Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 5

Balasaŋgahavatthu Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][upal] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Cattār'imāni bhikkhave balāni.|| ||

Katamāni cattāriɱ?|| ||

2. Paññābalaɱ,||
viriyabalaɱ,||
anavajjabalaɱ,||
saŋgahabalaɱ.|| ||

Katamañ ca bhikkhave paññābalaɱ?|| ||

3. Ye'dhammā akusalā akusalasaŋkhātā,||
ye dhammā kusalā kusalasaŋkhātā,||
ye dhammā sāvajjā sāvajjasaŋkhātā,||
ye dhammā anavajjā anavajjasaŋkhātā,||
ye dhammā kaṇhā kaṇhasaŋkhātā,||
ye dhammā sukkā sukkasaŋkhātā,||
ye dhammā asevitabbā asevitabbasaŋkhātā,||
ye dhammā sevitabbā sevitabbasaŋkhātā,||
ye dhammā nālamariyā nālamariyasaŋkhātā,||
ye dhammā alamariyā alamariyasaŋkhātā,||
tyāssa dhammā paññāya vodiṭṭhā honti vocaritā honti.|| ||

Idaɱ vuccati bhikkhave paññābalaɱ.|| ||

Katamañ ca bhikkhave viriyabalaɱ?|| ||

4. Ye'dhammā akusalā akusalasaŋkhātā,||
ye dhammā sāvajjā sāvajjasaŋkhātā,||
ye dhammā kaṇhā kaṇhasaŋkhātā,||
ye dhammā asevitabbā asevitabbasaŋakhātā,||
ye dhammā nālamariyā nālamariyasaŋkhātā,||
tesaɱ dhammānaɱ pahānāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Ye'dhammā kusalā kusalasaŋkhātā,||
ye dhammā anavajjā anavajjasaŋkhātā,||
ye dhammā sukkā sukkasaŋkhātā,||
ye dhammā sevitibbā sevitabba- [364] saŋkhātā,||
ye dhammā alamariyā alamariyasaŋkhātā,||
tesaɱ dhammānaɱ paṭilābhāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Idaɱ vuccati bhikkhave viriyabalaɱ.|| ||

Katamañ ca bhikkhave, anavajjabalaɱ?|| ||

5. Idha bhikkhave ariyasāvako anavajjena kāyakammena samannāgato hoti,||
anavajjena vacīkammena samannāgato hoti,||
anavajjena manokammena samannāgato hoti.|| ||

Idaɱ vuccati bhikkhave anavajjabalaɱ.|| ||

Katamañ ca bhikkhave, saŋgahabalaɱ?|| ||

6. Cattār'imāni bhikkhave saŋgahavatthuni:|| ||

Dānaɱ peyyavajjaɱ atthacariyā samānattatā.|| ||

Etad aggaɱ bhikkhave,||
dānānaɱ yad idaɱ dhammadānaɱ.|| ||

Etad aggaɱ bhikkhave,||
peyyavajjānaɱ,||
yad idaɱ atthikassa ohitasotassa punappunaɱ dhammaɱ deseti.|| ||

Etad aggaɱ bhikkhave,||
atthacariyānaɱ,||
yad idaɱ assaddhaɱ saddhāsampadāya samādapeti niveseti patiṭṭhāpeti,||
dussīlaɱ sīlasampadāya samādapeti nivesati patiṭṭhāpeti,||
maccharīɱ cāgasampadāya samādapeti niveseti patiṭṭhāpeti||
duppaññe paññāsampadāya samādapeti niveseti patiṭṭhāpeti.|| ||

Etad aggaɱ bhikkhave, samānattatānaɱ,||
yad idaɱ sotāpanno sotāpannassa samānatto,||
sakadāgāmī sakadāgāmissa samānatto,||
anāgāmī anāgāmissa samānatto,||
arahaɱ arahato samānatto.|| ||

