Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 3

Meghiya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][upal] Evaɱ me sutaɱ:|| ||

Ekaɱ samayaɱ Bhagavā Cālikāyaɱ viharati Cālikāya pabbate.|| ||

Tena kho pana samayena āyasmā Meghiyo Bhagavato upaṭṭhāko hoti.|| ||

Atha kho āyasmā Meghiyo yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ aṭṭhāsi.|| ||

Eka-m-antaɱ ṭhito kho āyasmā Meghiyo bhaghavantaɱ etad avoca:|| ||

'Icchām'ahaɱ bhante, Jantugāmaɱ piṇḍāya pavisitun' ti.|| ||

'Yassa dāni tvaɱ Meghiya kālaɱ maññasī ti.|| ||

2. Atha kho āyasmā Meghiyo pubbaṇhasamayaɱ nivāsetvā pattacīvaram ādāya Jantugāmaɱ piṇḍāya pāvisi:|| ||

Jantugāme piṇḍāya caritvā paccābhattaɱ piṇḍapāta paṭikkanto yena Kimikālāya nadiyā tīraɱ ten'upasaŋkami.|| ||

Addasā kho āyasmā Meghiyo Kimikālāya nadiyā tire jaŋghāvihāraɱ anucaŋkamamāno anuvicaramāno ambavanaɱ pāsādikaɱ ramaṇīyaɱ.|| ||

Disvān'assa etad ahosi:|| ||

'Pāsādikaɱ vat'idaɱ ambavanaɱ ramaṇīyaɱ.|| ||

Alaɱ vat'idaɱ kulaputtassa padhān'atthikassa padhānāya.|| ||

Sace maɱ Bhagavā anujāneyya,||
āgaccheyayāhaɱ imaɱ ambavanaɱ padhānāyā' ti.|| ||

3. Atha kho āyasmā Meghiyo yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Meghiyo Bhagavantaɱ etad avoca:|| ||

Idhāhaɱ bhante pubbaṇhasamayaɱ nivāsetvā pattacīvaram ādāya Jantugāmaɱ piṇḍāya pāvisiɱ.|| ||

Jantugāme piṇḍāya caritvā pacchābhattaɱ piṇḍapātapaṭikkanto yena Kimikālāya nadiyā tīraɱ ten'upasaŋkamiɱ.|| ||

Addasaɱ kho ahaɱ bhante,||
Kimikālāya nadiyā tīre jaŋghāvihāraɱ anucaŋkamamāno anuvicaramāno ambavanaɱ pāsādikaɱ ramaṇīyaɱ,||
disvāna me etad ahosi:|| ||

'Pāsādikaɱ vat'idaɱ ambavanaɱ ramaṇīyaɱ,||
alaɱ vat'idaɱ kulaputtassa padhān'atthikassa padhānāya.|| ||

Sace maɱ Bhagavā anujāneyya||
āgaccheyyāhaɱ imaɱ ambavanaɱ padhānāyāti.|| ||

Sace maɱ Bhagavā anujāneyya||
gaccheyyāhaɱ taɱ ambavanaɱ padhānāyāti.|| ||

'Āgamehi tāva Meghiya, ekak'amhā.|| ||

Tāva yāva añño pi koci bhikkhu āgacchatī ti.|| ||

4. Dutiyam pi kho āyasmā Meghiyo Bhagavantaɱ etad avoca:|| ||

'Bhagavato bhante, n'atthi kiñci uttariɱ karaṇīyaɱ,||
n'atthi katassa paticayo.|| ||

Mayihaɱ kho pana bhante,||
atthi uttariɱ karaṇīyaɱ,||
atthi katassa paticayo.|| ||

