Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 18

Navaŋāguposatha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][upal] Evaɱ me sutaɱ.|| ||

Sāvatthinidānaɱ.|| ||

Navah'aŋgehi samannāgato Bhikkhave uposatho upavuttho mahapphalo hoti mahānisaɱso mahājutiko mahāvipphāro.|| ||

Kathaɱ upavuttho ca bhikkhave,||
navah'aŋgehi samannāgato uposatho mahapphalo hoti mahānisaɱso mahājutiko mahāvipphāro?|| ||

2. Idha, bhikkhave, ariyasāvako iti paṭisañcikkhati:|| ||

"Yāvajīvaɱ arahanto pāṇātipātaɱ pahāya pāṇātipātā paṭiviratā nihitadaṇḍā nihitasatthā lajjī dayāpannā sabbapāṇabhutahitānukampī viharanti.|| ||

Aham p'ajja imañ ca rattiɱ imañ ca divasaɱ pāṇātipātaɱ pahāya pāṇātipātā paṭivirato nihitadaṇḍo nihitasattho lajjī dayāpanno sabba-pāṇā-bhuta-hitānukampī viharāmi.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā paṭhamena aŋgena samannāgato hoti.|| ||

3. "Yāvajīvaɱ arahanto adinnādānaɱ pahāya adinnādānā paṭiviratā dinnādāyī dinna-pāṭikaŋkhī athenena sucibhutena attanā viharanti.|| ||

Aham p'ajja imañ ca rattiɱ imañ ca divasaɱ adinnādānaɱ pahāya adinnādānā paṭivirato dinnādāyī dinna-pāṭikaŋkhī athenena sucibhutena attanā viharāmi.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā dutiyena aŋgena samannāgato hoti.|| ||

4. "Yāvajīvaɱ arahanto abrahmacariyaɱ pahāya brahmacārī ārā-cāraviratā methunā gāmadhammā.|| ||

Aham p'ajja imañ ca rattiɱ imañ ca divasaɱ abrahmacārinaɱ pahāya brahmacārī ārā-cāraviratā methunā gāmadhammā.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā tatiyena aŋgena samannāgato hoti.|| ||

5. "Yāvajīvaɱ arahanto musā-vādaɱ pahāya musāvādā paṭiviratā saccavādī saccasandhā thetā paccayikā avisaɱvādakā lokassa.|| ||

Aham p'ajja imañ ca rattiɱ imañ ca divasaɱ musā-vādā pahāya musāvādā paṭivirato saccavādī saccasandhā theto paccayikā avisaɱvādakā lokassa.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā catutthena aŋgena samannāgato hoti.|| ||

6. "Yāvajīvaɱ arahanto surāmeraya majjapamādaṭṭhānaɱ pahāya surāmeraya majjapamādaṭṭhānā paṭiviratā.|| ||

Aham p'ajja imañ ca rattiɱ imañ ca divasaɱ surāmeraya majjamādaṭṭhānaɱ pahāya surāmeraya majjapamādaṭṭhānā paṭivirato.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā pañcamena aŋgena samannāgato hoti.|| ||

7. "Yāvajīvaɱ arahanto ekahattikā rattuparatā vikāla-bhojanā.|| ||

Aham p'ajja imañ ca rattiɱ imañ ca divasaɱ ekahattiko rattuparato vikāla-bhojano.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā chaṭṭhena aŋgena samannāgato hoti.|| ||

8. Yāvajīvaɱ arahanto naccagītavāditavisūkadassanamālāgandhavilepanadhāraṇamaṇḍanavibhusanaṭṭhānā paṭiviratā.|| ||

Aham p'ajja imañ ca rattiɱ imañ ca divasaɱ naccagītavāditavisūkadassanamālāgandhavilepanadhāraṇamaṇḍanavibhusanaṭṭhānā paṭivirato.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā sattamena aŋgena samannāgato hoti.|| ||

9. Yāvajīvaɱ arahanto uccā-sayana-mahāsayanaɱ pahāya uccā-sayana-mahāsayanā paṭiviratā nīcaseyyaɱ kappenti mañcake vā tiṇasanthārake vā.|| ||

Aham p'ajja imañ ca rattiɱ imañ ca divasaɱ uccā-sayana-mahāsayanaɱ pahāya uccā-sayana-mahāsayanā paṭivirato nīcaseyyaɱ kappemi mañcake vā tiṇasanthārake vā.|| ||

Imānā p'aŋgena arahataɱ anukaromi,||
uposatho ca me upavuttho bhavissatī" ti.|| ||

Iminā aṭṭhamena aŋgena samannāgato hoti.|| ||

10. Idha, bhikkhave, ariyasāvako mettāsahagatena cetasā ekaɱ disaɱ pharitvā viharati,||
tathā dutiyaɱ disaɱ pharitvā viharati,||
tathā tatiyaɱ disaɱ pharitvā viharati||
tathā catutthaɱ disaɱ pharitvā viharati.|| ||

Iti uddham adho tiriyaɱ sabbadhi sabbattatāya sabbāvantaɱ lokaɱ mettāsahagatena cetasā vipulena mahaggatena appamāṇena averena avyāpajjhena pharitvā viharati.|| ||

Iminā navamena aŋgena samannāgato hoti.|| ||

Evaɱ ca upavuttho kho bhikkhave,||
navahaŋgasa samannāgato uposatho mahapphalo hoti mahānisaɱso mahājutiko mahāvipphāro ti.|| ||

 


Contact:
E-mail
Copyright Statement   Webmaster's Page