Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 12

Sa-upādisesa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[351]

[1][pts][bd][upal] Evaɱ me sutaɱ.|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Atha kho āyasmā Sāriputto pubbaṇhasamayaɱ nivāsetvā pattacīvaram ādāya Sāvatthiɱ piṇḍāya pāvisi.|| ||

Atha kho āyasmato Sāriputtassa etad ahosi:|| ||

'Atippago kho tāva Sāvatthiyaɱ piṇḍāya carituɱ, yan nūnāhaɱ yena aññatitthiyānaɱ paribbājakānaɱ ārāmo ten'upasaŋkameyyan' ti.|| ||

Atha kho āyasmā Sāriputto yena aññatitthiyānaɱ paribbājakānaɱ ārāmo ten'upasaŋkamī.|| ||

Upasaŋkamitvā tehi aññatitthiyehi paribbājakehi saddhiɱ sammodi,||
sammodanīyaɱ kathaɱ sārāṇīyaɱ vītisāretvā eka-m-antaɱ nisīdi.|| ||

2. Tena kho pana samayena tesaɱ aññatitthiyānaɱ paribbājakānaɱ sannisnnānaɱ sannipatitānaɱ ayam antarākathā udapādi:||
'So hi koci āvuso sa-upādiseso kālaɱ karoti,||
sabbo so aparimutto nirayā,||
aparimutto tiracchānayoniyā,||
aparimutto pettivisayā,||
aparimutto apāya duggati vinipātā' ti.|| ||

3. Atha kho āyasmā Sāriputto tesaɱ aññatitthiyānaɱ paribbājakānaɱ bhāsitaɱ n'eva abhinandi, na paṭikkosi.|| ||

Anabhinanditvā appaṭikositvā uṭṭhāy āsanā pakkāmi,||
'Bhagavato santike etassa bhāsitassa atthaɱ ājānissāmī' ti.|| ||

Atha kho āyasmā Sāriputto Sāvatthiyaɱ piṇḍāya caritvā pacchāhattaɱ piṇḍapātapaṭikkanto yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Sāriputto Bhagavantaɱ etad avoca:|| ||

'Idāhaɱ bhante pubbaṇhasamayaɱ nivāsetvā pattacīvaram ādāya Sāvatthiɱ piṇḍāya pāvisiɱ.|| ||

Tassa mayhaɱ bhante etad ahosi:|| ||

'Atippago kho tāva Sāvatthiyaɱ piṇḍāya carituɱ,||
yan nūnāhaɱ yena aññatitthiyānaɱ paribbājakānaɱ ārāmo ten'upasaŋkameyyan' ti.|| ||

Atha khvāhaɱ bhante yena aññatitthiyānaɱ paribbājakānaɱ ārāmo ten'upasaŋkamiɱ,||
upasaŋkamitvā tehi aññatitthiyehi paribbājakehi saddhiɱ sammodiɱ.|| ||

Sammodanīyaɱ kathaɱ sārāṇīyaɱ vītisāretvā eka-m-antaɱ nisīdiɱ.|| ||

Tena kho pana bhante samayena tesaɱ aññatitthiyānaɱ paribbājakānaɱ sannisinnānaɱ sannipatitānaɱ ayam antarākatha udapādi:|| ||

'Yo hi koci āvuso sa-upādiseso kālaɱ karoti,||
sabbo so aparimutto nirayā,||
aparimutto tiracchānayoniyā,||
aparimutto pettivisayā,||
aparimutto apāyaduggativinipātā' ti.|| ||

Atha khvāhaɱ bhante tesaɱ aññatitthiyānaɱ paribbājakānaɱ bhāsitaɱ n'eva abhinandiɱ na paṭikkosiɱ.|| ||

Anabhinanditvā appaṭikkositvā uṭṭhāy āsanā pakkāmiɱ:|| ||

'Bhagavato santike etassa bhāsitassa atthaɱ ājānissāmi' ti.|| ||

4. Keci Sāriputta aññatitthiyā paribbājakā bālā akhyattā,||
keci sa-upādisesaɱ vā sa-upādiseso ti jānissanti,||
anupādisesaɱ vā anupādiseso ti jānissanti.|| ||

Nava yime Sāriputta puggalā sa-upādisesā kālaɱ kurumānā parimuttā nirayā,||
parimutto tiracchānayoniyā,||
parimuttā pettivisayā,||
parimuttā apāyaduggativinipātā.|| ||

Katame nava?|| ||

5. Idha Sāriputta ekacco puggalo||
sīlesu paripūrakārī hoti,||
samādhismiɱ paripūrakārī||
paññāya na paripūrakāri.|| ||

So pañcannaɱ orambhāgiyānaɱ saŋyojānanaɱ parikkhayā||
antarāparinibbāyī hoti.|| ||