Sace maɱ Bhagavā anujāneyya,||
gaccheyayāhaɱ taɱ ambavanaɱ padhānāyā' ti.|| ||

Āgamehi tāva Meghiya, ekakamhā.|| ||

Tāva yāva aññe pi koci bhikkhu āgacchatī ti.|| ||

5. Tatiyam pi kho āyasmā Meghiyo Bhagavantaɱ etad avoca:|| ||

Bhagavato bhante, n'atthi kiñci uttariɱ karaṇīyaɱ,||
n'atthi katassa paticayo.|| ||

Mayihaɱ kho pana bhante,||
atthi uttariɱ karaṇīyaɱ,||
atthi katassa paticayo.|| ||

Sace maɱ Bhagavā anujāneyya,||
gaccheyayāhaɱ taɱ ambavanaɱ padhānāyā' ti.|| ||

'Padhātan ti kho Meghiya vadamānaɱ kinti vadeyyāma?|| ||

Yassa dāni tvaɱ Meghiya kālaɱ maññasī' ti.|| ||

6. Atha kho āyasmā Meghiyo uṭṭhāy āsanā Bhagavantaɱ abhivādetvā padakkhiṇaɱ katvā yena taɱ ambavanaɱ ten'upasaŋkami.|| ||

Upasaŋkamitvā taɱ ambavanaɱ ajjhogāhetvā aññatarasmiɱ rukkhamūle divāvihāraɱ nisīdi.|| ||

Atha kho āyasmato Meghiyassa tasmiɱ Ambavane viharantassa yebhuyyena tayo pāpakā akusalā vitakkā samudācaranti.|| ||

Seyyath'idaɱ:||
kāmavitakko||
vyāpādavitakko||
vihiɱsāvitakko.|| ||

Atha kho āyasmato Meghiyassa etad ahosi:||
'acchariyaɱ vata bho,||
abbhutaɱ vata bho,||
saddhāya'va tañ c'amhi agārasmā anagāriyaɱ pabbajito.|| ||

Atha ca pan'imehi tīhi pāpakehi akusalehi vitakkehi anvāsatto:||
kāmavitakkena||
vyāpādavitakkena||
vihiɱsāvitakkenāti.|| ||

7. Atha kho āyasmā Meghiyo yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Meghiyo Bhagavantaɱ etad avoca:|| ||

Idha mayhaɱ bhante tasmiɱ Ambavane viharantassa yebhuyyena tayo pāpakā akusalā vitakkā samudācaranti.|| ||

Seyyath'idaɱ:||
kāmavitakko||
vyāpādavitakko||
vihiɱsāvitakko.|| ||

Tassa mayhaɱ bhante, etad ahosi:||
'acchariyaɱ vata bho,||
abbhutaɱ vata bho,||
saddhāya'va tañ c'amhī agārasmā anagāriyaɱ pabbajito.|| ||

Atha ca pan'imehi tīhi pāpakehi akusalehi vitakkehi anvāsatto||
kāmavitakkena||
vyāpādavitakkena||
vihiɱsāvitakkenā' ti.|| ||

Aparipakkāya Meghiya ceto-vimuttiyā pañca dhammā paripakkāya saɱvattanti.|| ||

Katame pañca?|| ||

8. Idha Meghiya, bhikkhu kalyāṇamitto hoti kalyāṇasahāyo kalyāṇasampavaŋko.|| ||

Aparipakkāva Meghiya ceto-vimuttiyā ayaɱ paṭhamo dhammo paripakkāya saɱvattati.|| ||

9. Puna ca paraɱ Meghiya bhikkhu sīlavā hoti||
pātimokkhasaɱvarasaɱvuto viharati ācāragocarasampanno||
aṇumattesu vajjesu bhayadassāvī samādāya sikkhati sikkhāpadesu.|| ||

Aparipakkāya Meghiya, ceto-vimuttiyā ayaɱ dutiyo dhammo paripakkāya saɱvattati.|| ||

10. Puna ca paraɱ Meghiya bhikkhū yāyaɱ kathā abhisallekhikā ceto-vivaraṇasappāyā seyyath'idaɱ:||
appicchakathā||
santuṭṭhikathā||
pavivekakathā||
asaɱsaggakathā||
viriyārambhakathā||
sīlakathā||
samādhikathā||
paññākathā||
vimuttikathā||
vimuttiñāṇadassanakathā.|| ||

