Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 39

Devāsurasaŋgāma Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati] Evaɱ me sutaɱ:|| ||

Sāvatthinidānaɱ.|| ||

Bhūtapubbaɱ bhikkhave,||
devāsurasaŋgāmo samūpabbuḷho ahosi.|| ||

Tasmiɱ kho pana bhikkhave,||
saŋgāme asurā jiniɱsu devā parājiyiɱsu.|| ||

Parājitā ca bhikkhave devā apayaɱsveva,||
uttarena mukhā abhiyaɱsu asurā.|| ||

Atha kho bhikkhave,||
devānaɱ etad ahosi:|| ||

'Abhiyant eva kho asurā yan nūna mayaɱ dutiyam pi asurehi saŋgāmemayyāmā' ti.|| ||

[2] Dutiyam pi kho bhikkhave,||
devā asurehi saŋgāmesuɱ.|| ||

Dutiyam pi kho bhikkhave,||
asurā va jiniɱsu,||
devā parājiyiɱsu.|| ||

Parājitā ca bhikkhave devā bhītā apayaɱsveva uttarenābhimukhā abhiyaɱsu asurā.|| ||

Atha kho bhikkhave devānaɱ etad ahosi:|| ||

'Abhiyant'eva kho asurā,||
yan nūna mayaɱ tatiyam pi asurehi saŋgāmeyyāmā' ti.|| ||

[3] Tatiyam pi kho bhikkhave,||
devā asurehi saŋgāmesuɱ.|| ||

Tatiyam pi kho bhikkhave,||
asurā va jiniɱsu,||
devā parājiyiɱsu.|| ||

Parājitā ca bhikkhave devā bhītā devapuraɱ yeva pavisiɱsu.|| ||

Devapuragatānañ ca pana bhikkhave,||
devānaɱ etad ahosi:|| ||

'Biruttānagatena kho dāni mahaɱ etarahi attanā viharāma akaraṇīyā asurehī' ti.|| ||

Asurānam pi bhikkhave,||
etad ahosi:|| ||

'Bhīruttānagatena kho dāni devā etarahi attanā viharanti akaraṇīyā amhehī' ti.|| ||

Bhutapubbaɱ bhikkhave,||
devāsurasaŋgāmo samūpabbuḷho ahosi.|| ||

Tasmiɱ kho pana bhikkhave,||
saŋgāme devā jīniɱsu,||
asurā parājiyisu.|| ||

Parājitā ca bhikkhave asurā apayaɱsveva dakkhiṇenābhimukhā abhiyaɱsu devā.|| ||

Atha kho bhikkhave,||
asurānaɱ etad ahosi:|| ||

'Abhiyant'eva kho devā,||
yan nūna mayaɱ dutiyam pi devehi saŋgāmeyyāmā' ti.|| ||

Dutiyam pi kho bhikkhave,||
asurā devehi saŋgāmesuɱ.|| ||

Dutiyam pi kho bhikkave,||
devā'va jiniɱsu,||
asurā parājiɱsu.|| ||

Parājitā ca bhikkhave, asurā apayaɱsveva,||
dakkhiṇenābhimukhā abhiyaɱsu devā.|| ||

Atha kho bhikkhave asurānaɱ etad ahosi:|| ||

"Abhiyant'eva kho devā,||
yan nūna mayaɱ tatiyam pi devehi saŋgāmeyyāmā ti.|| ||

Tatiyam pi kho bhikkhave,||
asurā devehi saŋgāmesuɱ|| ||

Tatiyam pi kho bhikkhave, devā va jiniɱsu,||
asurā parājiyiɱsu.|| ||

Parājitā ca bhikkhave,||
asurā bhītā asurapuraɱ yeva pavisiɱsu,||
asurapuragatānañ ca pana bhikkhave,||
asurānaɱ etad ahosi:|| ||

'Bhīruttānagatena kho dāni mayaɱ etarahi attanā viharāma akaraṇiyā devehī' ti.|| ||

Devānām pi bhikkhave, etad ahosi:|| ||

'Bhīruttānagatena kho dāni asurā etarahi attanā viharanti akaraṇiyā amhehī' ti.|| ||

Evam eva kho bhikkhave,||
yasmiɱ samaye bhikkhu
vivicc'eva kāmehi||
vivicca akusalehi dhammehi||
savitakkaɱ savicāraɱ||
vivekajaɱ pīti-sukhaɱ||
paṭhamaɱ-jhānaɱ upasampajja viharati.|| ||

Tasmiɱ bhikkhave samaye bhikkhussa evaɱ hoti:|| ||

"Bhīruttānagatena kho dānāhaɱ etarahi attanā viharāmi akaraṇīyo Mārassā' ti.|| ||

