Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
I. Ānisaɱsa Vagga

Sutta 3

Paṭhama Upanisa Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[4]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

"Bhikkhavo" ti.|| ||

"Bhadante" ti||
te bhikkhū Bhagavato paccassosuɱ.|| ||

Bhagavā etad avoca:|| ||

"Dussīlassa bhikkhave sīlavipantassa hat'upaniso hoti avippaṭisāro.|| ||

Avippaṭisāre asati avippaṭisāravipantassa hat'upanisaɱ hoti pāmojjaɱ.|| ||

Pāmojje asati pāmojjavipantassa hatupanisā hoti pīti.|| ||

Pītiyā asati pītivipantassa hatupanisā hoti passaddhi.|| ||

Passaddhiyā asati passaddhivipantassa hat'upanisaɱ hoti sukhaɱ.|| ||

Sukhe asati sukhavipantassa hat'upaniso hoti sammāsamādhi.|| ||

Sammāsamādhimhi asati sammāsamādhivipantassa hat'upanisaɱ hoti yathābhūtañāṇadassanaɱ.|| ||

Yathābhūtañāṇadassane asati yathābhūtañāṇadassanavipantasassa hat'upaniso hoti nibbidāvirāgo.|| ||

Nibbidāvirāge asati nibbidāvirāgavipantassa hat'upanisaɱ hoti vimuttiñāṇadassanaɱ|| ||

Seyathyāpi bhikkhave rukkho sākhāpalāsavipanno.|| ||

Tassa papaṭikāpi na pāripūriɱ gacchati tacopi pheggupi sāropi na pāripūriɱ gacchati.|| ||

Evam eva kho bhikkhave dussīlassa sīlavipantassa hat'upaniso hoti avippaṭisāro, avippaṭisāre asati hat'upanisaɱ hoti pāmojjaɱ.|| ||

Pāmojje asati pāmojjavipantassa hatupanisā hoti pīti.|| ||

Pītiyā yā asati pītivipantassa hatupanisā hoti passaddhi.|| ||

Passaddhiyā asati passaddhivipantasa hat'upanisaɱ hoti sukhaɱ.|| ||

Sukhe asati sukhavipantassa hat'upaniso hoti sammāsamādhi.|| ||

Sammāsamādhimhi asati sammāsamādhi vipantassa hat'upanisaɱ hoti yathābhūtañāṇadassanaɱ.|| ||

Yathābhūtañāṇadassane asati yathābhūtañāṇadassanavipantasassa hat'upaniso hoti Nibbidāvirāgo.|| ||

Nibbidāvirāge asati nibbidāvirāgavipantassa hat'upanisaɱ hoti vimuttiñāṇadassanaɱ 'āṇadassanaɱ.|| ||

Sīlavato bhikkhave sīlasamipannassa upanisa sampanno hoti avippaṭisāro.|| ||

Avippaṭisāre sati avippaṭisārasamipannassa upanisasmapannaɱ hoti pāmojjaɱ.|| ||

Pāmojje sati pāmojjasampannassa upanisasampannā hoti pīti.|| ||

Pītiyā sati pītisampannassa upanisasampannā hoti passaddhi.|| ||

Passaddhiyā sati passasaddhisampannassa upanisasampannaɱ hoti sukhaɱ.|| ||

Sukhe sati sukhasampannassa upanisasampanno hoti sammāsamādhi.|| ||

[5] sammāsamādhimhi sati sammāsamādhisampannassa upanisasampannaɱ hoti yathābhūtañāṇadassanaɱ.|| ||

Yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo.|| ||

Nibbidāvirāge sati nibbidāvirāgasampannassa upanisasampannaɱ hoti vimuttiñāṇadassanaɱ.|| ||

seyyathā pi, bhikkhave, rukkho sākhāpalāsasamipanno tassa papaṭikāpi pāripūriɱ gacchati tacopi pheggupi sāropi pāripūriɱ gacchati.|| ||

Evam eva kho bhikkhave sīlavato sīlasampannassa upanisasampanno hoti avippaṭisāro, avippaṭisāre sati avippaṭisārasampannassa upanisasampannaɱ hoti pāmojjaɱ.|| ||

Pāmojje sati pāmojjasampannassa upanisasampannā hoti pīti.|| ||

Pītiyā sati pītisampannassa upanisasampannā hoti passaddhi.|| ||

Passaddhiyā sati passasaddhisampannassa upanisasampannaɱ hoti sukhaɱ.|| ||

Sukhe sati sukhasampannassa upanisasampanno hoti sammāsamādhi.|| ||

Sammāsamādhimhi sati sammāsamādhisampannassa upanisasampannaɱ hoti yathābhūtañāṇadassanaɱ.|| ||

Yathābhūtañāṇadassane sati yathābhūtañāṇadassanasampannassa upanisasampanno hoti nibbidāvirāgo.|| ||

Nibbidāvirāge sati nibbidāvirāgasampannassa upanisasampannaɱ hoti vimuttiñāṇadassananti.|| ||

 


Contact:
E-mail
Copyright Statement   Webmaster's Page