||

Idha, bhikkhave,, ariyasāvako pāṇātipātaɱ pahāya pāṇātipātā paṭivirato hoti.|| ||

Pāṇātipātā paṭivirato bhikkhave,||
ariyasāvako aparimāṇānaɱ sattānaɱ abhayaɱ deti,||
averaɱ deti,||
avyāpajjhaɱ deti.|| ||

Aparimāṇānaɱ sattānaɱ abhayaɱ datvā averaɱ datvā avyāpajjhaɱ datvā aparimāṇassa abhayassa averassa akhyāpajjhassa bhāgī hoti.|| ||

Imaɱ bhikkhave, paṭhamaɱ dānaɱ mahādānaɱ,||
aggaññaɱ rattaññaɱ vaɱsaññaɱ porāṇaɱ asaŋkiṇṇaɱ asaŋkiṇṇapubbaɱ na saŋkīyati na saŋkīyissati appatikuṭṭhaɱ samaṇehi brāhmaṇehi viññūhi.|| ||

Ayaɱ bhikkhave catuttho puññābhisāndo kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

5. Idha, bhikkhave,, ariyasāvako adinnādānaɱ pahāya adinnādānā paṭivirato hoti.|| ||

Adinnādānā paṭivirato bhikkhave,||
ariyasāvako aparimāṇānaɱ sattānaɱ abhayaɱ deti,||
averaɱ deti,||
avyāpajjhaɱ deti.|| ||

Aparimāṇānaɱ sattānaɱ abhayaɱ datvā averaɱ datvā avyāpajjhaɱ datvā aparimāṇassa abhayassa averassa akhyāpajjhassa bhāgī hoti.|| ||

Imaɱ bhikkhave, dutiyaɱ dānaɱ mahādānaɱ,||
aggaññaɱ rattaññaɱ vaɱsaññaɱ porāṇaɱ asaŋkiṇṇaɱ asaŋkiṇṇapubbaɱ na saŋkīyati na saŋkīyissati appatikuṭṭhaɱ samaṇehi brāhmaṇehi viññūhi.|| ||

Ayaɱ bhikkhave pañcamo puññābhisāndo kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

6. Idha, bhikkhave,, ariyasāvako kāmesu micchācāraɱ pahāya kāmesu micchācārā paṭivirato hoti.|| ||

Kāmesu micchācārā paṭivirato bhikkhave,||
ariyasāvako aparimāṇānaɱ sattānaɱ abhayaɱ deti,||
averaɱ deti,||
avyāpajjhaɱdeti.|| ||

Aparimāṇānaɱ sattānaɱ abhayaɱ datvā averaɱ datvā akhyāpajjhaɱ datvā aparimāṇassa abhayassa averassa akhyāpajjhassa bhāgī hoti.|| ||

Imaɱ bhikkhave, tatiyaɱ dānaɱ mahādānaɱ,||
aggaññaɱ rattaññaɱ vaɱsaññaɱ porāṇaɱ asaŋkiṇṇaɱ asaŋkiṇṇapubbaɱ na saŋkīyati na saŋkīyissati appatikuṭṭhaɱ samaṇehi brāhmaṇehi viññūhi.|| ||

Ayaɱ bhikkhave chaṭṭhamo puññābhisāndo kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

7. Idha, bhikkhave,, ariyasāvako musā-vādaɱ pahāya musā-vādā paṭivirato hoti.|| ||

Musāvādā paṭivirato bhikkhave,||
ariyasāvako aparimāṇānaɱ sattānaɱ abhayaɱ deti,||
averaɱ deti,||
avyāpajjhaɱdeti.|| ||

Aparimāṇānaɱ sattānaɱ abhayaɱ datvā averaɱ datvā akhyāpajjhaɱ datvā aparimāṇassa abhayassa averassa akhyāpajjhassa bhāgī hoti.|| ||

Imaɱ bhikkhave, catutthaɱ dānaɱ mahādānaɱ,||
aggaññaɱ rattaññaɱ vaɱsaññaɱ porāṇaɱ asaŋkiṇṇaɱ asaŋkiṇṇapubbaɱ na saŋkīyati na saŋkīyissati appatikuṭṭhaɱ samaṇehi brāhmaṇehi viññūhi.|| ||

Ayaɱ bhikkhave sattamo puññābhisāndo kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

8. Idha, bhikkhave,, ariyasāvako surāmerayamajjapamādaṭṭhānaɱ pahāya surāmerayamajjapamādaṭṭhānā paṭivirato hoti.|| ||

Kāmesu micchācārā paṭivirato bhikkhave,||
ariyasāvako aparimāṇānaɱ sattānaɱ abhayaɱ deti,||
averaɱ deti,||
avyāpajjhaɱdeti.|| ||

Aparimāṇānaɱ sattānaɱ abhayaɱ datvā averaɱ datvā akhyāpajjhaɱ datvā aparimāṇassa abhayassa averassa akhyāpajjhassa bhāgī hoti.|| ||

Imaɱ bhikkhave, pañcamaɱ dānaɱ mahādānaɱ,||
aggaññaɱ rattaññaɱ vaɱsaññaɱ porāṇaɱ asaŋkiṇṇaɱ asaŋkiṇṇapubbaɱ na saŋkīyati na saŋkīyissati appatikuṭṭhaɱ samaṇehi brāhmaṇehi viññūhi.|| ||

Ayaɱ bhikkhave aṭṭhamo puññābhisāndo kusalābhisando sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Idaɱ, bhikkhave, pañcamaɱ dānaɱ mahādānaɱ aggaññaɱ rattaññaɱ vaɱsaññaɱ porāṇaɱ asaŋkiṇṇaɱ asaŋkiṇṇapubbaɱ na saŋkīyati na saŋkīyissati appatikuṭṭhaɱ samaṇehi brāhmaṇehi viññūhi.|| ||

Ayaɱ bhikkhave aṭṭhamo puññābhisando kusalābhisando [247] sukhassāhāro sovaggiko sukhavipāko saggasaɱvattaniko iṭṭhāya kantāya manāpāya hitāya sukhāya saɱvattati.|| ||

Imā kho bhikkhave, aṭṭha puññābhisandā kusalābhisandā sukhassāhārā sovaggikā sukhavipākā saggasaɱvattanikā iṭṭhāya kantāya manāpāya hitāya sukhāya saɱvattantī ti.|| ||

 


Contact:
E-mail
Copyright Statement   Webmaster's Page