Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 4

Nandaka Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][upal] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena āyasmā Nandako upaṭṭhānasālāyaɱ bhikkhū dhammiyā kathāya sandesseti samādapeti samuttejeti sampahaɱseti.|| ||

2. Atha kho Bhagavā sāyaṇhasamayaɱ paṭisallānā vuṭṭhito yen'upaṭṭhanānasālā ten'upasaŋkami.|| ||

Upasaŋkamitvā bahi dvārakoṭṭhake aṭṭhāsi kathāpariyosānaɱ āgamayamāno.|| ||

Atha kho Bhagavā kathāpariyosānaɱ viditvā [359] ukkāsitvā aggalaɱ ākoṭesi.|| ||

Vivariɱsu kho te bhikkhu Bhagavato dvāraɱ.|| ||

Atha kho Bhagavā upaṭṭhānasālaɱ pāvisi.|| ||

Pavisitvā paññatte āsane nisīdi.|| ||

Nisajja kho Bhagavā āyasmantaɱ Nandakaɱ etad avoca:|| ||

Dīgho kho tyāyaɱ Nandaka dhamma-pariyāyo bhikkunaɱ paṭihāsi,||
api ca me piṭṭhi āgilāyati bahi dvārakoṭṭhake ṭhitassa kathāpariyosānaɱ āgamayamānassā' ti.|| ||

3. Evaɱ vutte āyasmā Nandako sārajjamānarūpo||
Bhagavantaɱ etad avoca:|| ||

'Na kho mayahaɱ bhante jānāma "Bhagavā bahi dvārakoṭṭhake ṭhito" ti.|| ||

Sace hi mayaɱ bhante jāneyyāma||
"Bhagavā bahi dvārakoṭṭhake ṭhito" ti||
ettakam pi no na ppaṭibhāseyyā' ti.|| ||

Atha kho Bhagavā āyasmantaɱ Nandakaɱ sārajjamānarūpaɱ viditvā āyasmantaɱ Nandakaɱ etad avoca:|| ||

'Sādhū sādhū Nandaka,||
etaɱ kho Nandaka,||
tumhākaɱ paṭirūpaɱ kulaputtānaɱ saddhāya agārasmā anagāriyaɱ pabbajitānaɱ,||
yaɱ tumhe dhammiyā kathāya sannisīdeyyātha;||
sannipatitānaɱ vo Nandaka dvayaɱ karaṇīyaɱ:|| ||

Dhammī vā kathā,||
ariyo vā tuṇhīhāvo.|| ||

Saddho ca Nandaka bhikkhu hoti no ca sīlavā,||
evaɱ so ten'aŋgena aparipūro hoti.|| ||

Tena taɱ aŋgaɱ paripūretabbaɱ:|| ||

"Kintāhaɱ saddho ca [360] assaɱ sīlavā cā" ti?|| ||

Yato ca kho Nandaka,||
bhikkhu saddo ca hoti sīlavā ca,||
evaɱ so ten'aŋgena paripūro hoti.|| ||

Saddho ca Nandaka bhikkhu hoti sīlavā ca,||
no ca lābhī ajajhattaɱ cetosamathassa.|| ||

Evaɱ so ten'aŋgena aparipūro hoti.|| ||

Tena taɱ aŋgaɱ paripūretabbaɱ:|| ||

"Kiɱ tāhaɱ saddo ca assaɱ sīlavā ca lābhī ca ajjhattaɱ cetosamathassā" ti?|| ||

Yato ca kho Nandaka bhikkhu saddo ca hoti sīlavā ca,||
lābhī ca ajjhattaɱ cetosamathassa,||
evaɱ so ten'aŋgena paripūro hoti.|| ||

Saddho ca Nandaka bhikkhu hoti sīlavā ca,||
lābhī ca ajjhattaɱ ceto-samathassa||
na lābhī adhipañña-dhamma-vipassanāya.|| ||

Evaɱ so ten'aŋgena aparipūro hoti.|| ||

Seyyathā pi Nandaka pāṇako catuppādako,||
tass assa eko pādo omako lāmako,||
evaɱ so ten'aŋgena aparipūro assa,||
evam eva kho Nandaka bhikkhu saddho ca hoti sīlavā ca lābhī ca ajjhattaɱ ceto-samathassa||
na lābhī adhipaññādhamma-vipassanāya,||
evaɱ so ten'aŋgena aparipūro hoti.|| ||

Tena taɱ aŋgaɱ paripūretabbaɱ;|| ||

"Kinnāhaɱ saddho ca assaɱ sīlavā ca lābhī ca ajjhattaɱ cetosamathassa,||
lābhī ca adhipaññādhamma-vipassanāyā" ti?|| ||

Yato ca kho Nandaka,||
bhikkhu saddho ca hoti sīlavā ca lābhī ca ajjhattaɱ ceto-samathassa lābhī ca adhipaññādhamma-vipassanāya,||
evaɱ so ten'aŋgena paripūro hotī' ti.|| ||

Idam avoca Bhagavā, idaɱ vatvāna Sugato uṭṭhāy āsanā vihāraɱ pāvisi.|| ||

4. Atha kho āyasmā Nandako acirapakkantassa Bhagavato bhikkhu āmantesi:|| ||

Idān'āvuso Bhagavā catuhi padehi kevalaparipuṇṇaɱ parisuddhaɱ brahmacariyaɱ pakā- [361] setvā uṭṭhāy āsanā vihāraɱ paviṭṭho:|| ||

Saddho ca Nandaka bhikkhu hoti no ca sīlavā,||
evaɱ so ten'aŋgena aparipūro hoti.|| ||