Evarūpiyā kathāya nikāmalābhī hoti akicchalābhī akasiralābhī.|| ||

Aparipakkāya Meghiya, ceto-vimuttiyā ayaɱ tatiyo dhammo paripakkāya saɱvattati.|| ||

11. Puna ca paraɱ Meghiya bhikkhu āraddhaviriyo viharati akusalānaɱ dhammānaɱ pahānāya,||
kusalānaɱ dhammānaɱ upasampadāya||
thāmavā daḷhaparakkamo anikkhittadhūro kusalesu dhammesu.|| ||

Aparipakkāya Meghiya ceto-vimuttiyā ayaɱ catuttho dhammo paripakkāya saɱvattati.|| ||

12. Puna ca paraɱ Meghiya bhikkhu paññavā hoti||
udayatthagāminiyā paññāya samannāgato ariyāya nibbedhikāya sammādukkhakkhayagāminiyā.|| ||

Aparikkāya Meghiya ceto-vimuttiyā ayaɱ pañcamo dhammo paripakkāya saɱvattati.|| ||

13. Kalyāṇamittass'etaɱ Meghiya bhikkhuno pāṭikaŋkhaɱ kalyāṇasahāyassa kalyāṇasampavaŋkassa||
sīlavā bhavissati||
pātimokkhasaɱvarasaɱvuto viharissati ācāragocara-sampanno||
aṇumattesu vijjesu bhayadassāvi samādāya sikkhati sikkhāpadesu.|| ||

Kalyāṇamittass'etaɱ Meghiya bhikkhuno pāṭikaŋkhaɱ kalyāṇasahāyassa kalyāṇasampavaŋkassa:||
yāyaɱ kathā abhisallekhikā ceto-vivaraṇasappāyā.|| ||

Seyyath'idaɱ:|| ||

Appicchakathā||
santuṭṭhikathā||
pavivekakathā||
asaɱsaggakathā||
viriyārambhakathā||
sīlakathā||
samādhikathā||
paññākathā||
vimuttikathā||
vimuttiñāṇadassanakathā.|| ||

Evarūpiyā kathāya nikāmalābhī bhavissati kicchalābhī akasiralābhī.|| ||

Kalyāṇamittass'etaɱ Meghiya bhigkhuno pāṭikaŋkhaɱ kalyāṇasahāyassa,||
kalyāṇa-sampavaŋkassa||
āraddhaviriyo viharissati akusalānaɱ dhammānaɱ pahānāya||
kusalānaɱ dhammānaɱ upasampadāya||
thāmavā daḷhaparakkamo anikkhittadhūro kusalesu dhammesu.|| ||

Kalyāṇamittass'etaɱ Meghiya bhikkhuno pāṭikaŋkhaɱ kalyāṇasahāyassa kalyāṇasampavaŋkassa:||
paññavā bhavissati udayatthagāminiyā paññāya samannāgato ariyāya nibbedhikāya sammādukkhakkhayagāminiyā.|| ||

Tena ca pana Meghiya bhikkhuno imesu pañcasu dhammesu patiṭṭhāya cattāro dhammā uttariɱ bhāvetabbā:||
asubhā bhāvetabbā rāgassa pahānāya,||
mettā bhāvetabbā vyāpādassa pahānāya,||
ānāpānasati bhāvetabbā vitakkupacchadāya,||
aniccasaññā bhāvetabbā asmīmānasamugghātāya.|| ||

Aniccasaññino Meghiya anattasaññā saṇṭhāti.|| ||

Anattasaññī asmīmānasamugghātaɱ pāpuṇāti diṭṭhe va dhamme nibbānan ti.|| ||

 


Contact:
E-mail
Copyright Statement   Webmaster's Page