Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Atthaka Nipāta

Sutta 54

Byagghapajja Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

[281]


 

[1][pts][than][nara] Evaɱ me sutaɱ:|| ||

Ekaɱ samayaɱ Bhagavā Koliyesu viharati Kakkarapattaɱ nāma Koliyānaɱ nigamo.|| ||

Atha kho Dīghajāṇu Koliyaputto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho Dīghajāṇu Koliyaputto Bhagavantaɱ etad avoca:|| ||

'Mayaɱ bhante, gihī kāmabhogī.|| ||

Puttasambādhasayanaɱ ajajhāvasāma,||
kāsikacandanaɱ paccanubhoma,||
mālāgandhavilepanaɱ dhārayāma,||
jātarūparajataɱ sādiyāma.|| ||

Tesaɱ no bhante,||
Bhagavā amhākaɱ tathā dhammaɱ desetu,||
ye amhākaɱ assa dhammā diṭṭhadhammahitāya diṭṭhadhammasukhāya samparāya sukhāyā' ti.|| ||

2. Cattāro'me Byagghapajja, dhammā kulaputtassa diṭṭhadhammahitāya saɱvattanti diṭṭhadhammasukhāya.|| ||

Katame cattāro?|| ||

3. Uṭṭhānasampadā||
ārakkhasampadā||
kalyāṇamittatā||
samajīvikatā.|| ||

4. Katamā ca Byagghapajja, uṭṭhānasampadā?|| ||

Idha Byagghapajja kulaputto yena kammaṭṭhānena jīvikaɱ kappeti,||
yadi kasiyā||
yadi vaṇijjāya||
yadi gorakkhena||
yadi issatthena,||
yadi rājaporisena||
yadi sippaññatarena.|| ||

Tattha dakkho hoti analaso tatrupāyāya vimaɱsāya samannāgato alaɱ kātuɱ alaɱ saɱvidhātuɱ.|| ||

Ayaɱ vuccati Byagghapajja, uṭṭhānasampadā.|| ||

5. Katamā ca Byagghapajja, ārakkhasampadā?|| ||

Idha Byagghapajja, kulaputtassa bhogā honti [282] uṭṭhānaviriyādhigatā bāhābalaparicitā sedāvakkhittā dhammikā dhammaladdhā,||
te ārakkhena guttiyā sampādeti||
'Kitti me ime bhoge n'eva rājāno hareyyuɱ,||
na corā hareyyuɱ,||
na aggi ḍaheyya,||
na udakaɱ vaheyya,||
na appiyā dāyāda hareyyun' ti?|| ||

Ayaɱ vuccati Byagghapajja, ārakkhasampadā.|| ||

6. Katamā ca Byagghapajja, kalayāṇamittatā?|| ||

Idha Byagghapajja, kulaputto yasmiɱ gāme vā nigame vā paṭivasati.|| ||

Tatta ye te honti gahapati vā gahapiputto vā daharā vā vuddhasīlino vuḍḍhā vā vuddhasīlino saddhāsampannā sīlasampannā cāgasampannā paññāsampannā,||
tehi saddhiɱ santiṭṭhati sallapati sākacchaɱ samāpajjati.|| ||

Yathā rūpānaɱ saddhāsampannānaɱ saddhāsampadaɱ anusikkhiti,||
yathārūpānaɱ sīlasampannānaɱ sīlasampadaɱ anusikkhati,||
yathārūpānaɱ cāgasampannānaɱ cāgasampadaɱ anusikkhati,||
yathārūpānaɱ paññāsampannānaɱ paññāsampadaɱ anusikkhati.|| ||

Ayaɱ vuccati Byagghapajja, kalyāṇamittatā.|| ||

7. Katamā ca Byagghapajja, samajīvitā?|| ||

Idha Byagghapajja, kulaputto āyañ ca bhogānaɱ viditvā vayañ ca bhogānaɱ viditvā samaɱ jīvikaɱ kappetī na āccogāḷhaɱ na ātihīnaɱ,||
'Evaɱ me āyo vayaɱ pariyādāya ṭhassati,||
na ca me vayo āyaɱ pariyādāya ṭhassatī' ti.|| ||

Seyyathā pi Byagghapajja, tulādhāro vā tulādhārantevāsi vā tulaɱ paggahetvā jānāti|| ||

'Ettakena vā onataɱ ettakena vā unnatan' ti.|| ||

Evam eva kho Byagghapajja,||
kulaputto āyañ ca bhogānaɱ viditvā vayañ ca bhogānaɱ viditvā samaɱ jīvikaɱ kappeti,||
na ca accogāḷhaɱ ta atihīnaɱ.|| ||

'Evaɱ me āyo vayaɱ pariyādāya [283] ṭhassati,||
na ca me vayo āyaɱ pariyādāya ṭhassatī' ti.|| ||

Sacāyaɱ Byagghapajja, kulaputto appāyo samāno uḷāraɱ jīvikaɱ kappeti,||
tassa bhavanti vattāro:|| ||

'Udumbarakhādīkaɱ vāyaɱ,||
kulaputto bhoge kādatī' ti.|| ||

Sace panāyaɱ Byagghapajja,||
kulaputto mahāyo samāno kasiraɱ jīvikaɱ kappeti,||
tassa bhavanti vattāro:|| ||

'Ajaddhumārikaɱ vāyaɱ,||
kulaputto marissatī' ti.|| ||

Yato ca khvāyaɱ Byagghapajja,||
kulaputto āyañ ca bhogānaɱ viditvā vayañ ca bhogānaɱ viditvā samaɱ jīvikaɱ kappeti na accogāḷhaɱ na atihīnaɱ:|| ||

