Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
III. Mahā Vagga

Sutta 23

Kāya Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[39]

[1][pts][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Atthi bhikkhave dhammā kāyena pahātabbā||
no vācāya.|| ||

Atthi bhikkhave dhammā vācāya pahātabbā||
no kāyena.|| ||

Atthi bhikkhave dhammā n'eva kāyena pahātabbā||
no vācāya,||
paññāya disvā disvā pahātabbā.|| ||

3. Katame ca bhikkhave dhammā kāyena pahātabbā||
no vācāya?|| ||

Idha, bhikkhave, bhikkhu akusalaɱ āpanno hoti kañci-d-eva desaɱ kāyena.|| ||

Tam enaɱ anuvicca viññū sabrahmacārī evam āhaɱsu:|| ||

"Āyasmā kho akusalaɱ āpanno kañci-d-eva desaɱ kāyena,||
sādhu vatāyasmā kāya-duccaritaɱ pahāya kāya-sucaritaɱ bhāvetu" ti.|| ||

So anuvicca viññūhi sabrahmacārīhi vuccamāno kāya-duccaritaɱ pahāya kāya-sucaritaɱ bhāveti.|| ||

Ime vuccanti bhikkhave dhammā kāyena pahātabbā no vācāya.|| ||

4. Katame ca bhikkhave dhammā vācāya pahātabbā||
no kāyena?|| ||

Idha, bhikkhave, bhikkhu akusalaɱ āpanno hoti kañci-d-eva desaɱ vācāya.|| ||

Tam enaɱ anuvivacca viññū sabrahmacārī evam āhaɱsu:|| ||

"Āyasmā kho akusalaɱ āpanno kañci-d-eva desaɱ vācāya,||
sādhu vatāyasmā vacī-duccaritaɱ pahāya vacī-sucaritaɱ bhāvetu" ti.|| ||

So anuvicca viññūhi sabrahmacārīhi vuccamāno vacī-duccaritaɱ pahāya vacī-sucaritaɱ bhāveti.|| ||

Ime vuccanti bhikkhave dhammā vācāya pahātabbā,||
no kāyena.|| ||

5. Katame ca bhikkhave dhammā n'eva kāyena pahātabbā||
no vācāya,||
paññāya disvā disvā pahātabbā?|| ||

Lobho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Doso bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Moho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Kodho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Upanāho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Makkho bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Paḷāso [40] bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Pāpikā bhikkhave issā n'eva kāyena pahātabbā no pahātabbo.|| ||

Macchariyaɱ bhikkhave n'eva kāyena pahātabbo,||
no vācāya,||
paññāya disvā disvā pahātabbo.|| ||

Pāpikā bhikkhave issā n'eva kāyena pahātabbā,||
no vācāya,||
paññāya disvā disvā pahātabbo.|| ||

6. Katamā ca bhikkhave pāpikā issā?|| ||

Idha, bhikkhave, ijjhati gahapatissa vā gahapatiputtassa vā dhanena vā dhaññena vā rajatena vā jātarūpena vā.|| ||

Tatr'aññatatarassa dāsassa vā upavāsassa vā evaɱ hoti.|| ||

"Aho vat'imassa gahapatissa vā gahapatiputtassa vā na ijjheyya dhanena vā dhaññena vā rajatena vā jātarūpena vā" ti.|| ||

Samaṇo vā pana brāhmaṇo vā lābhī hoti cīvara-piṇḍapāta-senāsanagilāna-paccaya-bhesajja-parikkhārānaɱ.|| ||

Tatr'aññatarassa samaṇassa vā brāhmaṇassa vā evaɱ hoti:|| ||

"Aho vata ayam āyasmā na lābhī assa cīvara-piṇḍapāta-senāsanagilāna-paccaya-bhesajja-parikkhārānan" ti.|| ||

Ayaɱ vuccati bhikkhave pāpikā issā.|| ||

Pāpikā bhikkhave issā n'eva kāyena pahātabbā||
no vācāya,||
paññāya disvā disvā pahātabbā.|| ||

7. Pāpikā bhikkhave icchā n'eva kāyena pahātabbā||
no vācāya,||
paññāya disvā disvā pahātabbā.|| ||

8. Katamā ca bhikkhave pāpikā icchā?|| ||

Idha, bhikkhave, ekacco assaddho samāno||
'"saddho" ti maɱ jāneyyun' ti icchati,||
dussīlo samāno||
'"sīlavā" ti maɱ jāneyyun' ti icchati,||
appassuto samāno||
'"bahussuto" ti maɱ jāneyyun' ti icchati,||
saŋgaṇikārāmo samāno||
'"pavivitto" ti maɱ jāneyyun' ti icchati,||
kusīto samāno||
'"āraddhaviriyo" ti maɱ jāneyyun' ti icchati,||
muṭṭhassati samāno||
'"upaṭṭhitasatī" ti maɱ jāneyyun' ti icchati||
asamāhito samāno||
'"samāhito" ti maɱ jāneyyun' ti icchati,||
duppañño samāno||
'"paññavā" ti maɱ jāneyyun' ti icchati,||
akhīṇāsavo samāno||
'"khīṇāsavo" ti maɱ jāneyyun' ti icchati.|| ||

