Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta
III. Sattāvāsa Vaggo

Sutta 24

Sattāvāsa Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] Evaɱ me sutaɱ ekaɱ samayaɱ Bhagavā Sāvātthiyaɱ viharati Jetavane Anāthapiṇḍikassa ārāme.|| ||

Nava bhikkhave, taṇhā mūlake dhamme desessāmi.|| ||

Taɱ suṇātha, sādhukaɱ manasikarotha, bhāsissāmī ti.|| ||

Evaɱ bhante ti kho te bhikkhu Bhagavato paccassosuɱ.|| ||

Bhagavā etad avoca:|| ||

Nava ime bhikkhave, sattāvāsā.|| ||

Katame nava?|| ||

2. Santi, bhikkhave, sattā nānattakāyā nānatta saññino,||
seyyathā pi manussā ekacce ca devā ekacce ca vinipātikā.|| ||

Ayaɱ paṭhamo sattāvāso.|| ||

3. Santi, bhikkhave, sattā nānattakāyā ekattasaññino||
seyyathā pi devā Brahmakāyikā paṭhamāhi nibbattā.|| ||

Ayaɱ dutiyo sattāvāso.|| ||

4. Santi, bhikkhave, sattā ekattakāyā nānattasaññino||
seyyathā pi devā Ābhāssarā.|| ||

Ayaɱ tatiyo sattāvāso.|| ||

5. Santi, bhikkhave, sattā ekattakāyā ekattasaññino||
seyyathā pi devā Subhakiṇṇā.|| ||

Ayaɱ catuttho sattāvāso.|| ||

6. Santi, bhikkhave, sattā asaññino appaṭisaɱvedino,||
seyyathā pi devā Asaññasattā.|| ||

Ayaɱ pañcamo sattāvāso.|| ||

7. Santi, bhikkhave, sattā sabbaso rūpa-saññānaɱ samatikkamā||
paṭigha-saññānaɱ atthaŋgamā||
nānattasaññānaɱ amanasi-kārā||
'anatto ākāso' ti||
ākāsānañcāyatanūpagā.|| ||

Ayaɱ chaṭṭho sattāvāso.|| ||

8. Santi, bhikkhave, sattā sabbaso ākāsānañcāyatanaɱ samatikkamma||
'anattaɱ viññāṇan' ti||
viññāṇañcāyatanūpagā.|| ||

Ayaɱ sattamo sattāvāso.|| ||

9. Santi, bhikkhave, sattā sabbaso viññāṇañcāyatanaɱ samatikkamma||
'n'atthi kiñci' ti||
ākiñcaññāyatanūpagā.|| ||

Ayaɱ aṭṭhamo sattāvāso.|| ||

10. Santi, bhikkhave, sattā sabbaso ākiñcaññāyatanaɱ samatikkamma||
n'eva-saññā-nāsaññāyatanūpagā.|| ||

Ayaɱ navamo sattāvāso.|| ||

Ime kho bhikkhave nava sattāvāsā ti.|| ||

 


Contact:
E-mail
Copyright Statement   Webmaster's Page