Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 34

Nibbānasukha Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati] Evaɱ me sutaɱ.|| ||

Ekaɱ samayaɱ āyasmā Sāriputto Rājagahe viharati Veḷuvane Kalandakanivāpe,||
tatra kho āyasmā Sāriputto bhikkhu āmantesi āvuso Bhikkhavo ti.|| ||

Āvusoti kho te bhikkhu āyasmato Sāriputtassa paccassosuɱ.|| ||

Āyasmā Sāriputto etad avoca:|| ||

Sukham idaɱ āvuso nibbānaɱ sukhaɱ idaɱ āvuso, nibbānanti.|| ||

Evaɱ vutte āyasmā Udāyī āyasmantaɱ Sāriputtaɱ etad avoca: kiɱ [415] pan'ettha āvuso Sāriputta sukhaɱ yadettha n'atthi vedayitanti? Etad eva khottha.|| ||

Āvuso sukhaɱ, yadettha n'atthi vedayitaɱ.|| ||

Pañc'ime āvuso kāmaguṇā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā||
ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā||
jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā||
kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho āvuso pañca kāmaguṇe paṭicca uppajjati sukhaɱ somanassaɱ.|| ||

Idaɱ vuccatāvuso kāmasukhaɱ.|| ||

1. Idh'āvuso bhikkhu vivicc'eva kāmehi vivicca akusalehi dhammehi paṭhamaɱ jajhānaɱ upasampajja viharati.|| ||

Tassa ce āvuso bhikkhuno iminā vihārena viharato kāmasahagatā saññāmanasikārā samudācaranti,||
svāssa hoti ābādho.|| ||

Seyyathā pi āvuso sukhino dukkhaɱ uppajjeyya,||
yāvad eva ābādhāya,||
evam ev'assa te kāmasahagatā saññāmanasikārā samudācaranti svāssa hoti ābādho,||
yo kho pan'āvuso ābādho dukkhame taɱ vuttaɱ Bhagavatā.|| ||

Iminā pi kho etaɱ āvuso pariyāyena veditabbaɱ yathāsukhaɱ nibbānanti.|| ||

2. Puna ca paraɱ āvuso bhikkhu vitakka-vicārānaɱ vūpasamā ajjhattaɱ sampasādanaɱ cetaso ekodi-bhāvaɱ avitakkaɱ avicāraɱ samādhijaɱ pīti-sukhaɱ dutiyaɱ-jhānaɱ upasampajja viharati.|| ||

Tassa ce āvuso, bhikkhuno iminā vihārena viharato vitakkasahagatā saññāmanasikārā [416] samudācaranti,||
svāssa hoti ābādho.|| ||

Seyyathā pi āvuso sukhino dukkhaɱ uppajjeyya yāvad eva ābādhāya,||
evam ev'assa te vitakkasahagatā saññāmanasikārā samudācaranti.|| ||

Svāssa hoti ābādho.|| ||

Yo kho pan'āvuso ābādho dukkhame taɱ vuttaɱ Bhagavatā.|| ||

Iminā pi kho etaɱ āvuso pariyāyena veditabbaɱ yathāsukhaɱ nibbānanti.|| ||

3. Puna ca paraɱ āvuso pītiyā ca virāgā upekkhako ca viharati.|| ||

Sato ca sampajāno sukhañ ca kāyena paṭisaŋvedeti.|| ||

Yantaɱ ariyā āvikkhanti:||
'Upekkhako satimā sukha-vihārī' ti taɱ tatiyaɱ-jhānaɱ upasampajja viharati.|| ||

Tassa te āvuso bhikkuno iminā vihārena viharato pītisahagatā saññāmanasikārā samudācaranti,||
svāssa hoti ābādho.|| ||

Seyyathā pi āvuso, sukhino dukkhaɱ uppajjeyya yāvad eva ābādhāya,||
evam ev'assa te pītisahagatā saññāmanasikārā samudācaranti svāssa hoti ābādho.|| ||

Yo kho pan'āvuso, ābādho dukkhame taɱ vuttaɱ Bhagavatā.|| ||

Iminā pi kho etaɱ āvuso,||
pariyāyena veditibbaɱ yathāsukhaɱ nibbānanti.|| ||

Puna ca paraɱ āvuso,||
bhikkhu sukhassa ca pahānā dukkhassa ca pahānā pubb'eva somanassa-domanassānaɱ atthaŋgamā adukkha-m-asukhaɱ upekkhā-sati-pārisuddhiɱ catutthaɱ-jhānaɱ upasampajja viharati.|| ||

