Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VI. Sacitta Vagga

Sutta 54

Samatha Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[98]

[1][pts][than][bodh] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati
Jetavane Anāthapiṇḍikassa ārāme.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. No ce bhikkhave bhikkhu paracitta-pariyāya-kusalo hoti, atha||
"sacittapariyāyakusalo bhavissāmī" ti|| ||

Evaɱ hi vo bhikkhave sikkhitabbaɱ.|| ||

3. Kathañ ca bhikkhave bhikkhu sacittapariyāya kusalo hoti?|| ||

Seyyathā pi bhikkhave itthī vā puriso vā daharo yuvā maṇḍanakajātiko ādāse vā parisuddhe pariyodāte acche vā udapatte sakaɱ mukhanimittaɱ paccavekkhamāno sace tattha passati rajaɱ vā aŋgaṇaɱ vā,||
tass'eva rajassa vā aŋgaṇassa vā,||
pahānāya vāyamati.|| ||

No ce tattha passati rajaɱ vā aŋgaṇaɱ vā ten'evattamano [99] hoti paripuṇṇasaŋkappo||
'lābhā vata me paripuṇṇaɱ vata me' ti.|| ||

Evam eva kho bhikkhave bhikkhuno paccavekkhaṇā bahukārā hoti kusalesu dhammesu.|| ||

"Lābhī nu kho'mhi ajjhattaɱ cetosamathassa,||
na nu kho'mhi lābhī ajjhattaɱ cetosamathassa,||
lābhī nu kho'mhi adhipaññā-dhamma-vipassanāya||
na nu kho'mhi lābhī adhipaññā-dhamma-vipassanāyā" ti.|| ||

4. Sace bhikkhave bhikkhu paccavekkhamāno evaɱ jānāti:|| ||

"Lābhīmhi ajjhattaɱ cetosamathassa,||
na lābhī adhipaññā-dhamma-vipassanāyā" ti,|| ||

tena bhikkhave bhikkhunā ajjhattaɱ cetosamathe patiṭṭhāya adhipaññā-dhamma-vipassanāya yogo karaṇīyo.|| ||

So aparena samayena lābhi c'eva hoti ajjhattaɱ cetosamathassa lābhī ca adhipaññā-dhamma-vipassanāya.|| ||

5. Sace pana bhikkhave bhikkhu paccavekkhamāno evaɱ jānāti:|| ||

"Lābhī'mhi adhipaññā-dhamma-vipassanāya na lābhī ajjhattaɱ cetosamatassā" ti,|| ||

tena bhikkhave bhikkhunā adhipaññā-dhamma-vipassanāya patiṭṭhāya ajjhattaɱ cetosamathe yogo karaṇīyo.|| ||

So aparena samayena lābhī c'eva hoti adhipaññā-dhamma-vipassanāya lābhī ca ajjhattaɱ cetosamathassa.|| ||

6. Sace pana bhikkhave bhikkhu paccavekkhamāno evaɱ jānāti:|| ||

"Na lābhī ajjhattaɱ cetosamathassa,||
na lābhī adhipaññā-dhamma-vipassanāyā" ti,|| ||

tena bhikkhave bhikkhunā tesaɱ yeva kusalānaɱ dhammānaɱ paṭilābhāya adhimatto||
chando ca||
vāyāmo ca||
ussāho ca||
ussoḷahi ca||
appaṭivāni ca||
sati ca||
sampajañññ ca karaṇīyaɱ.|| ||

Seyyathā pi, bhikkhave, ādittacelo vā ādittasīso vā tasse va celassa vā sīsassa vā nibbāpanāya adhimattaɱ||
chandañ ca||
vāyāmañ ca||
ussāhañ ca||
usso'ahiñ ca||
appaṭivāniñ ca||
satiñ ca||
sampajañññ ca kareyya|| ||

Evam eva kho, bhikkhave, tena bhikkhunā tesaɱ yeva kusalānaɱ dhammānaɱ,||
paṭilābhāya adhimatto||
chando ca [100]||
vāyāmo ca||
ussāho ca||
ussoḷahi ca||
appaṭivāni ca||
sati ca||
sampajaññañ ca karaṇīyaɱ.|| ||