'Evaɱ me āyo vayaɱ pariyādāya ṭhassati,||
na ca me vayo āyaɱ pariyādāya ṭhassatī' ti.|| ||

Ayaɱ vuccati Byagghapajja, samajīvitā.|| ||

8. Evaɱ samuppannānaɱ Byagghapajja bhogānaɱ cattāri apāyamukhāni honti:||
itthidhutto hoti||
surādhutto||
akkhadhutto||
pāpamitto pāpasahāyo pāpasampavaŋko.|| ||

Seyyathā pi Byagghapajja,||
mahato taḷākassa cattāri c'eva apāyamukhāni.|| ||

Cattāri ca apāyamukhāni,||
tassa puriso yāni c'eva āyamukhāni tāni pidabheyya,||
yāni ca apāyamukhāni tāni vivareyya,||
devo ca na sammā dhāraɱ anuppaveccheyya,||
evaɱ hi tassa Byagghapajja mahato taḷākassa pārihāni yeva pāṭikaŋkha no vuddhī.|| ||

Evam eva kho Byagghapajja,||
evaɱ samuppannānaɱ bhogānaɱ cattāri apāyamukhāni honti:||
itthidhutto hoti||
surādhutto||
akkhadhutto||
pāpamitto pāpasahāyo pāpasampavaŋko.|| ||

9. Evaɱ samuppannānaɱ Byagghapajja,||
bhogānaɱ cattārī āyamukhāni honti:|| ||

Na itthidhutto hoti||
na surādhutto||
na [284] akkhadhutto,||
kalyāṇamitto kalyāṇasahāyo kalyāṇasampavaŋko.|| ||

Seyyathā pi Byagghapajja,||
mahato taḷākassa cattāri c'eva āyamukhāni,||
cattāri ca apāyamukhāni,||
tassa puriso yāni c'eva āyamukhāni tāni vivareyya,||
yāni ca apāyamukhāni tāni pidaheyya,||
devo ca sammā dhāraɱ anuppaveccheya,||
evaɱ hi tassa Byagghapajja,||
mahato taḷākassa vuddhi yeva pāṭikaŋkhā no parihāni,||
evam eva kho Byagghapajja,||
evaɱ samuppannā bhogānaɱ cattāri āyamukhāni honti:||
na itthidhutto hoti,||
na surādhutto,||
na akkhadhutto,||
kalyāṇamitto kalyāṇasahāyo kalyāṇasampavaŋko.|| ||

Ime kho Byagghapajja, cattāro dhammā kulaputtassa diṭṭhadhammahitāya saɱvattanti,||
diṭṭhadhammasukhāyāti.|| ||

10. Cattāro me Byagghapajja, dhammā kulaputtassa samparāyahitāya saɱvattanti samparāyasukhāya.|| ||

Katame cattāro?|| ||

11. Saddhāsampadā||
sīlasampadā||
cāgasampadā||
paññāsampadā.|| ||

12. Katamā ca Byagghapajja, saddhāsampadā?|| ||

Idha Byagghapajja, kulaputto saddho hoti,||
saddahati Tathāgatassa bhodhi:||
iti pi so Bhagavā arahaɱ Sammā-sambuddho vijjajacaraṇasampanno sugato loka-vidū anuttaro purisadhammasārathi satthā deva-manussānaɱ buddho Bhagavā ti.|| ||

Ayaɱ vuccati Byagghapajja, saddhāsampadā.|| ||

13. Katamā ca Byagghapajja, sīlasampadā?|| ||

Idha Byagghapajja kulaputto pāṇātipātā paṭivirato hoti adinnādānā paṭivirato hoti kāmesumicchācārā paṭivirato hoti,||
musāvādā paṭivirato hoti||
surāmeraya majjapamādaṭṭhānā paṭivirato hoti.|| ||

Ayaɱ vuccati Byagghapajja, sīlasampadā.|| ||

14. Katamā ca Byagghapajja, cāgasampadā?|| ||

Idha Byagghapajja, kulaputto vigatamalamaccherena cetasā agāraɱ ajajhāvasati muttacāgo payatapāṇi vossaggarato yāvayogo dānasaɱvibhāgarato.|| ||

ayaɱ vuccati Byagghapajja, cāgasampadā.|| ||

15. Katamā ca Byagghapajja paññāsampadā?|| ||

[285] Idha Byagghapajja, kulaputto paññavā hoti||
udayatthāgāminiyā paññāya samannāgato,||
ariyāya nibbedhikāya sammādukkhakkhayagāminiyā.|| ||

Ayaɱ vuccati Byagghapajja paññāsampadā.|| ||

Ime kho Byagghapajja, cattāro dhammā kulaputtassa samparāyahitāya saɱvattanti samparāyasukhāyā ti.|| ||

 

Uṭṭhātā kammadheyyesu appamatto vidhānavā,||
Samaɱ kappeti jīvikaɱ sambhataɱ anurakkhati.|| ||

Saddho sīlena sampanno vadaññū vītamaccharo,||
Niccaɱ maggaɱ visodheti sotthānaɱ samparāyikaɱ|| ||

Icc'ete aṭṭha dhammā ca saddhassa gharam esino,||
Akkhātā saccanāmena ubhayattha sukhāvahā.|| ||

Diṭṭhadhammahitatthāya samparāyasukhāya ca||
evam etaɱ gahaṭṭhānaɱ cāgo puññaɱ pavaḍḍhatī ti.|| ||

 


Contact:
E-mail
Copyright Statement   Webmaster's Page