Idaɱ vuccati bhikkhave saŋgahabalaɱ.|| ||

Imāni kho bhikkhave cattāri balānī ti.|| ||

7. Imehi kho bhikkhave catuhi balehi samannāgato ariyasāvako pañca bhayāni samatikkanto hoti.|| ||

Katamāni pañca?|| ||

8. Ājīvikabhayaɱ,||
asilokabhayaɱ,||
parisasārajjabhayaɱ,||
[365] maraṇabhayaɱ,||
duggatibhayaɱ.|| ||

Sa kho so bhikkhave ariyasāvako iti paṭisañcikkhati:|| ||

9. Nāhaɱ ājīvikabhayassa bhāyāmi.|| ||

Kissāhaɱ ājīvikabhayassa bhāyissāmi?|| ||

Atthi me cattāri balāni:|| ||

Paññābalaɱ,||
viriyabalaɱ,||
anavajjabalaɱ,||
saŋgahabalaɱ.|| ||

Duppañño kho ājīvikabhayassa bhāyeyya,||
kusīto ājīvikabhayassa bhāyeyya,||
sāvajjakāyakammanto, vacīkammanto, manokammanto, ājīvikabhayassa bhāyeyya,||
asaŋgāhako ājīvikabhayassa bhāyeyya.|| ||

10. Nāhaɱ asilokabhayassa bhāyāmi.|| ||

Kissāhaɱ asilokabhayassa bhāyissāmi?|| ||

Atthi me cattāri balāni:|| ||

Paññābalaɱ,||
viriyabalaɱ,||
anavajjabalaɱ,||
saŋgahabalaɱ.|| ||

Duppañño kho asilokabhayassa bhāyeyya,||
kusīto ājīvikabhayassa bhāyeyya,||
sāvajjakāyakammanto, vacīkammanto, manokammanto, ājīvikabhayassa bhāyeyya,||
asaŋgāhako ājīvikabhayassa bhāyeyya.|| ||

11. Nāhaɱ parisasārajjabhayassa bhāyāmi,||
kissāhaɱ parisasārajjabhayassa bhāyissāmi.|| ||

Atthi me cattāri balāni:|| ||

Paññābalaɱ,||
viriyabalaɱ,||
anavajjabalaɱ,||
saŋgahabalaɱ.|| ||

Duppañño kho parisasārajjabhayassa bhāyeyya,||
kusīto parisasārajjabhayassa bhāyeyya,||
sāvajjakāyakammanto vacīkammanto manokammanto parisasārajjabhayassa bhāyeyya,||
asaŋgāhako parisasārajjabhayassa bhāyeyya.|| ||

12. Nāhaɱ maraṇabhayassa bhāyāmi,||
kissāhaɱ maraṇabhayassa bhāyissāmi.|| ||

Atthi me cattāri balāni:|| ||

Paññābalaɱ,||
viriyabalaɱ,||
anavajjabalaɱ,||
saŋgahabalaɱ.|| ||

Duppañño kho maraṇabhayassa bhāyeyya,||
kusīto maraṇabhayassa bhāyeyya,||
sāvajjakāyakammanto vacīkammanto manokammanto marabhayassa bhāyeyya,||
asaŋgāhako marabhayassa bhāyeyya.|| ||

13. Nāhaɱ duggatibhayassa bhāyāmi,||
kissāhaɱ duggatibhayassa bhāyissāmi.|| ||

Atthi me cattāri balāni:|| ||

Paññābalaɱ,||
viriyabalaɱ,||
anavajjabalaɱ,||
saŋgahabalaɱ.|| ||

Duppañño kho duggatibhayassa bhāyeyya,||
kusīto duggatibhayassa bhāyeyya,||
sāvajjakāyakammanto vacīkammanto manokammanto duggatibhayassa bhāyeyya,||
asaŋgāhako duggatibhayassa bhāyeyya.|| ||

Imehi kho bhikkhave catuhi balehi samannāgato ariyasāvako imāni pañcabhayāni samatikkanto hotī ti.|| ||

 


Contact:
E-mail
Copyright Statement   Webmaster's Page