Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Anguttara Nikāya
Navaka Nipāta
Sammappadhāna Vaggo

Adapted from the 1995 edition of the digital version of the Sri Lanka Buddha Jayanti Tripitaka Series and proofed against, and mostly resolved to the Pali Text Society Aŋguttara-Nikāya edited by Prof. E. Hardy, PhD., D.D..

 


 

Sutta 73

Sikkhādubbalya Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañcamāni bhikkhave sikkhādubbalyāni.|| ||

Katamāni pañca?|| ||

Pāṇātipāto,||
adinnādānaɱ,||
kāmesu miccācāro,||
musāvādo,||
surāmerayamajjapamādaṭṭhānaɱ.|| ||

Imāni kho bhikkhave pañca sikkhā dubbalyāni.|| ||

Imesaɱ kho bhikkhave pañcannaɱ sikkhādubbalyānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ sikkhādubbalyānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 74

Nīvaraṇa Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañcimāni bhikkhave nivaraṇāni.|| ||

Katamāni pañca?|| ||

Kāmacchandanīvaraṇaɱ,||
vyāpādanīvaraṇaɱ, thīnamiddhanīvaraṇaɱ,||
uddhaccakukkuccanīvaraṇaɱ,||
vicikicchānīvaraṇaɱ.|| ||

Imāni kho bhikkhave pañca nīvaraṇāni.|| ||

Imesaɱ kho bhikkhave pañcannaɱ nīvaraṇānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ nīvaraṇānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 75

Kāmaguṇa Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañc'ime bhikkhave kāmaguṇā.|| ||

Katame pañca?|| ||

Cakkhuviññeyyā rūpā iṭṭhā kantā manāpā piyarūpā kāmūpasaɱhitā rajanīyā.|| ||

Sotaviññeyyā saddā iṭṭhā kantā manāpā piyarūpā kāmūpasaɱhitā rajanīyā||
ghānaviññeyyā gandhā iṭṭhā kantā manāpā piyarūpā kāmūpasaɱhitā rajanīyā||
jivhāviññeyyā rasā iṭṭhā kantā manāpā piyarūpā kāmūpasaɱhitā rajanīyā||
kāyaviññeyyā phoṭṭhabbā iṭṭhā kantā manāpā piyarūpā kāmūpasaɱhitā rajanīyā.|| ||

Ime kho bhikkhave pañca kāmaguṇā.|| ||

Imesaɱ kho bhikkhave pañcannaɱ kāmaguṇānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ kāmaguṇānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 76

Upādānakkhandha Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañc'ime bhikkhave upādānakkhandā.|| ||

Katame pañca?|| ||

Rūpupādānakkhandho,||
vedanūpādānakkhandho,||
saññūpādānakkhandho,||
sankhārūpādānakkhandho,||
viñnūpādānakkhandho.|| ||

Ime kho bhikkhave, pañcūpādānakkhandhā.|| ||

Imesaɱ kho bhikkhave pañcannaɱ upādānakkhandānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ upādānakkhandānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 77

Orambhāgiya Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañcamāni bhikkhave orambhāgiyāni saññojanāni.|| ||

Katamāni pañca?|| ||

Sakkāyadiṭṭhi,||
vicikiccā,||
sīlabbataparāmāso,||
kāmacchando,||
khyāpādo.|| ||

Imāni kho bhikkhave pañcorambhāgiyāni saññojanāni.|| ||

Imesaɱ kho bhikkhave pañcannaɱ orambhāgiyānaɱ saññojanānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ orambhāgiyānaɱ saññojanānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 78

Gati Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañcimā bhikkhave gatiyo.|| ||

Katame pañca?|| ||

Nirayo,||
tiracchānayoni,||
pettivisayo,||
manussā,||
devā.|| ||

Imā kho bhikkhave pañca gatiyo.|| ||

Imāsaɱ kho bhikkhave pañcannaɱ gatīnaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imāsaɱ kho bhikkhave pañcannaɱ gatīnaɱ pahānāya||
ime cattāro sammappadhānā bhāvetabbā ti.|| ||

 


 

Sutta 79

Macchariya Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañcimāni bhikkhave macchariyāni.|| ||