So aparena samayena lābhīc'eva hoti ajjhattaɱ cetosamathassa lābhī ca adhipaññā-dhamma-vipassanāya.|| ||

7. Sace pana bhikkhave bhikkhu paccavekkhamāno evaɱ jānāti:|| ||

"Lābhi'mhi ajjhattaɱ cetosamathassa, lābhī adhipaññā-dhamma-vipassanāyā" ti,|| ||

tena bhikkhave bhikkhunā tesu yeva kusalesu dhammesu patiṭṭhāya uttariɱ āsavānaɱ khayāya yogo karaṇīyo.|| ||

 


 

8. Cīvarampahaɱ bhikkhave, duvidhena vadāmi,||
sevitabbam pi asevitabbam pi.|| ||

Piṇḍapātampahaɱ bhikkhave duvidhena vadāmi,||
sevitabbam pi asevitabbam pi.|| ||

Senāsanampahaɱ bhikkhave duvidhena vadāmi,||
sevitabbam pi asevitabbam pi.|| ||

Gāmanigamampahaɱ bhikkhave duvidhena vadāmi,||
sevitabbam pi asevitabbam pi.|| ||

Janapadapadesampahaɱ bhikkhave duvidhenana vadāmi,||
sevitabbam pi asevitabbam pi.|| ||

Puggalampahaɱ bhikkhave duvidhena vadāmi,||
sevitabbam pi asevitabbam pi.|| ||

9. "Cīvarampahaɱ bhikkhave duvidhena vadāmi,||
sevitabbam pi asevitabbam pi" ti.|| ||

Iti kho pan'etaɱ vuttaɱ,||
kiñ c'etaɱ paṭicca vuttaɱ?|| ||

Tattha yaɱ jaññā cīvaraɱ:|| ||

"Idaɱ kho me cīvaraɱ seveto||
akusalā dhammā abhivaḍḍhanti,||
kusalā dhammā parihāyantī" ti,||
evarūpaɱ cīvaraɱ na sevitabbaɱ.|| ||

Tattha yaɱ jaññā cīvaraɱ:|| ||

"Idaɱ kho me cīvaraɱ sevato||
akusalā dhammā parihāyanti||
kusalā dhammā abhivaḍḍhan' ti,||
eva rūpaɱ cīvara sevitabbaɱ.|| ||

Cīvaram p'ahaɱ bhikkhave duvidhena vadāmi,||
sevitabbam pi asevitabbam pi,
iti yaɱ taɱ vuttaɱ idame taɱ paṭicca vuttaɱ.|| ||

10. "Piṇḍapātampahaɱ bhikkhave duvidhena vadāmi,||
sevitabbam pi asevitabbam pi" ti.|| ||

Iti kho pan'etaɱ vuttaɱ,||
kiñ c'etaɱ paṭicca vuttaɱ?|| ||

Tattha yaɱ jaññā piṇḍapātaɱ:|| ||

"Imaɱ kho me piṇḍapātaɱ seveto||
akusalā dhammā abhivaḍḍhanti||
kusalā [101] dhammā parihāyanti" ti,||
evarūpo piṇḍapāto na sevitabbo.|| ||

Tattha yaɱ jaññā piṇḍapātaɱ:|| ||

"Imaɱ kho me piṇḍapātaɱ sevato||
akusalā dhammā parihāyanti||
kusalā dhammā abhivaḍḍhantī" ti,||
evarūpo piṇḍapāto sevitabbo.|| ||

Piṇḍapātampahaɱ bhikkhave duvidhena vadāmi,||
sevitabbam pi asevitabbam pi ti||
iti yaɱ taɱ vuttaɱ idame taɱ paṭicca vuttaɱ.|| ||

11. "Senāsanampahaɱ bhikkhave duvidhena vadāmi,||
sevitabbam pi asevitabbam pi" ti.|| ||