Tassa ce āvuso,||
bhikkhuno iminā vihārena viharato upekkhā sahagatā [417] saññāmanasikārā samudācaranti,||
svāssa hoti ābādho.|| ||

Seyyathā pi āvuso,||
sukhino dukkhaɱ uppajjeyya yāvad eva ābādhāya,||
evam ev'assa te upekkhā sahagatā saññāmanasikārā samudācaranti,||
svāssa hoti ābādho.|| ||

Yo kho pan'āvuso,||
ābādho dukkhame taɱ vuttaɱ Bhagavatā.|| ||

Iminā pi kho etaɱ āvuso,||
pariyāyena veditabbaɱ yathāsukhaɱ nibbānanti.|| ||

6. Puna ca paraɱ āvuso bhikkhu sabbaso ākāsānañcāyatanaɱ samatikkamma 'Anantaɱ viññāṇan' ti viññāṇañcāyatanaɱ upasampajja viharati.|| ||

Tassa ce āvuso bhikkhuno iminā vihārena viharato ākāsānāñcāyatanasahagatā saññā manasikārā samudācaranti,||
svāssa hoti ābādho.|| ||

Seyyathā pi āvuso sukhino dukkhaɱ uppajjeyya yāvad eva ābādhāya,||
evam assa te ākāsānañcāyatanasahagatā saññā manasikārā samudācaranti.|| ||

Svāssa hoti ābādho,||
yo kho pan'āvuso ābādho,||
dukkhame taɱ vuttaɱ Bhagavatā.|| ||

Iminā pi kho etaɱ āvuso pariyāyena veditibbaɱ yathā sukhaɱ nibbānanti.|| ||

7. Puna ca paraɱ āvuso bhikkhu sabbaso viññāṇañcāyatanaɱ samatikkamma n'atthi kiñci' ti ākiñcaññāyatanaɱ upasampajja viharati.|| ||

Tassa ce āvuso,||
bhikkhuno iminā vihārena viharato viññāṇañcāyatana sahagatā saññāmanasikārā samudācaranti,||
svāssa hoti ābādho.|| ||

Seyyathā pi āvuso,||
sukhino dukkhā uppajjeyya yāvad eva ābādhāya.|| ||

Evam ev'assa te viññāṇañcāyatanasahagatā saññāmanasikārā samudācaranti,||
svāssa hoti ābādho.|| ||

Yo kho pan'āvuso ābādho dukkhame taɱ vuttaɱ Bhagavatā.|| ||

Iminā pi kho etaɱ āvuso pariyāyena veditabbaɱ yathāsukhaɱ nibbāyanti.|| ||

8. Puna ca paraɱ āvuso bhikkhu sabbaso ākiñcaññāyatanaɱ samatikamma n'eva-saññā-nāsaññāyatanaɱ upasampajja viharati.|| ||

Tassa ce āvuso bhikkhuno iminā viharena viharato ākiñcaññāyatanasahagatā saññāmanasikārā samudācaranti,||
svāssa hoti ābādho.|| ||

Seyyathā pi āvuso sukhino dukkhaɱ uppajjeyya yāvad eva ābādhāya.|| ||

Evam ev'assa te ākiñcaññāyatanasahagatā saññāmanasikārā samudācaranti,||
svāssa hoti ābādho.|| ||

Yo kho pan'āvuso ābādho,||
dukkhame taɱ vuttaɱ Bhagavatā.|| ||

Iminā pi kho etaɱ āvuso,||
pariyāyena veditabbaɱ yathāsukhaɱ nibbānanti.|| ||

9. Puna ca paraɱ [418] āvuso bhikkhu sabbaso n'eva-saññā-nāsaññāyatanaɱ samatikkamma saññāvedayitanirodhaɱ upasampajja viharati,||
paññāyaɱ vassa disvā āsavā parikkhīṇā honti.|| ||

Iminā pi kho etaɱ āvuso pariyāyena veditabbaɱ yathā sukhaɱ nibbānanti.|| ||

 


Contact:
E-mail
Copyright Statement   Webmaster's Page