Katamāni pañca?|| ||

Āvāsamacchariyahaɱ,||
kulamacchariyaɱ,||
lābhamacchariyaɱ,||
vaṇṇamacchariyaɱ,||
dhammamacchariyaɱ.|| ||

Imāni kho bhikkhave pañca macchariyāni.|| ||

Imesaɱ kho bhikkhave, pañcannaɱ macchariyānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave, pañcannaɱ macchariyānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 80

Uddhamabhāgiya Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañcimāni bhikkhave, uddhamabhāgiyāni saññojanāni.|| ||

Katamāni pañca?|| ||

Rūparāgo,||
arūparāgo,||
māno,||
uddhaccaɱ,||
avijjā.|| ||

Imāni kho bhikkhave pañcuddhambhāgiyāni saññojanāti.|| ||

Imesaɱ kho bhikkhave pañcannaɱ uddhamabhāgiyānaɱ saññojanānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ uddhamabhāgiyānaɱ saññojanānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 81

Cetokhila Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañc'ime bhikkhave cetokhīlā.|| ||

Katame pañca?|| ||

Idha, bhikkhave, bhikkhu satthari kaŋkhati vicikicchati nādhimuccati na sampasīdati.|| ||

Yo so bhikkhave bhikkhu satthari kaŋkhati,||
vicikicchati,||
nādhimuccati na sampasīdati,||
tassa cittaɱ na namati ātappāya anuyogāya sātaccāya padhānāya,||
yassa cittaɱ na namati ātappāya anuyogāya sātaccāya padhānāya,||
ayaɱ paṭhamo cetokhīlo.|| ||

Puna ca paraɱ bhikkhave bhikkhu dhamme kaŋkhati vicikicchati nādhimuccati na sampasīdati.|| ||

Yo so bhikkhave bhikkhu dhamme kaŋkhati,||
vicikicchati,||
nādhimuccati na sampasīdati,||
tassa cittaɱ na namati ātappāya anuyogāya sātaccāya padhānāya,||
yassa cittaɱ na namati ātappāya anuyogāya sātaccāya padhānāya,||
ayaɱ dutiyo cetokhīlo.|| ||

Puna ca paraɱ bhikkhave bhikkhu saŋghe kaŋkhati vicikicchati nādhimuccati na sampasīdati.|| ||

Yo so bhikkhave bhikkhu saŋghe kaŋkhati,||
vicikicchati,||
nādhimuccati na sampasīdati,||
tassa cittaɱ na namati ātappāya anuyogāya sātaccāya padhānāya,||
yassa cittaɱ na namati ātappāya anuyogāya sātaccāya padhānāya,||
ayaɱ tatiyo cetokhīlo.|| ||

Puna ca paraɱ bhikkhave bhikkhu sikkhāya kaŋkhati vicikicchati nādhimuccati na sampasīdati.|| ||

Yo so bhikkhave bhikkhu sikkhāya kaŋkhati,||
vicikicchati,||
nādhimuccati na sampasīdati,||
tassa cittaɱ na namati ātappāya anuyogāya sātaccāya padhānāya,||
yassa cittaɱ na namati ātappāya anuyogāya sātaccāya padhānāya,||
ayaɱ catuttha cetokhīlo.|| ||

Yo so bhikkhave bhikkhu sabrahmacārisu kupito hoti anattamano abhātacitto kilajāto,||
tassa cittaɱ na namati ātappāya anuyogāya,||
sātaccāya padhānāya.

Yassa cittaɱ na namati ātappāya anuyogāya sātaccāya,||
ayaɱ pañcamo cetokhilo.|| ||

Ime kho bhikkhave pañca cetokīlā.|| ||

Imesaɱ kho bhikkhave pañcannaɱ cetokhīlānaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ cetokhīlānaɱ pahānāya||
ime cattāro sammappadhānā bhāvetabbā ti.|| ||

 


 

