Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Atthaka Nipāta

Sutta 56

Bhaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. 'Bhayan' ti bhikkhave, kāmānam etaɱ adhivacanaɱ,||
'dukkhan' ti bhikkhave, kāmānam etaɱ adhivacanaɱ,||
'rogo' ti bhikkhave, kāmānam etaɱ adhivacanaɱ,||
'gaṇḍo' ti bhikkhave, kāmānam etaɱ adhivacanaɱ,||
'sallan' ti bhikkhave, kāmānam etaɱ adhivacanaɱ,||
'saŋgo' ti bhikkhave, kāmānam etaɱ adhivacanaɱ,||
'paŋko' ti bhikkhave, kāmānam etaɱ adhivacanaɱ,||
'gabbho' ti bhikkhave, kāmānam etaɱ adhivacanaɱ.|| ||

3. Kasmā ca bhikkhave, 'bhayan' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi bhayā na parimuccati,||
[290]samparādhikā pi bhayā na parimuccati.|| ||

Tasmā 'bhayan' ti kāmānam etaɱ adhivacanaɱ.|| ||

4. Kasmā ca bhikkhave, 'rogo' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi rogā na parimuccati,||
samparādhikāpi rogā na parimuccati.|| ||

Tasmā 'rogo' ti kāmānam etaɱ adhivacanaɱ.|| ||

5. Kasmā ca bhikkhave, 'gaṇḍo' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi gaṇḍā na parimuccati,||
samparādhikā pi gaṇḍā na parimuccati.|| ||

Tasmā 'gaṇḍo' ti kāmānam etaɱ adhivacanaɱ.|| ||

6. Kasmā ca bhikkhave, 'sallan' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi sallā na parimuccati,||
samparādhikā pi sallā na parimuccati.|| ||

Tasmā 'sallan' ti kāmānam etaɱ adhivacanaɱ.|| ||

7. Kasmā ca bhikkhave, 'saŋgo' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi saŋgā na parimuccati,||
samparādhikā pi saŋgā na parimuccati.|| ||

Tasmā 'saŋgo' ti kāmānam etaɱ adhivacanaɱ.|| ||

8. Kasmā ca bhikkhave, 'paŋko' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi paŋkā na parimuccati,||
samparādhikā pi paŋkā na parimuccati.|| ||

Tasmā 'paŋko' ti kāmānam etaɱ adhivacanaɱ.|| ||

9. Kasmā ca bhikkhave, 'gabbho' ti kāmānam etaɱ adhivacanaɱ?|| ||

Yasmā ca kāmarāgarattāyaɱ bhikkhave, chandarāgavinibaddho diṭṭhadhammikā pi gabbhā na parimuccati,||
samparādhikā pi gabbhā na parimuccati.|| ||

Tasmā 'gabbho' ti kāmānam etaɱ adhivacanaɱ.|| ||

Bhayaɱ dukkhañ ca rogo ca gaṇḍo sallañ ca saŋgo ca paŋko gabbho ca ubhayaɱ.||
Ete kāmā pavuccanti, yattha satto puthujjano||
Otiṇṇo sātarūpena puna gabbhāya gacchati,||
Yato ca bhikkhu ātāpī sampajaññaɱ na riñcati.||
So imaɱ palipathaɱ duggaɱ atikkamma tathāvidho,||
Pajaɱ jāti jarūpetaɱ phandamānaɱ avekkhatī ti.|| ||

 


Contact:
E-mail
Copyright Statement   Webmaster's Page