Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta

Sutta 43

Kāyasakkhi Suttaɱ

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

[1][pts][ati] Evaɱ me sutaɱ:|| ||

"Kāyasakkhi kāyasakkhī" ti āvuso vuccati,||
kittāvatā nu kho āvuso kāyāsākkhi vutto Bhagavatā ti.|| ||

Idh'āvuso bhikkhu vivicc'eva kāmehi vivicca akusalehi dhammehi||
savitakkaɱ savicāraɱ||
vivekajaɱ pīti-sukhaɱ||
paṭhamaɱ-jhānaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu||
vitakka-vicārānaɱ vūpasamā||
ajjhattaɱ sampasādanaɱ||
cetaso ekodi-bhāvaɱ||
avitakkaɱ avicāraɱ||
samādhijaɱ pīti-sukhaɱ||
dutiyaɱ-jhānaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu||
pītiyā ca virāgā upekkhako ca viharati||
Sato ca sampajāno sukhañ ca kāyena paṭisaŋvedeti||
Yan taɱ ariyā āvikkhanti:||
'upekkhako satimā sukhavihārī' ti||
tatiyaɱ-jhānaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu||
sukhassa ca pahānā||
dukkhassa ca pahānā||
pubb'eva somanassa-domanassānaɱ atthaŋgamā||
adukkha-m-asukhaɱ upekkhā sati pārisuddhiɱ||
catutthaɱ-jhānaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu||
sabbaso rūpa-saññānaɱ samatikkamma||
paṭigha-saññānaɱ atthaŋgamā||
nānattasaññānaɱ amanasi-kārā 'anatto ākāso' ti||
ākāsānañcāyatanaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena,|| ||

Puna ca paraɱ āvuso, bhikkhu||
sabbaso ākāsānañcāyatanaɱ samatikkamma||
'anantaɱ viññāṇan' ti||
viññāṇañcāyatanaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu||
sabbaso viññāṇañcāyatanaɱ samatikkamma||
'n'atthi kiñci' ti||
ākiñcaññāyatanaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu sabbaso||
ākiñcaññāyatanaɱ samatikkamma||
n'eva-saññā-nāsaññāyatanaɱ upasampajja viharati.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā pariyāyena.|| ||

Puna ca paraɱ āvuso bhikkhu||
sabbaso n'eva-saññā-nāsaññāyatanaɱ samatikkamma||
saññāvedayitanirodhaɱ upasampajja viharati.|| ||

Paññāya c'assa disvā āsavā parikkhīṇā honti.|| ||

Yathā yathā ca tad āyatanaɱ tathā tathā naɱ kāyena phassitvā viharati.|| ||

Ettāvatā pi kho āvuso kāyasakkhi vutto Bhagavatā nippariyāyenā ti.|| ||

 


Contact:
E-mail
Copyright Statement   Webmaster's Page