Ayaɱ Sāriputta, paṭhamo puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

6. Puna ca paraɱ Sāriputta idh'ekacco puggalo||
sīlesu paripūrakārī hoti,||
samādhismiɱ paripūrakārī,||
paññāya na paripūrakāri.|| ||

So pañcannaɱ orambhāgiyānaɱ saŋyojānanaɱ parikkhayā upahaccaparinibbāyī hoti.|| ||

Ayaɱ Sāriputta, dutiyo puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

Puna ca paraɱ Sāriputta idh'ekacco puggalo||
sīlesu paripūrakārī hoti,||
samādhismiɱ paripūrakārī,||
paññāya na paripūrakāri.|| ||

So pañcannaɱ orambhāgiyānaɱ saŋyojānanaɱ parikkhayā asankhāraparinibbāyī hoti.|| ||

Ayaɱ Sāriputta, tatiyo puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

Puna ca paraɱ Sāriputta idh'ekacco puggalo||
sīlesu paripūrakārī hoti,||
samādhismiɱ paripūrakārī,||
paññāya na paripūrakāri.|| ||

So pañcannaɱ orambhāgiyānaɱ saŋyojānanaɱ parikkhayā sasankhāraparinibbāyī hoti.|| ||

Ayaɱ Sāriputta, catuttho puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

Puna ca paraɱ Sāriputta idh'ekacco puggalo||
sīlesu paripūrakārī hoti,||
samādhismiɱ paripūrakārī||
paññāya na paripūrakāri.|| ||

So pañcannaɱ orambhāgiyānaɱ saŋyojānanaɱ parikkhayā uddhaɱsoto hoti akaṇiṭṭhagāmī.|| ||

Ayaɱ Sāriputta, pañcamo puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

7. Puna ca paraɱ Sāriputta, idh'ekacco puggalo,||
sīlesu paripūrakārī hoti,||
samādhismiɱ na paripūrakārī||
paññāya na paripūrakāri.|| ||

So tiṇṇaɱ saŋyojānanaɱ parikkhayā rāgadosamohānaɱ tanuttā sakadāgāmī hoti,||
sakid eva imaɱ lokaɱ āgantvā dukkhass'antaɱ karoti.|| ||

Ayaɱ Sāriputta, chaṭṭho puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

8. Puna ca paraɱ Sāriputta idh'ekacco puggalo||
sīlesu paripūra kārī hoti,||
samādhismiɱ na paripūrakāri,||
paññāya na paripūrakāri.|| ||

So tiṇṇaɱ saŋyojānanaɱ parikkhayā ekabījī hoti,||
ekaɱ yeva mānusakaɱ bhavaɱ nibbattetvā dukkhass'antaɱ karoti.|| ||

Ayaɱ Sāriputta sattamo puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

9. Puna ca paraɱ Sāriputta idh'ekacco puggalo||
sīlesu paripūrakārī hoti,||
samādhismiɱ mattasokārī,||
paññāya mattasokārī.|| ||

So tiṇṇaɱ saŋyojānanaɱ parikkhayā kolaŋkolo hoti,||
dve vā tīṇi vā kulāni sandhāvitvā saŋsaritvā dukkhass'antaɱ karoti.|| ||

Ayaɱ Sāriputta, aṭṭhamo puggalo sopādisoso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

10. Puna ca paraɱ Sāriputta idh'ekacco puggalo||
sīlosu paripūrakārī hoti||
samādhismiɱ mattasokārī,||
paññāya mattasokārī.|| ||

So tiṇṇaɱ saŋyojānanaɱ parikkhayā sattakkhattuparamo hoti,||
sattakkhattuparamaɱ deve ca mānuse ca sandhāvitvā saŋsaritvā dukkhass'antaɱ karoti.|| ||

Ayaɱ Sāriputta navamo puggalo sa-upādiseso kālaɱ kurumāno parimutto nirayā,||
parimutto tiracchānayoniyā,||
parimutto pettivisayā,||
parimutto apāyaduggativinipātā.|| ||

Keci Sāriputta aññatitthiyā paribbājakā bālā avyattā,||
keci sa-upādisesaɱ vā sa-upādisesao ti jānissanti.|| ||

Anupādisesaɱ vā anupādiseso jānissanti.|| ||

Ime kho Sāriputta nava puggalā sa-upādisesā kālaɱ kurumānā parimuttā nirayā,||
parimuttā tiracchānayoniyā,||
parimuttā pettivisayā,||
parimuttā apāyaduggativinipātā.|| ||

Na tāvāyaɱ Sāriputta dhammapariyāyo paṭibhāsi bhikkhūnaɱ bhikkhunīnaɱ upāsakānaɱ upāsikānaɱ.|| ||

Taɱ kissa hetu?|| ||

Mā yimaɱ dhammapariyāyaɱ sutvā pamādaɱ āhariɱsu,||
api ca mayā Sāriputta dhammapariyāyo pañhādhippāyena bhāsito ti.|| ||


Contact:
E-mail
Copyright Statement   Webmaster's Page