[41] Ayaɱ vuccati bhikkhave pāpikā icchā.|| ||

Pāpikā bhikkhave icchā n'eva kāyena pahātabbā||
no vācāya,||
paññāya disvā disvā pahātabbā.|| ||

9. Taɱ ce bhikkhave bhikkhu, lobho abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato lobho na hoti,||
tathā h'imaɱ āyasmantaɱ lobho abhibhuyya irīyati.|| ||

Taɱ ce bhikkhave bhikkhu, doso abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato doso na hoti,||
tathā h'imaɱ āyasmantaɱ doso abhibhuyya irīyati.|| ||

Taɱ ce bhikkhave bhikkhu, moho abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato moho na hoti,||
tathā h'imaɱ āyasmantaɱ moho abhibhuyya irīyati.|| ||

Taɱ ce bhikkhave bhikkhu, kodho abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato kodho na hoti,||
tathā h'imaɱ āyasmantaɱ kodho abhibhuyya irīyati.|| ||

Taɱ ce bhikkhave bhikkhu, upanāho abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato upanāho na hoti,||
tathā h'imaɱ āyasmantaɱ upanāho abhibhuyya irīyati.|| ||

Taɱ ce bhikkhave bhikkhu, makkho abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato makkho na hoti,||
tathā h'imaɱ āyasmantaɱ makkho abhibhuyya irīyati.|| ||

Taɱ ce bhikkhave bhikkhu, paḷāso abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato paḷāso na hoti,||
tathā h'imaɱ āyasmantaɱ paḷāso abhibhuyya irīyati.|| ||

Taɱ ce bhikkhave bhikkhu, macchariyaɱ pāpikā issā abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato macchariyaɱ na hoti,||
tathā h'imaɱ āyasmantaɱ macchariyaɱ abhibhuyya irīyati.|| ||

Taɱ ce bhikkhave bhikkhu, pāpikā issā abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato pāpikā issā na hoti,||
tathā h'imaɱ āyasmantaɱ pāpikā issā abhibhuyya irīyati.|| ||

Taɱ ce bhikkhave bhikkhu, pāpikā icchā abhibhuyya irīyati,||
so evam assa veditabbo:|| ||

Na ayam āyasmā tathā pajānāti,||
yathā pajānato pāpikā icchā na hoti,||
tathā h'imaɱ āyasmantaɱ pāpikā icchā abhibhuyya irīyati.|| ||

10. Tañ ce bhikkhave bhikkhuɱ lobho nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato lobho na hoti,||
tathā h'imaɱ āyasmantaɱ lobho nābhibhuyya irīyati.|| ||

Tañ ce bhikkhave bhikkhuɱ doso nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato doso na hoti,||
tathā h'imaɱ āyasmantaɱ doso nābhibhuyya irīyati.|| ||

Tañ ce bhikkhave bhikkhuɱ moho nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato moho na hoti,||
tathā h'imaɱ āyasmantaɱ moho nābhibhuyya irīyati.|| ||

Tañ ce bhikkhave bhikkhuɱ kodho nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato kodho na hoti,||
tathā h'imaɱ āyasmantaɱ kodho nābhibhuyya irīyati.|| ||

Tañ ce bhikkhave bhikkhuɱ upanāho nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato upanāho na hoti,||
tathā h'imaɱ āyasmantaɱ upanāho nābhibhuyya irīyati.|| ||

Tañ ce bhikkhave bhikkhuɱ makkho nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato makkho na hoti,||
tathā h'imaɱ āyasmantaɱ makkho nābhibhuyya irīyati.|| ||

Tañ ce bhikkhave bhikkhuɱ paḷāso nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato paḷāso na hoti,||
tathā h'imaɱ āyasmantaɱ paḷāso nābhibhuyya irīyati.|| ||

Tañ ce bhikkhave bhikkhuɱ macchariyaɱ nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato macchariyaɱ na hoti,||
tathā h'imaɱ āyasmantaɱ macchariyaɱ nābhibhuyya irīyati.|| ||

Tañ ce bhikkhave bhikkhuɱ pāpikā issā nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato pāpikā issā na hoti,||
tathā h'imaɱ āyasmantaɱ pāpikā issā nābhibhuyya irīyati.|| ||

Tañ ce bhikkhave bhikkhuɱ pāpikā icchā nābhibhuyya irīyati,||
so evam assa veditabbo:|| ||

Tathā ayam āyasmā pajānāti,||
yathā pajānato pāpikā icchā na hoti,||
tathā h'imaɱ āyasmantaɱ pāpikā icchā nābhibhuyya irīyatī ti.|| ||

 


Contact:
E-mail
Copyright Statement   Webmaster's Page