Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Atthaka Nipāta
10. Sāmañña Vaggo

Sutta 90 (a) or [Suttas 1-27]

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1] [1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Pubbārāme Migāramātupāsāde atha kho Bojjhā upāsikā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

- pe - [to be developed according to AN 8.43 which, for Visākhā is reproduced in it's order below.|| ||

[2] - pe - Sirimā - pe - || ||

[3] - pe - Padumā - pe - || ||

[4] - pe - Sutanā - pe - || ||

[5] - pe - Manujā - pe - || ||

[6] - pe - Uttarā - pe - || ||

[7] - pe - Muttā - pe - || ||

[8] - pe - Khemā - pe - || ||

[9] - pe - Somā - pe - || ||

[10] - pe - Rūpī - pe - || ||

[11] - pe - Cūnadī rājakumāri - pe - || ||

[12] - pe - Bimbī upāsikā - pe - || ||

[13] - pe - Sumanā rājakumāri - pe - || ||

[14] - pe - Mallikā devi - pe - || ||

[15] - pe - Tissā upāsikā - pe - || ||

[16] - pe - Tissāya mātā - pe - || ||

[17] - pe - Soṇā - pe - || ||

[18] - pe - Soṇāya mātā - pe - || ||

[19] - pe - Kāṇā - pe - || ||

[20] - pe - Kāṇāya mātā - pe - || ||

[21] - pe - Uttarā Nandamātā - pe - || ||

 


 

Sutta 22

Visākhuposatha Suttaɱ

[22. 1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Pubbārāme Migāramātupāsāde atha kho Visākhā Migāramātā yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Visākhaɱ Migāramātaraɱ.|| ||

Bhagavā etad avoca:|| ||

2. Aṭṭhaŋgasamannāgato Visākhe||
uposatho upavuttho mahapphalo hoti mahānisaɱso mahājutiko mahāvipphāro.|| ||

Kathaɱ upavuttho ca Visākhe||
aṭṭhaŋgasamannāgato uposatho mahapphalo hoti mahānisaɱso mahajutiko mahavipphāro?|| ||

3. Idha Visākhe ariyasāvako iti paṭisañcikkhati:|| ||

'Yāvajīvaɱ arahanto pāṇātipātaɱ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhūtahitānukampī viharanti.|| ||

Aham p'ajja imañ ca rattiɱ imañ ca divasaɱ pāṇātipātaɱ pahāya pāṇātipātā paṭivirato nihita-daṇḍo nihita-sattho lajjī dayāpanno sabbapāṇabhutahitānukampī viharāmī.|| ||

Iminā pi aŋgena arahataɱ anukaromi||
uposatho ca me upavuttho bhavissatī' ti.|| ||

Iminā paṭhamena aŋgena samannāgato hoti.|| ||

4. 'Yāvajīvaɱ arahanto adinnādānaɱ pahāya adinnādānā paṭiviratā dinnādāyī dinnāpāṭikaŋkhī athenena sucibhutena attanā viharanti.|| ||

Aham p'ajja imañ ca rattiɱ imañ ca divasaɱ adinnādānaɱ pahāya adinnādānā paṭivirato dinnādāyī dinna-pāṭikaŋkhī athenena sucibhutena attanā viharāmi.|| ||

Iminā pi aŋgena arahataɱ anukaromi||
uposatho ca me upavuttho bhavissatī' ti.|| ||

Iminā dutiyena aŋgena samannāgato hoti.|| ||

5. 'Yāvajīvaɱ arahanto abrahmacariyaɱ pahāya brahmacārino ārācārī viratā methunā gāmadhammā.|| ||

Aham p'ajja imañ ca rattiɱ imañ ca divasaɱ abrahmacariyaɱ pahāya brahmacārī ārā-cārī virato methunā gāmadhammā viharāmi.|| ||

Iminā pi aŋgena arahataɱ anukaromi||
uposatho ca me upavuttho bhavissatī' ti.|| ||