Sutta 82

Vinibandha Sammappadhāna Suttaɱ

[1][pts] Evaɱ me sutaɱ:|| ||

Sāvatthinidānaɱ|| ||

Pañc'ime bhikkhave cetaso vinibandhā.|| ||

Katame pañca?|| ||

Idha, bhikkhave, bhikkhu kāmesu avītarāgo hoti avigatachando avigatapemo avigatapipāso avigatapariḷāho avigata taṇho.|| ||

Yo so bhikkhave bhikkhu kāmesu avītarāgo hoti avigatachando avigatapemo avigatapipāso avigatapariḷābho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ paṭhamo cetaso vinibandho.|| ||

Puna ca paraɱ bhikkhave bhikkhu kāye avītarāgo hoti avigatachando avigatapemo avigatapipāso avigatapariḷāho avigata taṇho.|| ||

Yo so bhikkhave bhikkhu kāye avītarāgo hoti avigatachando avigatapemo avigatapipāso avigatapariḷābho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ dutiyo cetaso vinibandho.|| ||

Puna ca paraɱ bhikkhave bhikkhu rūpe avītarāgo hoti avigatachando avigatapemo avigatapipāso avigatapariḷāho avigata taṇho.|| ||

Yo so bhikkhave bhikkhu rūpesu avītarāgo hoti avigatachando avigatapemo avigatapipāso avigatapariḷābho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya, ayaɱ tatiyo cetaso vinibandho.|| ||

Puna ca paraɱ bhikkhave bhikkhu yāvadatthaɱ udarāvadehakaɱ bhuñjitvā seyyasukhaɱ passasukhaɱ middhasukhaɱ anuyutto viharati avītarāgo hoti avigatachando avigatapemo avigatapipāso avigatapariḷāho avigata taṇho.|| ||

Yo so bhikkhave bhikkhu yāvadatthaɱ udarāvadehakaɱ bhuñjitvā seyyasukhaɱ passasukhaɱ middhasukhaɱ anuyutto viharati,||
avītarāgo hoti avigatachando avigatapemo avigatapipāso avigatapariḷābho avigatataṇho,||
tassa cittaɱ na namati ātappāya anuyogāya sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ catuttho cetaso vinibandho.|| ||

Puna ca paraɱ bhikkhave bhikkhu aññataraɱ devanikāyaɱ paṇidhāya brahmacariyaɱ carati,||
imināhaɱ sīlena vā vatena vā tapena vā brahmacariyena vā devo vā bhavissāmi devaññataro vā'ti.|| ||

Yo so bhikkhave bhikkhu aññataraɱ devanikāyaɱ paṇidhāya brahmacariyaɱ carati imināhaɱ sīlena vā vatena vā tapena vā brahmacariyena vā devo vā bhavismi devaññataro vāti,||
tassa cittaɱ na namati ātappāya anuyogāya, sātaccāya padhānāya.|| ||

Yassa cittaɱ na namati ātappāya anuyogāya sātaccāya padhānāya,||
ayaɱ pañcamo cetaso vinibandho.|| ||

Ime kho bhikkhave, pañca cetaso vinibandhā.|| ||

Imesaɱ kho bhikkhave pañcannaɱ cetaso vinibandhanaɱ pahānāya||
cattāro sammappadhānā bhāvetabbā.|| ||

Katame cattāro?|| ||

Idha, bhikkhave, bhikkhu anuppannānaɱ pāpakānaɱ akusalānaɱ dhammānaɱ||
anuppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ pāpakānaɱ akusalānaɱ dhammānaɱ||
pahānāya chandaɱ janeti vāyamati viriyaɱ ārabhati cittaɱ paggaṇhāti padahati|| ||

Anuppannānaɱ kusalānaɱ dhammānaɱ||
uppādāya chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Uppannānaɱ kusalānaɱ dhammānaɱ||
ṭhitiyā asammosāya bhīyyobhāvāya vepullāya bhāvanāya pāripūriyā chandaɱ janeti vāyamati viriyaɱ ārabhati cittaɱ paggaṇhāti padahati.|| ||

Imesaɱ kho bhikkhave pañcannaɱ cetaso vinibandhanaɱ pahānāya||
ime cattāro sammappadhānā bhāvetabbā ti.|| ||

 


Contact:
E-mail
Copyright Statement   Webmaster's Page