Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
V. Akkosa Vagga

Sutta 44

Kusinārā Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Kusinārāyaɱ viharati baliharaṇe vanasaṇḍe.|| ||

Tatra kho Bhagavā bhikkhu āmantesi:|| ||

'Bhikkhavo' ti.|| ||

'Bhadante' ti te bhikkhu Bhagavato paccassosuɱ.|| ||

Bhagavā etad avoca:|| ||

2. Codakena bhikkhave bhikkhunā paraɱ codetukāmena pañca dhamme ajjhattaɱ paccavekkhitvā pañca dhamme ajjhattaɱ upaṭṭhapetvā paro codetabbo.|| ||

Katame pañca dhammā ajjhattaɱ paccavekkhitabbā?|| ||

3. Codakena bhikkhave bhikkhunā paraɱ codetukāmena evaɱ paccavekkhitabbaɱ:|| ||

"Parisuddha-kāya-samācāro nu kho'mhi,||
parisuddhen'amhi kāya-samācārena samannāgato acchiddena appaṭimaɱsena,||
saɱvijjati nu kho me eso dhammo,||
udāhu no" ti?|| ||

No ce bhikkhu parisuddha-kāya-samācāro hoti||
parisuddhena kāya-samācārena samannāgato acchiddena appaṭimaɱsena,||
tassa bhavanti vattāro:|| ||

"Iŋgha tāva āyasmā kāyikaɱ sikkhassū" ti.|| ||

Iti'ssa bhavanti vattāro.|| ||

4. Puna ca paraɱ bhikkhave codakena bhikkhunā paraɱ codetukāmena evaɱ paccavekkhitabbaɱ:|| ||

"Parisuddha-vacī-samācāro nu kho'mhi, parisuddhen'amhi, vacī-samācārena samannāgato acchiddena appaṭimaɱsena,||
saɱvijjati nu kho me eso dhammo,||
udāhu no" ti?|| ||

No ce bhikkhave bhikkhu parisuddha vacī-samācāro hoti,||
parisuddhena vacī-samācārena samannāgato acchiddena appaṭimaɱsena,||
tassa bhavanti vattāro:|| ||

"Iŋgha tāva āyasmā vācasikaɱ sikkhassū" ti.|| ||

Iti'ssa bhavanti vattāro.|| ||

[80] 5. Puna ca paraɱ bhikkhave codakena bhikkhunā paraɱ codetukāmena evaɱ paccavekkhitabbaɱ:|| ||

"Mettaɱ nu kho me cittaɱ paccupaṭṭhitaɱ sabrahmacārīsu anāghātaɱ,||
saɱvijjati nu kho me eso dhammo,||
udāhu no" ti?|| ||

No ce bhikkhave bhikkhuno mettaɱ cittaɱ paccupaṭṭhitaɱ hoti sabrahmacārīsu anāghātaɱ,||
tassa bhavanti vattāro:|| ||

"Iŋgha tāva āyasmā sabrahmacārīsu mettaɱ cittaɱ paccupaṭṭhapehī" ti.|| ||

Iti'ssa bhavanti vattāro.|| ||

6. Puna ca paraɱ bhikkhave codakena bhikkhunā paraɱ codetukāmena evaɱ paccavekkhitabbaɱ:|| ||

"Bahussuto nu kho'mhi sutadharo sutasannīcayo,||
ye te dhammā ādikalyāṇā,||
majjhe kalyāṇā,||
pariyosānakalyāṇā,||
sātthā savyañjanā kevalaparipuṇṇaɱ parisuddhaɱ brahmacariyaɱ,
abhivadanti,||
tathārūpā me dhammā bahussutā honti dhatā vacasā paricitā manasānupekkhitā diṭṭhiyā suppaṭividdhā,||
saɱvijjati nu kho me eso dhammo,||
udāhu no" ti?|| ||

No ce bhikkhave bhikkhu bahussuto hoti sutadharo sutasannīcayo,||
ye te dhammā ādikalyāṇā,||
majjhe kalyāṇā,||
pariyosānakalyāṇā,||
sātthā savyañjanā kevalaparipuṇṇaɱ parisuddhaɱ brahmacariyaɱ,||
abhivadanti,||
tathārūpāssa dhammā bahussutā honti dhatā vacasā paricitā manasānupekkhitā diṭṭhiyā suppaṭividdhā.|| ||

Tassa bhavanti vattāro:|| ||

"Iŋgha tāva āyasmā āgamaɱ pariyāpuṇassū" ti.|| ||

Iti'ssa bhavanti vattāro.|| ||

7. Puna ca paraɱ bhikkhave codakena bhikkhunā paraɱ codetukāmena evaɱ paccavekkhitabbaɱ:|| ||

"Ubhayāni nu kho me pātimokkhāni vitthārena svāgatāni honti,||
suvibhattāni suppavattīni suvinicchitāni suttaso anubyañjanaso,||
saɱvijjati nu kho me eso dhammo,||
udāhu no" ti?|| ||

No ce bhikkhave bhikkhuno ubhayāni pātimokkhāni [81] vitthārena svāgatāni honti suvibhattāni suppavattīni suvinicchitāni suttaso anubyañjanaso,||
idaɱ panāyasmā:|| ||

"Kattha vuttaɱ Bhagavatā" ti?|| ||

Iti puṭṭho na sampāyati,||
tassa bhavanti vattāro:|| ||

"Iŋgha tāva āyasmā vinayaɱ sikkhassū" ti.|| ||

Iti'ssa bhavanti vattāro.|| ||

Ime pañca dhammā ajjhattaɱ paccavekkhitabbā.|| ||

 


 

8. Katame pañca dhammā ajjhattaɱ upaṭṭhapetabbā?|| ||

9. Kālena vakkhāmi no akālena,||
bhūtena vakkhāmi no abhūtena,||
saṇhena vakkhāmi no pharusena,||
atthasaɱhitena vakkhāmi no anatthasaɱhitena,||
metta-citto vakkhāmi no dosantaro ti.|| ||

Ime pañca dhammā ajjhattaɱ upaṭṭhapetabbā.|| ||

Codakena bhikkhave bhikkhunā ime pañca dhamme ajjhattaɱ paccavekkhitvā|| ||

Ime pañca dhamme ajjhattaɱ upaṭṭhapetvā paro codetabbo ti.|| ||

 


Contact:
E-mail
Copyright Statement   Webmaster's Page