Iminā tatiyena aŋgena samannāgato hoti.|| ||

6. 'Yāvajīvaɱ arahanto musāvādaɱ pahāya musāvādā paṭiviratā saccavādī saccasandhā thetā paccayikā avisaɱvādakā lokassa.|| ||

Aham p'ajja imañ ca rattiɱ imañ ca divasaɱ musāvādaɱ pahāya musāvādā paṭivirato saccavādī saccasandho theto paccayiko avisaɱvādako lokassa.|| ||

Iminā pahaɱ aŋgena arahataɱ anukaromi||
uposatho ca me upavuttho bhavissatī' ti.|| ||

Iminā catutthena aŋgena samannāgato hoti.|| ||

7. 'Yāvajīvaɱ arahanto surāmerayamajjapamādaṭṭhānaɱ pahāya surāmerayamajjapamādaṭṭhānā paṭiviratā.|| ||

Aham p'ajja imañ ca rattiɱ imañ ca divasaɱ surāmerayamajjapamādaṭṭhānaɱ pahāya surāmerayamajjapamādaṭṭhānā paṭivirato.|| ||

Iminā pi aŋgena arahataɱ anukaromi||
uposatho ca me upavuttho bhavissatī' ti.|| ||

Iminā pañcamena aŋgena samannāgato hoti.|| ||

8. 'Yāvajīvaɱ arahanto ekabhattikā rattūparatā viratā vikālabhojanā.|| ||

Aham p'ajja imañ ca rattiɱ imañ ca divasaɱ eka-bhattiko rattūparato virato vikālabhojanā.|| ||

Iminā pi aŋgena arahataɱ anukaromi||
uposatho ca me upavuttho bhavissatī' ti.|| ||

Iminā chaṭṭhena aŋgena samannāgato hoti.|| ||

9. 'Yāvajīvaɱ arahanto naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭiviratā.|| ||

Aham p'ajja imañ ca rattiɱ imañ ca divasaɱ naccagītavāditavisūkadassanamālāgandhavilepanadhāraṇamaṇḍanavibhūsanaṭṭhānā paṭivirato.|| ||

Iminā pi aŋgena arahataɱ anukaromi||
uposatho ca me upavuttho bhavissatī ti.|| ||

Iminā sattamena aŋgena samannāgato hoti.|| ||

10. Yāvajīvaɱ arahanto uccāsayana-mahāsayanaɱ pahāya uccāsayana-mahāsayanā paṭiviratā nīcaseyyaɱ kappenti mañcake vā tiṇasanthārake vā.|| ||

Aham p'ajja imañ ca rattiɱ imañ ca divasaɱ uccāsayana-mahāsayanaɱ pahāya uccāsayana-mahāsayanā paṭivirato nīcaseyyaɱ kappemi mañcake vā tiṇasanthārake vā.|| ||

Iminā pi aŋgena arahataɱ anukaromi||
uposatho ca me upavuttho bhavissatī' ti.|| ||

Iminā aṭṭhamena aŋgena samannāgato hoti.|| ||

Evaɱ upavuttho kho Visākhe||
aṭṭhaŋgasamannāgato uposatho mahapphalo hoti mahānisaɱso mahājutiko mahāvipphāro ti.|| ||

 


 

11. Kīva mahapphalo hoti||
kīva mahānisaɱso||
kīva mahājutiko||
kīva mahāvipphāro?|| ||

Seyyathā pi, Visākhe, yo imesaɱ soḷasannaɱ mahājanapadānaɱ pahūtasattaratanānaɱ issariyādhipaccaɱ rajjaɱ kāreyya,||
seyyathīdaɱ:|| ||

Aŋgānaɱ||
Magadhānaɱ||
Kāsīnaɱ||
Kosalānaɱ||
Vajjīnaɱ||
Mallānaɱ||
Cetīnaɱ||
Vaŋgānaɱ||
Kurūnaɱ||
Pañcālānaɱ||
Macchānaɱ||
Surasenānaɱ||
Assakānaɱ||
Avantīnaɱ||
Gandhārānaɱ||
Kambojānaɱ,||
aṭṭhaŋgasamantāgatassa uposathassa etaɱ kalaɱ nāgghati soḷasiɱ.|| ||