Tena taɱ aŋgaɱ paripūretabbaɱ:|| ||

"Kintāhaɱ saddho ca assaɱ sīlavā cā" ti?|| ||

Yato ca kho Nandaka,||
bhikkhu saddo ca hoti sīlavā ca,||
evaɱ so ten'aŋgena paripūro hoti.|| ||

Saddho ca Nandaka bhikkhu hoti sīlavā ca,||
no ca lābhī ajajhattaɱ cetosamathassa.|| ||

Evaɱ so ten'aŋgena aparipūro hoti.|| ||

Tena taɱ aŋgaɱ paripūretabbaɱ:|| ||

"Kiɱ tāhaɱ saddo ca assaɱ sīlavā ca lābhī ca ajjhattaɱ cetosamathassā" ti?|| ||

Yato ca kho Nandaka bhikkhu saddo ca hoti sīlavā ca,||
lābhī ca ajjhattaɱ cetosamathassa,||
evaɱ so ten'aŋgena paripūro hoti.|| ||

Saddho ca Nandaka bhikkhu hoti sīlavā ca,||
lābhī ca ajjhattaɱ ceto-samathassa||
na lābhī adhipañña-dhamma-vipassanāya.|| ||

Evaɱ so ten'aŋgena aparipūro hoti.|| ||

Seyyathā pi Nandaka pāṇako catuppādako,||
tass assa eko pādo omako lāmako,||
evaɱ so ten'aŋgena aparipūro assa,||
evam eva kho Nandaka bhikkhu saddho ca hoti sīlavā ca lābhī ca ajjhattaɱ ceto-samathassa||
na lābhī adhipaññādhamma-vipassanāya,||
evaɱ so ten'aŋgena aparipūro hoti.|| ||

Tena taɱ aŋgaɱ paripūretabbaɱ;|| ||

"Kinnāhaɱ saddho ca assaɱ sīlavā ca lābhī ca ajjhattaɱ cetosamathassa,||
lābhī ca adhipaññādhamma-vipassanāyā" ti?|| ||

Yato ca kho Nandaka,||
bhikkhu saddho ca hoti sīlavā ca lābhī ca ajjhattaɱ ceto-samathassa lābhī ca adhipaññādhamma-vipassanāya,||
evaɱ so ten'aŋgena paripūro hotī' ti.|| ||

Pañc'ime āvuso ānisaɱsā kālena dhammasavaṇe,||
kālena dhammasākacchāya.|| ||

Katame pañca?|| ||

5. Idh'āvuso, bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Yathā yathā āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Tathā tathāssa Satthā'va piyo ca hoti manāpo ca garu ca bhāvanīyo ca.|| ||

Ayaɱ āvuso, paṭhamo ānisaɱso kālena dhammasavaṇe,||
kālena dhammasākacchāya.|| ||

6. Puna ca paraɱ āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Yathā yathā āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Tathā tathā so tasmiɱ dhamme attha-paṭisaɱvedī ca hoti dhamma-paṭisaɱvedī ca.|| ||

Ayaɱ āvuso dutiyo ānisaɱso kālena dhammasavaṇe,||
kālena dhammasākacchāya.|| ||

7. Puna ca paraɱ āvuso,||
bhikkhu bhikkhunaɱ dhammaɱ deseti ādi kalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Yathā yathā āvuso,||
bhikkhu bhikkhunaɱ dhammaɱ deseti ādi kalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brah- [362] macariyaɱ pakāseti.|| ||

Tathā tathā so tasmiɱ dhamme gambhīraɱ atthapadaɱ paññāya paṭivijjha passati.|| ||

Ayaɱ āvuso tatiyo ānisaɱso kālena dhammasavaṇe,||
kālena dhammasākacchāya.|| ||

8. Puna ca paraɱ āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Yathā yathā āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Tathā tathā naɱ sabrahmacārī uttariɱ sambhāventi.|| ||

"Addhā ayam āyasmā patto vā pacchati vā" ti.|| ||

Ayaɱ āvuso, catuttho ānisaɱso kālena dhammasavaṇe,||
kālena dhammasākacchāya.|| ||

9. Puna ca paraɱ āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Yathā yathā āvuso,||
bhikkhu bhikkhunaɱ dhammaɱ deseti ādikalyāṇaɱ majjhe kalyāṇaɱ pariyosāna-kalyāṇaɱ sātthaɱ savyañjanaɱ kevalaparipuṇṇaɱ parisuddhaɱ brahmacariyaɱ pakāseti.|| ||

Tattha tattha ye te bhikkhu sekhā appattamānasā anuttaraɱ yogakkhemaɱ patthayamānā viharanti,||
te taɱ dhammaɱ sutvā viriyaɱ ārabhanti appattassa pattiyā,||
anadhigatassa adhigamāya asacchikatassa sacchikiriyāya.|| ||

Ye pana tattha bhikkhu arahanto khīṇāsavā vusitavanto katakaraṇīyā ohitabhārā anuppattasadatthā parikkhīṇa-bhava-saɱyojanā sammadaññā-vimuttā,||
te taɱ dhammaɱ sutvā diṭṭhadham- [363] masukhavihāraɱ yeva anuyuttā viharanti.|| ||

Ayaɱ āvuso, pañcamo ānisaɱso kālena dhammasavaṇe,||
kālena dhammasākacchāya.|| ||

Ime kho āvuso, pañca ānisaɱsā kālena dhammasavaṇe,||
kālena dhammasākacchāyā ti.|| ||

 


Contact:
E-mail
Copyright Statement   Webmaster's Page