Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 20

Velāma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

[392]


 

[1][pts][ati][upal] Evaɱ me sutaɱ ekaɱ samayaɱ Bhagavā Sāvātthiyaɱ viharati Jetavane Anāthapiṇḍikassa ārāme.|| ||

Atha kho Anāthapiṇḍiko gahapati yena Bhagavā ten'upasaŋkami,||
upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho Anāthapiṇḍikaɱ gahapatiɱ Bhagavā etad avoca:|| ||

Api nū te gahapati, kule dānaɱ dīyatīti?|| ||

Dīyati me bhante, kule dānaɱ,||
tañ ca kho lūkhaɱ kaṇājakaɱ bilaŋgadutiyan ti.|| ||

2. Lukhañ ce pi gahapati,||
dānaɱ deti paṇītaɱ vā,||
tañ ca asakkaccaɱ deti,||
acittikatvā deti,||
asahatthā deti,||
apaviddhaɱ deti,||
anāgamanadiṭṭhiko deti;||
yattha yattha tassa tassa dānassa vipāko nibbattati,||
na uḷārāya bhattabhogāya cittaɱ namati,||
na uḷārāya vatthabhogāya cittaɱ namati,||
na uḷārāya yānabhogāya cittaɱ namati,||
na uḷāresu pañcasu kāmaguṇesu bhogāya cittaɱ namati.|| ||

Ye pi'ssa te [393] honti puttā ti vā dārā ti vā dāsā ti vā pessā ti vā kammakarā ti vā,||
te pi na sussusanti,||
na sotaɱ odāhanti,||
na aññācittaɱ upaṭṭhapenti.|| ||

Taɱ kissa hetu?|| ||

Evaɱ h'etaɱ gahapati,||
hoti asakkaccakatānaɱ kammānaɱ vipāko.|| ||

3. Lukhañ ce pi gahapati,||
dānaɱ deti paṇītaɱ vā,||
tañ ca sakkaccaɱ deti,||
cittikatvā deti,||
sahatthā deti,||
anapaviddhaɱ deti,||
āgamanadiṭṭhiko deti;||
yattha yattha tassa tassa dānassa vipāko nibbattati,||
uḷārāya bhattabhogāya cittaɱ namati,||
uḷārāya vatthabhogāya cittaɱ namati,||
uḷārāya yānabhogāya cittaɱ namati,||
uḷāresu pañcasu kāmaguṇesu bhogāya cittaɱ namati.|| ||

Ye pi'ssa te honti puttā ti vā dārā ti vā dāsā ti vā pessā ti vā kammakarā ti vā||
te pi sussusanti,||
sotaɱ odahanti,||
aññācittaɱ upaṭṭhapenti.|| ||

Taɱ kissa hetu?|| ||

Evaɱ h'etaɱ gahapati,||
hoti sakkaccakatānaɱ kammānaɱ vipāko.|| ||

4. Bhūtapubbaɱ gahapati,||
Velāmo nāma brāhmaṇo ahosi.|| ||

So evarūpaɱ dānaɱ adāsi mahādānaɱ:|| ||

Caturāsīti suvaṇṇapātisahassāni adāsi rūpiya pūrāni,||
caturāsīti rūpiyapātisahassāni adāsi suvaṇṇapurāni,||
caturāsīti kaɱsapātisahassāni adāsi hiraññapurāni,||
caturāsīti hatthisahassāni adāsi sovaṇṇālaŋkārāni sovaṇṇadhajāni hemajālasañchannāni||
caturāsīti rathasahassāni adāsi sīhavammaparivārāni vyāgghacammaparivārāni dīpicammaparivārāni paṇḍukambalaparivārāni sovaṇṇālaŋkārāni sovaṇṇadhajāni hemajālasañchannāni||
caturāsīti dhenusahassāni adāsi dukulasanthanāni kaɱsūpadhāraṇāni,||
caturāsīti kaññāsahassāni adāsi āmuttamaṇikuṇḍalāyo,||
caturāsīti pallaŋkasahassāni [394] adāsi goṇakatthatāni paṭikattatāni paṭalikatthatāni kādalimigapavarapacc'attharaṇāni,||
sā-uttaracchadāni ubhato lohitakūpadhānāni,||
caturāsīti vatthakoṭisahassāni adāsi khomasukhumānaɱ koseyyasukhumānaɱ kambalasukhumānaɱ kappāsikasukhumānaɱ||
ko pana vādo annassa pānassa khajjassa bhojjassa leyyassa peyyassa?|| ||

