Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
III. Mahā Vagga

Sutta 22

Adhivuttipada Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[36]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Atha kho āyasmā Ānando yena Bhagavā ten'upasaɱkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinnaɱ kho āyasmantaɱ Ānandaɱ Bhagavā etad avoca:|| ||

Ye te Ānanda, dhammā tesaɱ tesaɱ adhivuttipadānaɱ abhiññā sacchikiriyāya saɱvattanti,||
visārado ahaɱ Ānanda tatra paṭijānāmi tesaɱ tesaɱ tathā tathā dhammaɱ desetuɱ,||
yathā yathā paṭipanno santaɱ vā 'atthī' ti ñassati,||
asantaɱ vā 'n'atthī' ti ñassati,||
hīnaɱ vā 'hīnan' ti ñassati,||
paṇītaɱ vā 'paṇītan' ti ñassati,||
sa-uttaraɱ vā 'sa-uttaran' ti ñassati,||
anuttaraɱ vā 'anuttaraɱ' ti ñassati,||
yathā yathā vā pana taɱ ñāteyyaɱ vā [37] daṭṭheyyaɱ vā sacchikātayyaɱ vā,||
tathā tathā ñassati vā dakkhati vā sacchikarissati vā ti:||
ṭhānam etaɱ vijjati.|| ||

Etad anuttariyaɱ Ānanda ñāṇānaɱ,||
yad idaɱ tattha tattha yathābhūtañāṇaɱ.|| ||

Etasmā vāhaɱ Ānanda ñāṇā aññaɱ ñāṇaɱ uttarītaraɱ vā paṇītataraɱ vā n'atthī ti vadāmi.|| ||

Dasa imāni bhikkhave Tathāgatassa Tathāgata-balāni yehi balehi samannāgato Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahamacakkaɱ pavatteti.|| ||

Katamāni dasa?|| ||

3. Idha, Ānanda, Tathāgato ṭhānañ ca ṭhānato aṭṭhānañ ca aṭṭhānato yathābhūtaɱ pajanāti.|| ||

Yam pi Ānanda, Tathāgato ṭhānañ ca ṭhānato aṭṭhānañ ca aṭṭhānato yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

4. Puna ca paraɱ Ānanda, Tathāgato atītānāgatapaccuppannānaɱ kammasamādānānaɱ ṭhānaso hetuso vipākaɱ yathābhūtaɱ pajānāti.|| ||

Yam pi Ānanda, Tathāgato atītānāgatapaccuppannānaɱ kammasamādānānaɱ ṭhānaso hetuso vipākaɱ yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

5. Puna ca paraɱ Ānanda, Tathāgato sabbatthagāminīpaṭipadaɱ yathābhūtaɱ pajānāti.|| ||

Yam pi Ānanda, Tathāgato sabbatthagāminīpaṭipadaɱ yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

6. Puna ca paraɱ Ānanda, Tathāgato anekadhātu- [34] nānādhātu-lokaɱ yathābhūtaɱ pajānāti.|| ||

Yam pi Ānanda, Tathāgato anekadhātu nānādhātu lokaɱ yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

7. Puna ca paraɱ Ānanda, Tathāgato sattānaɱ nānādhimuttikataɱ yathābhūtaɱ pajānāti.|| ||

Yam pi Ānanda, Tathāgato sattānaɱ nānādhimuttikataɱ yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

8. Puna ca paraɱ Ānanda, Tathāgato parasattātaɱ parapuggalānaɱ indriyaparopariyattaɱ yathābhūtaɱ pajānāti.|| ||

Yam pi Ānanda, Tathāgato parasattānaɱ parapuggalānaɱ indriyaparopariyattaɱ yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

9. Puna ca paraɱ Ānanda, Tathāgato jhāna-vimokkha-samādhi-sampattīnaɱ saɱkilesaɱ vodānaɱ vuṭṭhānaɱ yathābhūtaɱ pajānāti.|| ||

Yam pi Ānanda, Tathāgato jhāna-vimokkha-samādhi-samāpattīnaɱ saɱkilesaɱ vodānaɱ vuṭṭhānaɱ yathābhūtaɱ pajānāti,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

10. Puna ca paraɱ Ānanda, Tathāgato anekavihitaɱ pubbenivāsaɱ anussarati,||
seyyath'idaɱ:|| ||

Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsam pi jātiyo,||
tiɱsam pi jītiyo cattārisam [35] pi jītiyo,||
paññāsam pi jātiyo,||
jātisatam pi jātisahassam pi jātisatasahassam pi aneke pi saɱvaṭṭakappe,||
aneke pi vivaṭṭakappe,||
aneke pi saɱvaṭṭa-vivaṭṭakappe,||
amutrāsiɱ evaɱ-nāmo,||
evaɱgotto,||
evaɱ-vaṇṇo||
evam-āhāro||
evaɱ sukhadukkha paṭisaŋvedī||
evam-āyu-pariyanto.|| ||

So tato cuto amutra upapādiɱ,||
tatrāpāsim evaɱ-nāmo,||
evaɱgotto,||
evaɱ-vaṇṇo||
evam-āhāro||
evaɱ sukhadukkha paṭisaŋvedī||
evam-āyu-pariyanto.|| ||

