Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Atthaka Nipāta
Gotamī Vaggo

Sutta 52

Bhikkhunovādaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ.|| ||

Atha kho āyasmā Ānando yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Ānando Bhagavantaɱ etad avoca:|| ||

'Kati hi nū kho bhante,||
dhammehi samannāgato bhikkhu bhikkhuno vādako sammantitabbo' ti?|| ||

2. Aṭṭhahi kho Ānanda, dhammehi samannāgato bhikkhu bhikkhuno'vādako sammannitabbo.|| ||

Katamehi aṭṭhahi?|| ||

3. Idha, Ānanda, sīlavā ca hoti pātimokkha-saɱvara-saɱvuto viharati,||
ācāra-gocara-sampanno aṇumattesu vajjesu bhaya-dassāvī samādāya sikkhati sikkhāpadesu.|| ||

4. Bahussuto hoti sutadharo sutasannicayo,||
ye te dhammā ādikalyāṇā majjhekalyāṇā pariyosānakalyāṇā sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ abhivadanti,||
tathārūpassa dhammā bahussutā honti.|| ||

Dhatā vacasā paricitā manasānupekkhitā diṭṭhiyā suppaṭividdhā.|| ||

5. Ubhayāni kho pan'assa pātimokkhāni vitthārena svāgatāni honti suvibhattāni suppavattīni suvinicchitāni suttaso anuvyañjanaso.|| ||

6. Kalyāṇavāco hoti kalāṇavākkaraṇo poriya vācaya samannāgato vissaṭṭhāya anelagaḷāya atthassa viññpaniyā.|| ||

7. Paṭibalo [280] hoti bhikkhunīsaŋghassa dhammiyā kathāya sandassetuɱ samādapetuɱ samuttejetuɱ sampahaɱsetuɱ.|| ||

8. Yebhuyyena bhikkhunīnaɱ piyo hoti manāpo.|| ||

9. Na kho pan'etaɱ Bhagavantaɱ uddīsaɱ pabbajitāya kāsāyavavatthanivasanāya garudhammaɱ ajjhāpannupubbo hoti.|| ||

10. Vīsativasso vā hoti atirekavīsati vasso vā.|| ||

Imehi kho Ānanda, aṭṭhahi dhammehi samannāgato bhikkhu bhikkhunovādako sammantitabbo ti.|| ||

 


Contact:
E-mail
Copyright Statement   Webmaster's Page