Taɱ kissa hetu?|| ||

Kapaṇaɱ Visākhe, mānusakaɱ rajjaɱ dibbaɱ sukhaɱ upanidhāya.|| ||

12. Yāni Visākhe, mānusakāni paññāsa vassāni,||
Cātummahārājikānaɱ devānaɱ eso eko rattindivo,||
tāya rattiyā tiɱsa rattiyo māso,||
tena māsena dvādasa māsiyo saɱvaccharo,||
tena saɱvaccharena dibbāni pañca vassasatāni Cātummahārājikānaɱ devānaɱ āyuppamāṇaɱ.|| ||

Ṭhānaɱ kho pan'etaɱ Visākhe, vijjati,||
yaɱ idh'ekacco itthi vā puriso vā aṭṭhaŋgasamannāgataɱ uposathaɱ upavasitvā kāyassa bhedā param maraṇā Cātummahārājikānaɱ devānaɱ sahavyataɱ upapajjye.|| ||

Idaɱ kho pana me taɱ Visākhe, sandhāya bhāsitaɱ:||
kapaṇaɱ mānusakaɱ rajjaɱ dibbaɱ sukhaɱ upanidhāya.|| ||

13. Yaɱ Visākhe mānusakaɱ vassasataɱ,||
Tāvatiɱsānaɱ devānaɱ eso eko rattindivo;||
tāya rattiyā tiɱsa rattiyo māso;||
tena māsena dvādasa māsiyo saɱvaccharo||
tena saɱvaccharena dibbaɱ vassasahassaɱ Tāvatiɱsānaɱ devānaɱ āyuppamāṇaɱ.|| ||

Ṭhānaɱ kho pan'etaɱ Visākhe, vijjati,||
yaɱ idh'ekacco itthī vā puriso vā aṭṭhaŋgasamannāgataɱ uposathaɱ upavasitvā kāyassa bhedā param maraṇā Tāvatiɱsānaɱ devānaɱ sahavyataɱ upapajjye.|| ||

Idaɱ kho pana me taɱ Visākhe, sandhāya bhāsitaɱ:||
kapaṇaɱ mānusakaɱ rajjaɱ dibbaɱ sukhaɱ upanidhāya.|| ||

14. Yāni Visākhe, mānusakāni dve vassasatāni,||
Yāmānaɱ devānaɱ eso eko rattindivo,||
tāya rattiyā tiɱsa rattiyo māso,||
tena māsena dvādasa māsiyo saɱvaccharo,||
tena saɱvaccharena dibbāni dve vassasahassāni Yāmānaɱ devānaɱ āyuppamāṇaɱ.|| ||

Ṭhānaɱ kho pan'etaɱ Visākhe, vijjati,||
yaɱ idh'ekacco itthī vā puriso vā aṭṭhaŋgasamannāgataɱ uposathaɱ upavasitvā kāyassa bhedā param maraṇā Yāmānaɱ devānaɱ sahavyataɱ upapajjye.|| ||

Idaɱ kho pana me taɱ Visākhe, sandhāya bhāsitaɱ:||
kapaṇaɱ mānusakaɱ rajjaɱ dibbaɱ sukhaɱ upanidhāya.|| ||

15. Yāni Visākhe, mānusakāni cattāri vassasatāni,||
Tusitānaɱ devānaɱ eso eko rattindivo;||
tāya rattiyā tiɱsa rattiyo māso;||
tena māsena dvādasa māsiyo saɱvaccharo,||
tena saɱvaccharena dibbāni cattāri vassasahassāni Tusitānaɱ devānaɱ āyuppamāṇaɱ.|| ||

Ṭhānaɱ kho pan'etaɱ Visākhe, vijjati,||
yaɱ idh'ekacco itthī vā puriso vā aṭṭhaŋgasamannāgataɱ uposathaɱ upavasitvā kāyassa bhedā param maraṇā Tusitānaɱ devāɱ sahavyataɱ upapajjeyya.|| ||