So tato cuto idh'upapanno' ti.|| ||

Iti sākāram sa-uddesaɱ anekavihitaɱ pubbenivāsaɱ anussarati.|| ||

Yam pi Ānanda, anekavihitaɱ pubbenivāsaɱ anussarati,||
seyyath'idaɱ:|| ||

Ekam pi jātiɱ,||
dve pi jātiyo,||
tisso pi jātiyo,||
catasso pi jātiyo,||
pañca pi jātiyo,||
dasa pi jātiyo,||
vīsam pi jātiyo,||
tiɱsam pi jītiyo cattārisam pi jītiyo,||
paññāsam pi jātiyo,||
jātisatam pi jātisahassam pi jātisatasahassam pi aneke pi saɱvaṭṭakappe,||
aneke pi vivaṭṭakappe,||
aneke pi saɱvaṭṭa-vivaṭṭakappe,||
amutrāsiɱ evaɱ-nāmo,||
evaɱgotto,||
evaɱ-vaṇṇo||
evam-āhāro||
evaɱ sukhadukkha paṭisaŋvedī||
evam-āyu-pariyanto.|| ||

So tato cuto amutra upapādiɱ,||
tatrāpāsim evaɱ-nāmo,||
evaɱgotto,||
evaɱ-vaṇṇo||
evam-āhāro||
evaɱ sukhadukkha paṭisaŋvedī||
evam-āyu-pariyanto.|| ||

So tato cuto idh'upapanno' ti.|| ||

Iti sākāram sa-uddesaɱ anekavihitaɱ pubbenivāsaɱ anussarati,||
idam pi Ānanda, Tathāgatassa Tathāgatabalaɱ hoti,||
yaɱ balaɱ āgamma Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

11. Puna ca paraɱ Ānanda, Tathāgato dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti:|| ||

"Ime vata bhonto sattā kāyaduccaritena samannāgatā,||
vacī duccaritena samannāgatā,||
mano duccaritena samannāgatā||
āriyānaɱ upavādakā,||
micchādiṭṭhikā micchādiṭṭhikamma samādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime vā pana bhonto sattā kāyasucaritena samannāgatā||
vacī sucaritena samannāgatā||
mano sucaritena samannāgatā||
Ariyānaɱ anupavādakā||
sammādiṭṭhikā sammādiṭṭhikammasamādānā||
te kāyassa bhedā param maraṇā sugatiɱ saggaɱ lokaɱ upapannāti.|| ||

Iti dibbena cakkhunā visuddhena atikkanta mānusakena satte passati cavamāne uppajjamāne hīne paṇite suvaṇṇe dubbaṇṇe sugate duggate yathākammūpage satte pajānāti.|| ||

Yam pi Ānanda, Tathāgato dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate yathākammūpage satte pajānāti:|| ||

"Ime vata bhonto sattā kāyaduccaritena samannāgatā,||
vacī duccaritena samannāgatā,||
mano duccaritena samannāgatā||
āriyānaɱ upavādakā,||
micchādiṭṭhikā micchādiṭṭhikamma samādānā,||
te kāyassa bhedā param maraṇā apāyaɱ duggatiɱ vinipātaɱ Nirayaɱ upapannā.|| ||

Ime vā pana bhonto sattā kāyasucaritena samannāgatā||
vacī sucaritena samannāgatā||
mano sucaritena samannāgatā||
Ariyānaɱ anupavādakā||
sammādiṭṭhikā sammādiṭṭhikammasamādānā||
te kāyassa bhedā param maraṇā sugatiɱ saggaɱ lokaɱ upapannāti.|| ||

Iti dibbena cakkhunā visuddhena atikkanta mānusakena satte passati cavamāne uppajjamāne hīne paṇite suvaṇṇe dubbaṇṇe sugate duggate yathākammūpage satte pajānāti,||
idam pi Ānanda, Tathāgatassa Tathāgatabalaɱ hoti||
yaɱ balaɱ āgamma Tathāgato āsahaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

12. Puna ca paraɱ Ānanda, Tathāgato āsavānaɱ khayā anāsavaɱ ceto-vimuttiɱ paññā-vimuttiɱ diṭṭhe va dhamme sayaɱ abhiññā sacchikatvā upasampajja viharati.|| ||

Yam pi Ānanda, Tathāgato āsavānaɱ khayā anāsavaɱ ceto-vimuttiɱ paññā-vimuttiɱ diṭṭh'evadhamme sayaɱ abhiññā sacchikatvā upasampajja viharati,||
idam pi Ānanda, Tathāgatassa Tathāgatabalaɱ hoti||
yaɱ balaɱ āgamma Tathāgato āsahaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavatteti.|| ||

Imāni kho Ānanda, dasa Tathāgatassa Tathāgata-balāni, yehi balehi samannāgato Tathāgato āsabhaɱ ṭhānaɱ paṭijānāti,||
parisāsu sīhanādaɱ nadati,||
brahmacakkaɱ pavattetī ti.|| ||

 


Contact:
E-mail
Copyright Statement   Webmaster's Page