Najjo maññe vissandati.|| ||

5. Siyā kho pana te gahapati.|| ||

Evam assa "Añño nūna tena samayena Velāmo brāhmaṇo ahosi||
so taɱ dānaɱ adāsi mahādānan' ti.|| ||

Na kho pan'etaɱ gahapati,||
evaɱ daṭṭhabbaɱ.|| ||

Ahaɱ tena samayena Velāmo brāhmaṇo ahosiɱ,||
ahaɱ taɱ dānaɱ adāsiɱ mahādānaɱ.|| ||

Tasmiɱ kho pana gahapati,||
dāne na koci dakkhiṇeyyo ahosi||
na taɱ koci dakkhinaɱ visodheti.|| ||

Yaɱ gahapati, Velāmo brāhmaṇo dānaɱ adāsi, mahādānaɱ,||
yo c'ekaɱ dīṭṭhisampannaɱ bhojeyya,||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca sataɱ diṭṭhisampannānaɱ bhojeyya,||
yo c'ekaɱ sakadāgāmiɱ bojeyya,||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca sataɱ sakadāgāmīnaɱ bhojeyya,||
yo c'ekaɱ anāgāmiɱ bojeyya,||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca sataɱ anāgāminaɱ bhojeyya,||
yo c'ekaɱ arahantaɱ bhojeyya,||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca sataɱ arahantaɱ bhojeyya,||
yo c'ekaɱ paccekabuddhaɱ bhojeyya,||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca paccekabuddhānaɱ bhojeyya,||
yo ca Tathāgataɱ arahantaɱ Sammā-sambuddhaɱ bhojeyya||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca buddhapamūkhaɱ bhikkhusaŋghaɱ bhojeyya,
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca cātudadisaɱ saŋghaɱ uddissa vihāraɱ kārāpeyya||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca pasannacitto buddañ ca dhammañ ca saŋghañ ca saraṇaɱ gaccheyya||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo ca pasannacitto sikkhāpadāni samādiyeyya pāṇātipātā veramaṇīɱ,||
adinnādānā veramaṇīɱ,||
kāmesu micchācārā veramaṇiɱ,||
musā-vādā veramaṇiɱ,||
surāmerayamajjapamādaṭṭhānā veramaṇiɱ,||
yo ca antamaso gaddūhanamattam pi,||
mettacittaɱ bhāveyya,||
idaɱ tato mahapphalataraɱ.|| ||

Yañ ca gahapati Velāmo brāhmaṇo dānaɱ adāsi mahādānaɱ,||
yo c'ekaɱ diṭṭhisampannaɱ bhojeyya,||
yo ca sataɱ diṭṭhisampannānaɱ bhojeyya,||
yo cekaɱ sakadāgāmiɱ bhojeyya,||
yo ca sataɱ sakadāgāmīnaɱ bhojeyya,||
yo cekaɱ anāgāmiɱ bhojeyya,||
yo ca sataɱ anāgāmīnaɱ bhojeyya,||
yo cekaɱ arahantaɱ bhojeyya,||
yo ca sataɱ arahantānaɱ bhojeyya,||
yo cekaɱ paccekabuddhaɱ bhojeyya,||
yo ca sataɱ paccekabuddhānaɱ bhojeyya.|| ||

Yo ca Tathāgataɱ arahantaɱ Sammā-sambuddhaɱ bhojeyya,||
yo ca Buddhapamūkhaɱ bhikkhu-saŋghaɱ bhojeyya,||
yo ca cātuddisaɱ saŋghaɱ uddissa vihāraɱ kārāpeyya,||
yo ca pasannacitto Buddhañ ca dhammañ ca saŋghañ ca saraṇaɱ gaccheyya,||
yo ca pasanna citto sikkhāpadāni samādiyye pāṇātipāti veramaṇī,||
adinnādānā veramaṇī,||
kāmesumicchācārā veramaṇī,||
musā-vādā veramaṇī,||
surāmerayamajjapamādaṭṭhānā veramaṇī.|| ||

Yo ca antamaso gadduhanamattam pi mettacittaɱ bhā- [396] veyya,||
yo ca accharāsaŋaghātāmattam pi aniccasaññaɱ bhāveyya,||
idaɱ tatato mahapphalataranti.|| ||

Sīhanādavaggo dutiyo|| ||

 


Contact:
E-mail
Copyright Statement   Webmaster's Page