Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
V. Akkosa Vagga

Sutta 50

Bhaṇḍana Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena [89] sambahulā bhikkhu pacchābhattaɱ piṇḍapātapaṭikkantā upaṭṭhānasālāyaɱ sannisinnā sannipatitā bhaṇḍanajātā kalahajātā vivādāpannā||
aññamaññaɱ mukhasattīhi vitudantā viharanti.|| ||

Atha kho Bhagavā sāyaṇhasamayaɱ paṭisallānā vuṭṭhito yen'upaṭṭhānasālā ten'upasaŋkami.|| ||

Upasaŋkamitvā paññatte āsane nisīdi.|| ||

Nisajja kho Bhagavā bhikkhu āmantesi:|| ||

2. Kāya nu'ttha bhikkhave etarahi kathāya sannisinnā,||
kā ca pana vo antarākathā vippakatā ti?|| ||

"Idha mayaɱ bhante pacchābhattaɱ piṇḍapātapaṭikkantā upaṭṭhānasālāyaɱ sannisinnā sannipatitā bhaṇḍanajātā kalahajātā vivādāpannā||
aññamaññaɱ mukhasattīhi vitudantā viharāmā" ti.|| ||

Na kho pan'etaɱ bhikkhave tumhākaɱ paṭirūpaɱ kulaputtānaɱ saddhā agārasmā anagāriyaɱ pabbajitānaɱ,||
yaɱ tumhe bhaṇḍanajātā kalahajātā vivādāpannā,||
aññamaññaɱ mukhasantīhi vitudantā vihareyyātha"|| ||

Dasa yime bhikkhave dhammā sārāṇiyā piyakaraṇā garukaraṇā saŋgahāya avivādāya sāmaggiyā ekībhāvāya saɱvattanti.|| ||

Katame dasa?|| ||

3. Idha, bhikkhave, bhikkhu sīlavā hoti,||
pātimokkha-saɱvara-saɱvuto viharati,||
ācāra-gocara-sampanno,||
anumattesu vajjesu bhaya-dassāvī samādāya sikkhati sikkhāpadesu.|| ||

Yam pi bhikkhave bhikkhu sīlavā hoti,||
pātimokkha-saɱvara-saɱvuto viharati,||
ācāra-gocara-sampanno,||
anumattesu vajjesu bhaya-dassāvī samādāya sikkhati sikkhāpadesu,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

4. Puna ca paraɱ bhikkhave bhikkhu bahussuto hoti sutadharo sutasannīcayo,||
ye te dhammā ādikalyāṇā majjhekalyāṇā pariyosānakalyāṇā sātthaɱ savyañjanaɱ kevala paripuṇṇaɱ parisuddhaɱ brahmacariyaɱ abhivadanti,||
tathārūpāssa dhammā bahussutā honti dhatā vacasā [90] paricitā,||
manasānupekkhitā,||
diṭṭhiyā suppaṭividdhā.|| ||

Yam pi bhikkhave bhikkhu bahussuto hoti sutadharo sutasannīcayo,||
ye te dhammā ādikalyāṇā majjhekalyāṇā pariyosānakalyāṇā sātthaɱ savyañjanaɱ kevala paripuṇṇaɱ parisuddhaɱ brahmacariyaɱ abhivadanti,||
tathārūpāssa dhammā bahussutā honti dhatā vacasā paricitā,||
manasānupekkhitā,||
diṭṭhiyā suppaṭividdhā,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

5. Puna ca paraɱ bhikkhave bhikkhu kalyāṇamitto hoti kalyāṇasahāyo kalyāṇasampavaŋko.|| ||

Yam pi bhikkhave bhikkhu kalyāṇamitto hoti kalyāṇasahāyo kalyāṇasampavaḍko,
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

6. Puna ca paraɱ bhikkhave bhikkhu suvaco hoti sovacassakaraṇehi dhammehi samannāgato,||
khamo padakkhiṇāggāhī anusāsaniɱ.|| ||

Yam pi bhikkhave bhikkhu suvaco hoti sovacassakaraṇehi dhammehi samannāgato,||
khamo padakkhiṇaggāhī anusāsaniɱ,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati|| ||

7. Puna ca paraɱ bhikkhave bhikkhu yāni tāni sabrahmacārīnaɱ uccāvacāni kiŋkaraṇīyāni,||
tattha dakkho hoti analaso tatrūpāyāya vīmaɱsāya samannāgato alaɱ kātuɱ alaɱ saɱvidhātuɱ.|| ||

Yam pi bhikkhave bhikkhu yāni tāni sabrahmacārīnaɱ uccāvacāni kiŋkaraṇīyāni,||
tattha dakkho hoti analaso tatrūpāyāya vīmaɱsāya samannāgato alaɱ kātuɱ alaɱ saɱvidhātuɱ,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

8. Puna ca paraɱ bhikkhave bhikkhu dhammakāmo hoti piyasamudāhāro abhidhamme abhivinaye uḷārapāmujjo.|| ||

Yam pi bhikkhave bhikkhu dhammakāmo hoti piyasamudāhāro abhidhamme abhivinaye uḷārapāmujjo,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

9. Puna ca paraɱ bhikkhave bhikkhu āraddhaviriyo viharati akusalānaɱ dhammānaɱ pahānāya kusalānaɱ dhammānaɱ upasampadāya thāmavā daḷhaparakkamo anikkhittadhuro kusalesu dhammesu.|| ||

Yam pi bhikkhave bhikakhu āraddhaviriyo viharati akusalānaɱ dhammānaɱ [91] pahānāya kusalānaɱ dhammānaɱ upasampadāya thāmavā daḷhaparakkamo anikkhittadhuro kusalesu dhammesu,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

10. Puna ca paraɱ bhikkhave bhikkhu santuṭṭho hoti itarītara-cīvara-piṇḍapāta-senāsana-gilāna-paccaya-bhesajja-parikkhārena.|| ||

Yam pi bhikkhave bhikkhu santuṭṭho hoti itarītara-cīvara-piṇḍapāta-senāsana-gilāna-paccaya-bhesajja-parikkhārena,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

11. Puna ca paraɱ bhikkhave bhikkhu satimā hoti paramena satinepakkena samannāgato cira-katam pi cira-bhāsitam pi saritā anussaritā.|| ||

Yam pi bhikkhave bhikkhu satimā hoti paramena satinepakkena samannāgato cira-katam pi cira-bhāsitam pi saritā anussaritā,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

12. Puna ca paraɱ bhikkhave bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.|| ||

Yam pi bhikkhave bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā,||
ayam pi dhammo sārāṇīyo piyakaraṇo garukaraṇo saŋgahāya avivādāya sāmaggiyā ekībhāvāya saɱvattati.|| ||

Ime kho bhikkhave dasa dhammā sārāṇīyā piyakaraṇā garukaraṇā saŋgahāya avivādāya sāmaggiyā ekībhāvāya saɱvattantī ti.|| ||

Akkosavaggo pañcamo.|| ||

 


Contact:
E-mail
Copyright Statement   Webmaster's Page