Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VI. Sacitta Vagga

Sutta 51

Sacitta Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[92]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassaārāme.|| ||

Tatra kho Bhagavā bhikkhu āmantesi bhikkhavoti.|| ||

Bhadanteti te bhikkhu Bhagavato paccassosuɱ.|| ||

Bhagavā etad avoca.|| ||

No ce kho bhikkhave bhikkhu paracittapariyāya kusalo hoti,||
atha 'sacittapariyāya kusalo bhavissā mī'ti evaɱ hi vo bhikkhave sikkhitabbaɱ.|| ||

Kathañ ca bhikkhave bhikkhu sacittapariyāya kusalo hoti:|| ||

Seyyathā pi bhikkhave itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaɱ mukhanimittaɱ paccavekkhamāno sace tattha passati rajaɱ vā aŋgaṇaɱ vā,||
tass'eva rajassa vā aŋgaṇassa vā,||
pahānāya vāyamati.|| ||

No ce tattha passati rajaɱ vā aŋgaṇaɱ vā ten'evattamano hoti paripuṇṇasaŋkappo||
'lābhā vata me paripuṇṇaɱ vata me' ti.|| ||

Evam eva kho bhikkhave bhikkhuno paccavekkhaṇā bahūkārā hoti kusalesu dhammesu.|| ||

Abhijjhālū [93] nu kho bahulaɱ viharāmi,||
anabhijjhālū nu kho bahulaɱ viharāmi;||

vyāpannacitto nu kho bahulaɱ viharāmi,||
avyāpannacitto nu kho bahulaɱ viharāmi;||

thīnamiddha-pariyuṭṭhito nu kho bahulaɱ viharāmi,||
vigata-thīnamiddho nu kho bahulaɱ viharāmi;||

uddhatonu kho bahulaɱ viharāmi,||
anuddhato nu kho bahulaɱ viharāmi;||

vicikiccho nu kho bahulaɱ viharāmi,||
tiṇṇa-vicikiccho nu kho bahulaɱ viharāmi;||

kodhano nu kho bahulaɱ viharāmi,||
akkodhano nu kho bahulaɱ viharāmi;||

saŋkiliṭṭha-citto nu kho bahulaɱ viharāmi,||
asaŋkiliṭṭha-citto nu kho bahulaɱ viharāmi;||

sāraddhakāyo nu kho bahulaɱ viharāmi,||
asāraddhakāyo nu kho bahulaɱ viharāmi;||

kusīto nu kho bahulaɱ viharāmi,||
āraddhaviriyo nu kho bahulaɱ viharāmi;||

asamāhito nu kho bahulaɱ viharāmi,||
samāhito nu kho bahulaɱ viharāmī ti.|| ||

Sace bhikkhave bhikkhu paccavekkhamāno evaɱ jānāti:|| ||

'Abhijjhālū bahulaɱ viharāmi,||
byāpannacitto bahulaɱ viharāmi,||
thīnamiddhapariyuṭṭhito bahulaɱ viharāmi,||
uddhato bahulaɱ viharāmi,||
vicikiccho bahulaɱ viharāmi,||
kodhano bahulaɱ viharāmi,||
saɱkiliṭṭhacitto bahulaɱ viharāmi,||
sāraddhakāyo bahulaɱ viharāmi,||
kusīto bahulaɱ viharāmi,||
asamāhito bahulaɱ viharāmī' ti.|| ||

Tena bhikkhave bhikkhunā tesaɱ yeva pāpakānaɱ akusalānaɱ dhammānaɱ pahānāya adhimatto chando ca vāyāmo ca ussāho ca usso'ahī ca appaṭīvānī ca sati ca sampajaññca karaṇīyaɱ.|| ||

Seyyathā pi, bhikkhave, ādittacelo vā ādittasīso vā tass'eva celassa vā sīsassa vā nibbāpanāya adhimattaɱ chandañ ca vāyāmañ ca ussāhañ ca usso'ahiñ ca appaṭivāniñ ca satiñ ca sampajaññ ca kareyya.|| ||

Evam eva kho tena bhikkhunā tesaɱ yeva pāpakānaɱ akusalānaɱ dhammānaɱ pahānāya adhimatto chando ca vāyāmo ca ussāho ca usso'ahi ca appaṭivānī ca sati ca sampajaññca karaṇīyaɱ.|| ||

[94] Sace pana bhikkhave bhikkhu paccavekkhamāno evaɱ jānāti:|| ||

'Anabhijjhālū bahulaɱ viharāmi,||
avyāpannacitto bahulaɱ viharāmi,||
vigatathīnamiddho bahulaɱ viharāmi,||
anuddhato bahulaɱ viharāmi,||
tiṇṇavicikiccho bahulaɱ viharāmi,||
akkodhano bahulaɱ viharāmi,||
asaŋkiliṭṭha-citto bahulaɱ viharāmi,||
asāraddhakāyo bahulaɱ viharāmi,||
āraddhaviriyo bahulaɱ viharāmi,||
samāhito bahulaɱ viharāmī ti.|| ||

Tena bhikkhave bhikkhunā tesuyeva kusalesu dhammesu patiṭṭhāya uttariɱ āsavānaɱ khayāya yogo karaṇīyo ti.|| ||

 


Contact:
E-mail
Copyright Statement   Webmaster's Page