Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Namo tassa Bhagavato arahato sammā sambuddhassa

Sutta 1

Sambodhipakkhiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati][upal] Evaɱ me sutaɱ.|| ||

Ekaɱ samayaɱ Bhagavā Sāvātthiyaɱ viharati Jetavane Anāthapiṇḍikassa ārāme,||
tatra kho Bhagavā bhikkhu āmantesi.|| ||

Bhikkhavo ti.|| ||

Bhadanteti te bhikkhu Bhagavato paccassosuɱ Bhagavā etad avoca:|| ||

Sace bhikkhave aññatitthiyā paribbājakā evaɱ puccheyyuɱ: sambodhipikkhiyānaɱ.|| ||

Āvuso dhammānaɱ kā upanisā bhāvanāyāti.|| ||

Evaɱ puṭṭho tumhe bhikkhave tesaɱ aññatitthiyānaɱ paribbājakānaɱ kinti khyākareyyāthāti.|| ||

Bhagavammūlakā no bhante dhammā Bhagavantettikā,||
Bhagavampaṭisaraṇā,||
sādhu vata bhante Bhagavantaɱ yeva paṭibhātu etassa bhāsitasya attho.|| ||

Bhagavato sutvā bhikkhu dhāressantī ti.|| ||

Tena hi bhikkhave suṇātha sādhukaɱ manasikarotha,||
bhāsissāmī ti.|| ||

Evaɱ bhante' ti kho te bhikkhu Bhagavato paccassosuɱ.|| ||

Bhagavā etad avoca:|| ||

Sace bhikkhave aññatitthiyā paribbājakā evaɱ puccheyyuɱ sambodhipakkhīyānaɱ āvuso dhammānaɱ kā upanisā bhāvanāyāti.|| ||

Evaɱ puṭṭhā tumhe bhikkhave tesaɱ aññatitthiyānaɱ paribbājakānaɱ evaɱ khyākareyyātha:|| ||

1. Idh'āvuso bhikkhu kalyāṇamitto hoti kalyāṇasahāyo kalyāṇasampavaŋko.|| ||

Sambodhipakkhiyānaɱ āvuso dhammānaɱ ayaɱ paṭhamā upanisā bhāvanāya.|| ||

2. Puna ca paraɱ āvuso bhikkhu sīlavā hoti pātimokkha-saɱvara-saɱvuto viharati ācāra-gocara-sampanno aṇumattesu vajjesu bhaya-dassāvī samādāya sikkhati sikkhāpadesu.|| ||

Sambodhipakkhiyānaɱ āvuso dhammānaɱ ayaɱ dutiyā upanisā bhāvanāya.|| ||

3. Puna ca paraɱ āvuso bhikkhū yāyaɱ kathā ubhasallekhikā cetovivaraṇasappāyā seyyath'idaɱ:||
appicchakathā santuṭṭhikathā pavivekakathā asaɱsaggakathā viriyārambhakathā sīlakathā samādhikathā paññākathā vimuttikathā vimuttiñāṇadassanakathā.|| ||

Evarūpiyā kathāya nikāmalābhī hoti akicchalābhī akasiralābhī.|| ||

Sambodhipakkhiyānaɱ āvuso dhammānaɱ ayaɱ tatiyā upanisā bhāvanāya.|| ||

4. Puna ca paraɱ āvuso bhikkhu āraddhaviriyo viharati akusalānaɱ dhammānaɱ pahānāya,||
kusalānaɱ dhammānaɱ upasampadāya thāmavā daḷhaparakkamo anikkhittadhūro kusalesu dhammesu.|| ||

Sambodhipakkhiyānaɱ āvuso dhammānaɱ ayaɱ catutthi upanisā bhāvanāya.|| ||

5. Puna ca paraɱ āvuso bhikku paññavā hoti udayatthagāminiyā paññāya samannāgato ariyāya nibbedhikāya sammādukkhayagāminiyā.|| ||

Sambodhipakkhiyānaɱ āvuso dhammānaɱ ayaɱ pañcamī upanisā bhāvanāya.|| ||

Kalyāṇamittass'etaɱ bhikkhave bhikkhuno pāṭikaŋkhaɱ kalyāṇasahāyassa kalyāṇasampavaŋkassa sīlavā bhavissati pātimokkha-saɱvara-saɱvuto viharissati ācāra-gocara-sampanno aṇumattesu vijjesu bhayadassāvi samādāya sikkhati sikkhāpadesu.|| ||

Appicchakathā santuṭṭhikathā pavivekakathā asaɱsaggakathā viriyārambhakathā sīlakathā samādhikathā paññākathā vimuttikathā vimuttiñāṇadassanakathā.|| ||

Evarūpiyā kathāya nikāmalābhī bhavissati akicchalābhī akasiralābhī.|| ||

Kalyāṇamittass'etaɱ bhikkhave bhikkhuno paṭikaŋkhaɱ kalyāṇasahāyassa kalyāṇasampavaŋkassa: āraddhaviriyo viharissati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷhaparakkamo anikkhittadhūro kusalesu dhammesu.|| ||

Kalyāṇamittass'etaɱ bhikkhave bhikkhuno pāṭikaŋkhaɱ kalyāṇasahāyassa kalyāṇasampavaŋkassa: paññavā bhavissati udayatthagāminiyā paññāya samannāgato ariyāya nibbedhikāya sammādukkhakyagāminiyā.|| ||

Tena ca pana bhikkhave bhikkhunā imesu pañcasu dhammesu patiṭṭhāya cattāro dhammā uttariɱ bhāvetabbā:|| ||

6 - 9. Asubhā bhāvetabbā rāgassa pahānāya.|| ||

Mettā bhāvetabbā vyāpādassa pahānāya.|| ||

Ānāpānasati bhāvetabbā vitakkupacchedāya.|| ||

Aniccasaññā bhāvetabbā asmīmānasamūgghātāya,||
aniccasaññino bhikkhave bhikkhuno anattasaññā saṇṭhāti.|| ||

Anattasaññī asmīmānasamūgghātaɱ pāpuṇāti,||
diṭṭhe va dhamme nibbānanti.|| ||

 


Contact:
E-mail
Copyright Statement   Webmaster's Page