Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta
III. Sattāvāsa Vaggo

Sutta 28

Dutiya Verabhaya Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvātthiyaɱ viharati Jetavane Anāthapiṇḍikassa ārāme,||
tatra kho Bhagavā bhikkhu āmantesi.|| ||

2. Yato kho bhikkhave ariyasāvakassa pañca bhayāni verāni vūpasantāni honti,||
catuhi ca sotāpattiyaŋgehi samannāgato hoti,||
so ākaŋkhamāno attanā va attānaɱ vyākareyya:|| ||

'Khīṇanirayo'mih,||
khīṇatiracchānayoni,||
khīṇapettivisayo,||
khīṇāpāyaduggativinipāto,||
sotāpanno'ham asmi,||
avinipātadhammo niyato sambodhiparāyano.|| ||

3. Katamāni pañca bhayāni verāni vūpasantāni honti?|| ||

Yaɱ bhikkhave pāṇātipātī pāṇātipātappaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedetī.|| ||

Pāṇātipātā paṭivirato n'eva diṭṭhadhammakam pi bhayaɱ veraɱ pasavati,||
na samparāyikam pi bhayaɱ veraɱ pasavati,||
na cetasikam pi dukkhaɱ domanassaɱ paṭisaɱvedeti.|| ||

Pāṇātipātā paṭiviratassa evaɱ taɱ bhayaɱ veraɱ vūpasantaɱ hoti.|| ||

4. Yaɱ bhikkhave adinnādāyī adinnānappaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedetī.|| ||

Adinnādānā paṭivirato n'eva diṭṭhadhammakam pi bhayaɱ veraɱ pasavati,||
na samparāyikam pi bhayaɱ veraɱ pasavati,||
na cetasikam pi dukkhaɱ domanassaɱ paṭisaɱvedeti.|| ||

Adinnādānā paṭiviratassa evaɱ taɱ bhayaɱ veraɱ vūpasantaɱ hoti.|| ||

5. Yaɱ bhikkhave kāmesu micchācārī kāmesu-micchācārappaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedatī.|| ||

Kāmesu micchācārā paṭivirato n'eva diṭṭhadhammakam pi bhayaɱ veraɱ pasavati,||
na samparāyikam pi bhayaɱ veraɱ pasavati,||
na cetasikam pi dukkhaɱ domanassaɱ paṭisaɱvedati.|| ||

Kāmesu micchācārā paṭiviratassa evaɱ taɱ bhayaɱ veraɱ vūpasantaɱ hoti.|| ||

6. Yaɱ bhikkhave musāvādī musāvādāppaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedatī.|| ||

Musāvādā paṭivirato n'eva diṭṭhadhammakam pi bhayaɱ veraɱ pasavati,||
na samparāyikam pi bhayaɱ veraɱ pasavati,||
na cetasikam pi dukkhaɱ domanassaɱ paṭisaɱvedati.|| ||

Musāvādā paṭiviratassa evaɱ taɱ bhayaɱ veraɱ vūpasantaɱ hoti.|| ||

7. Yaɱ bhikkhave surāmerayamajjapamādaṭṭhāyī surāmerayamajjapamādaṭṭhānappaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaɱvedatī.|| ||

Surāmerayamajjapamādaṭṭhānā paṭivirato n'eva diṭṭhadhammakam pi bhayaɱ veraɱ pasavati,||
na samparāyikam pi bhayaɱ veraɱ pasavati,||
na cetasikam pi dukkhaɱ domanassaɱ paṭisaɱvedati.|| ||

Surāmerayamajjapamādaṭṭhānā paṭiviratassa evaɱ taɱ bhayaɱ veraɱ vūpasantāni hoti.|| ||

Imāni pañca bhayāni verāni vūpasanthāni honti.|| ||

8. Katamehi catuhi sotāpattiyaŋgehi samannāgato hoti?|| ||

Idha bhikkhave ariyasāvako Buddhe aveccappasādena samannāgato hoti:|| ||

'Iti pi so Bhagavā arahaɱ sammāsambuddho vijjācaraṇasampanno sugato lokavidū anuttaro purisadammasārathī Satthā deva-manussānaɱ buddho Bhagavā' ti.|| ||

9. Dhamme aveccappasādena samannāgato hoti.|| ||

'Svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī' ti.|| ||

10. Saŋghe aveccappasādena samannāgato hoti.|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho ñāyapaṭipanno Bhagavato sāvakasaŋgho,||
sāmīcipaṭipanno Bhagavato sāvakasaŋgho,||
yad idaɱ cattāri purisayugāni aṭṭha purisapuggalā,||
esa Bhagavato sāvakasaŋgho āhuneyyo pāhuneyyo dakkhineyyo añjalikaraṇīyo anuttaraɱ puññakkhettaɱ lokassā' ti.|| ||

Ariyakantehi sīlehi samannāgato hoti,||
akhaṇḍehi acachiddehi asabalehi akammāsehi bhujissehi viññūppasatthehi aparāmaṭṭhehi samādhisaɱvattanikehi.|| ||

Imehi catuhi sotāpāttiyaŋgehi samannāgato hoti.|| ||

11. Yato kho bhikkhave ariyasāvakassa imāni pañca bhayāni verāni vūpasantāni honti,||
imehi ca catuhi sotāpāttiyaŋgehi samannāgato hoti,||
so ākaŋkhamāno attanā'va attānaɱ vyākareyya:|| ||

'Khīṇa nirayo'mhi,||
khīṇatiracchānayoni,||
khīṇapettivisayo,||
khīṇaapāyaduggativinipāto,||
sotāpanno'ham asmi,||
avinipātadhammo niyato sambodhiparāyano ti.|| ||

 


Contact:
E-mail
Copyright Statement   Webmaster's Page