Mārassa pi bhikkhave pāpimato evaɱ hoti:|| ||

'Bhīruttānagatena kho dāni bhikkhu etarahi attanā viharati akaraṇīyo mayhan' ti.|| ||

Yasmiɱ bhikkhave samaye bhikkhu
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhijaɱ pīti-sukhaɱ||
dutiyaɱ-jhānaɱ upasampajja viharati.|| ||

Tasmiɱ bhikkhave samaye bhikkhussa evaɱ hoti:|| ||

"Bhīruttānagatena kho dānāhaɱ etarahi attanā viharāmi akaraṇīyo Mārassā' ti.|| ||

Mārassa pi bhikkhave pāpimato evaɱ hoti:|| ||

'Bhīruttānagatena kho dāni bhikkhu etarahi attanā viharati akaraṇīyo mayhan' ti.|| ||

Pītiyā ca virāgā upekkhako ca||
viharati sato ca sampajāno,||
sukhañ ca kāyena paṭisaŋvedeti,||
yaɱ taɱ ariyā āvikkhanti upekkhako satimā sukhavihārī ti,||
tatiyaɱ-jhānaɱ upasampajja viharati.|| ||

Tasmiɱ bhikkhave samaye bhikkhussa evaɱ hoti:|| ||

"Bhīruttānagatena kho dānāhaɱ etarahi attanā viharāmi akaraṇīyo Mārassā' ti.|| ||

Mārassa pi bhikkhave pāpimato evaɱ hoti:|| ||

'Bhīruttānagatena kho dāni bhikkhu etarahi attanā viharati akaraṇīyo mayhan' ti.|| ||

Sukhassa ca pahānā dukkhassa ca pahānā||
pubb'eva somanassa-domanassānaɱ atthaŋgamā||
adukkhaɱ-asukhaɱ upekkhā-sati-pārisuddhiɱ||
catutthaɱ-jhānaɱ upasampajja viharati.|| ||

Tasmiɱ bhikkhave,||
samaye bhikkhussa evaɱ hoti:|| ||

'Bhīruttānagatena kho dānāhaɱ etarahi attanā viharāmi akaraṇīye Mārassā' ti.|| ||

Mārassā pi bhikkhave pāpimato evaɱ hoti:|| ||

'Bhīruttānagatena kho dāni bhikkhu etarahi attanā viharati akaraṇīyo mayhan' ti.|| ||

[9] Yasmiɱ bhikkhave samaye bhikkhu
sabbaso rūpa-saññānaɱ samatikkamā paṭigasaññānaɱ atthaŋgamā nānattasaññānaɱ amanasi-kārā 'ananto ākāso' ti,||
Ākāsānañcāyatanaɱ upasampajja viharati.|| ||

Ayaɱ vuccati bhikkhave,||
bhikkhu antam akāsi Māraɱ apadaɱ vadhitvā Māracakkhuɱ adassanaɱ gato pāpimato.|| ||

[10] Yasmiɱ bhikkhave, samaye bhikkhu sabbaso ākāsānañcāyatanaɱ samatikkamma||
'anantaɱ viññāṇan' ti||
viññāṇañcāyatanaɱ upasampajja viharati.|| ||

Ayaɱ vuccati bhikkhave,||
bhikkhu antam akāsi Māraɱ apadaɱ vadhitvā Māracakkhuɱ adassanaɱ gato pāpimato.|| ||

Puna ca paraɱ bhikkhave,||
bhikkhu sabbaso viññāṇañcāyatanaɱ samatikkamma||
'n'atthi kiñcī' ti||
ākiñcaññāyatanaɱ upasampajja viharati.|| ||

Ayaɱ vuccati bhikkhave,||
bhikkhu antam akāsi Māraɱ apadaɱ vadhitvā Māracakkhuɱ adassanaɱ gato pāpimato.|| ||

Puna ca paraɱ bhikkhave,||
bhikkhu sabbaso ākiñcaññāyatanaɱ samatikkamma||
n'eva-saññā-nāsaññāyatanaɱ upasampajja viharati.|| ||

Ayaɱ vuccati bhikkhave,||
bhikkhu antam akāsi Māraɱ apadaɱ vadhitvā Māracakkhuɱ adassanaɱ gato pāpimato.|| ||

Puna ca paraɱ bhikkhave,||
bhikkhu sabbaso n'eva-saññā-nāsaññāyatanaɱ samatikkamma||
saññāvedayitanirodhaɱ upasampajja viharati.|| ||

Paññāya c'assa disvā āsavā parikkhiṇā honti:|| ||

Ayaɱ vuccati bhikkhave, bhikkhu antaɱ akāsi Māraɱ apadaɱ vadhitvā Māracakkhuɱ adassanaɱ gato pāpimato tiṇṇo loke visattikan ti.|| ||

 


Contact:
E-mail
Copyright Statement   Webmaster's Page