Idaɱ kho pana me taɱ Visākhe, sandhāya bhāsitaɱ:||
kapaṇaɱ mānusakaɱ rajjaɱ dibbaɱ sukhaɱ upanidhāya.|| ||

16. Yāni Visākhe, mānusakāni aṭṭha vassasatāni,||
Nimmāṇaratīnaɱ devānaɱ eso eko rattindivo,||
tāya rattiyā tiɱsa rattiyo māso,||
tena māsena dvādasa māsiyo saɱvaccharo,||
tena saɱvaccharena dibbāni aṭṭha vassasahassāni Nimmāṇaratīṇaɱ devānaɱ āyuppamāṇaɱ.|| ||

Ṭhānaɱ kho pan'etaɱ Visākhe, vijjati,||
yaɱ idh'ekacco itthī vā puriso vā aṭṭhaŋgasamannāgataɱ uposathaɱ upavasitvā kāyassa bhedā param maraṇā Nimmāṇaratīnaɱ devānaɱ sahavyataɱ upapajjeyya.|| ||

Idaɱ kho pana me taɱ Visākhe, sandhāya bhāsitaɱ:||
kapaṇaɱ mānusakaɱ rajjaɱ dibbaɱ sukhaɱ upanidhāya.|| ||

17. Yāni Visākhe, mānusakāni soḷasa vassasatāni,||
Paranimmitavasavattīnaɱ devānaɱ eso eko rattindivo;||
tāya rattiyā tiɱsa rattiyo māso,||
tena māsena dvādasa māsiyo saɱvaccharo,||
tena saɱvaccharena dibbāni soḷasa vassasahassāni Paranimmitavasavattīnaɱ devānaɱ āyuppamāṇaɱ.|| ||

ṭhānāɱ kho pan'etaɱ Visākhe, vijjati,||
yaɱ idh'ekacco itthī vā puriso vā aṭṭhaŋgasamannāgataɱ uposathaɱ upavasitvā kāyassa bhedā param maraṇā Paranimmitasavattīnaɱ devānaɱ sahavyataɱ upapajjye.|| ||

Idaɱ kho pana me taɱ Visākhe, sandhāya bhāsitaɱ:||
kapaṇaɱ mānusakaɱ rajjaɱ dibbaɱ sukhaɱ upanidhāya.|| ||

Pāṇaɱ na hāññe na cādinnam ādiye||
Musā na bhāse na ca majjapo siyā||
Abrahmacariyā virameyya methunā||
Rattiɱ na bhuñjeyya vikālabhojanaɱ.|| ||

Mālaɱ na dhāreye na ca gandham ācare||
Mañce chamāyaɱ vasayetha santhate||
Etaɱ hi aṭṭhaŋgikam āh'uposathaɱ||
Buddhena dukkhantagunā pakāsitaɱ.|| ||

Cando ca suriyo ca ubho sudassanā||
Obhāsayaɱ anupariyanti yāvatā,||
Tamonudā te pana antalikkhagā||
Nabhe pabhāsenti disā virocanā.|| ||

Etasmiɱ yaɱ vijjati antare dhanaɱ||
Muttā maṇi veḷuriyaña ca bhaddakaɱ||
Siŋgī suvaṇṇaɱ atha vā pi kañcanaɱ||
Yaɱ jātarūpaɱ haṭakan ti vuccati||
Aṭṭhiŋgu petassa uposathassa||
Kalam pi te nānubhavanti soḷasiɱ||
Candappahā tāragaṇā va sabbe.|| ||

Tasmā hi nārī ca naro ca sīlavā||
Aṭṭhaŋgupetaɱ upavass'uposathaɱ||
Puññāni katvāna sukhudayāni||
Aninditā saggam upenti ṭhānan ti.|| ||

[23] - pe - Khujjuttarā upāsikā - pe - || ||

[24] - pe - Sāmāvatī upāsikā - pe - || ||

[25] - pe - Suppavāsā Koliyaṭhitā - pe - || ||

[26] - pe - Suppiyā upāsikā - pe - || ||

[27] - pe - Nakulamātā gahapatāni - pe - || ||

 


Contact:
E-mail
Copyright Statement   Webmaster's Page