Iti kho pan'etaɱ vuttaɱ,||
kiñ c'etaɱ paṭicca vuttaɱ?|| ||

Tattha yaɱ jaññā senāsanaɱ:|| ||

"Idaɱ kho me senāsanaɱ sevato||
akusalā dhammā abhivaḍḍhanti,||
kusalā dhammā parihāyantī" ti,||
evarūpaɱ senāsanaɱ na sevitabbaɱ.|| ||

Tattha yaɱ jaññā senāsanaɱ:|| ||

"Idaɱ kho me senāsanaɱ sevato||
akusalā dhammā parihāyanti||
kusalā dhammā abhivaḍḍhantī" ti,||
evarūpaɱ senāsanaɱ sevitabbaɱ.|| ||

Senāsanampahaɱ bhikkhave duvidhena vadāmi, sevitabbam pi asevitabbam pī ti||
iti yaɱ vuttaɱ idame taɱ paṭicca vuttaɱ.|| ||

12. "Gāmanigamampahaɱ bhikkhave duvidhena vadāmi,||
sevitabbam pi asevitabbam pi" ti.|| ||

Iti kho pan'etaɱ vuttaɱ,||
kiñ c'etaɱ paṭicca vuttaɱ?|| ||

Tattha yaɱ jaññā gāmanigamaɱ:|| ||

"Idaɱ kho me gāmanigamaɱ sevato||
akusalā dhammā abhivaḍḍhanti||
kusalā dhammā parihāyanti" ti,||
evarūpo gāmanigamo na sevitabbo.|| ||

Tattha yaɱ jaññā gāmanigamaɱ:|| ||

"Imaɱ kho me gāmanigamaɱ sevato||
akusalā dhammā parihāyanti,||
kusalā dhammā abhivaḍḍhantī" ti,||
evarūpo gāmanigamo sevitabbo.|| ||

Gāmanigamampāhaɱ bhikkhave duvidhena vadāmi, sevitabbampi asevitabbampī ti||
iti yaɱ taɱ vuttaɱ idame taɱ paṭicca vuttaɱ.|| ||

13. "Janapadapadesampahaɱ bhikkhave duvidhena vadāmi,||
sevitabbam pi asevitabbam pi" ti.|| ||

Iti kho pan'etaɱ vuttaɱ,||
kiñ c'etaɱ paṭicca vuttaɱ?|| ||

Tattha yaɱ jaññā janapada padesaɱ:|| ||

"Imaɱ kho me janapadapadesaɱ sevato||
akusalā dhammā abhivaḍḍhanti,||
[102] kusalā dhammā parihāyantī" ti,||
evarūpo janapada padeso na sevitabbo.|| ||

Tattha yaɱ jaññā janapadapadesaɱ:|| ||

"Imaɱ kho me janapadapadesaɱ sevato||
akusalā dhammā parihāyanti||
kusalā dhammā abhivaḍḍhantī" ti,||
evarūpo janapadapadeso sevitabbo.|| ||

Janapadapadesampahaɱ bhikkhave duvidhena vadāmi,||
sevitabbam pi asevitabbampī ti||
iti yaɱ taɱ vuttaɱ idame taɱ paṭicca vuttaɱ.|| ||

14. "Puggalampahaɱ bhikkhave duvidhena vadāmi,||
sevitabbam pi asevitabbam pi" ti.|| ||

Iti kho pan'etaɱ vuttaɱ,||
kiñ c'etaɱ paṭicca vuttaɱ?|| ||

Tattha yaɱ jaññā puggalaɱ:|| ||

"Imaɱ kho me puggalaɱ sevato||
akusalā dhammā abhivaḍḍhanti||
kusalā dhammā parihāyantī" ti,||
evarūpo puggalo na sevitabbo.|| ||

Tattha yaɱ jaññā puggalaɱ:|| ||

"Imaɱ kho me puggalaɱ sevato||
akusalā dhammā parihāyanti||
kusalā dhammā abhivaḍḍhantī" ti,||
evarūpo puggalo sevitabbo.|| ||

Puggalampahaɱ bhikkhave duvidhena vadāmi,||
sevitabbam pi asevitabbam pī ti||
iti yaɱ taɱ vuttaɱ idame taɱ paṭicca vuttanti.|| ||

 


Contact:
E-mail
Copyright Statement   Webmaster's Page