Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VI. Sacitta Vagga

Sutta 55

Parihāna Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


[102]

[1][pts][bodh] Evaɱ me sutaɱ:|| ||

Ekaɱ samayaɱ āyasmā Sāriputto Sāvatthiyaɱ viharati.|| ||

Tatra kho āyasmā Sāriputto bhikkhū āmantesi:|| ||

'Āvuso bhikkhavo' ti.|| ||

'Āvuso' ti kho te bhikkhu āyasmato Sāriputtassa paccassosuɱ.|| ||

Āyasmā Sāriputto etad avoca:|| ||

2. 'Parihānadhammo puggalo',||
'parihānadhammo puggalo' ti,||
āvuso vuccati.|| ||

Kittāvatā nu kho āvuso||
'parihānadhammo puggalo'||
vutto Bhagavatā?|| ||

Kittāvatā ca pana||
'aparihānadhammo puggalo'||
vutto Bhagavatā ti?|| ||

"Dūrato pi kho mayaɱ āvuso āgaccheyyāma āyasmato Sāriputtassa santike etassa bhāsitassa atthamaññātuɱ,||
sādhuvatāyasmantaɱ yeva Sāriputtaɱ paṭibhātu, etassa bhāsitassa [103] attho.|| ||

Āyasmato Sāriputtassa sutvā bhikkhu dhāressantī" ti.|| ||

Tena h'āvuso suṇātha,||
sādhukaɱ||
manasikarotha bhāsissāmī ti.|| ||

"Evam āvuso" ti kho te bhikkhu āyasmato Sāriputtassa paccassosuɱ.|| ||

Āyasmā Sāriputto etad avoca:|| ||

3. Kittāvatā nu kho āvuso parihānadhammo puggalo vutto Bhagavatā?|| ||

Idh'āvuso bhikkhu assutañ c'eva dhammaɱ na suṇāti,||
sutā c'assa dhammā sammosaɱ gacchanti,||
ye c'assa dhammā pubbe cetaso samphuṭṭhapubbā,||
te ca na samudācaranti,||
aviññātañ ca na vijānāti.|| ||

Ettāvatā kho āvuso parihānadhammo puggalo vutto Bhagavatā.|| ||

4. Kittāvatā ca pan'āvuso aparihānadhammo puggalo vutto Bhagavatā?|| ||

Idh'āvuso Bhikkhu assutañ c'eva dhammaɱ suṇāti,||
sutā c'assa dhammā na sammosaɱ gacchanti,||
ye c'assa dhammā pubbe cetaso samphuṭṭhapubbā,||
te ca samudācaranti||
aviññātañ ca vijānāti.|| ||

Ettāvatā kho āvuso aparihānadhammo puggalo vutto Bhagavatā.|| ||

5. No ce āvuso bhikkhu paracittapariyāya kusalo hoti,||
atha 'sacittapariyāya kusalo bhavissāmī' ti.|| ||

Evaɱ hi vo āvuso sikkhitabbaɱ.|| ||

6. Kathañ cāvuso bhikkhu sacittapariyāya kusalo hoti?|| ||

Seyyathā pi āvuso itthī vā puriso vā daharo yuvā maṇḍanaka jātiko ādāse vā parisuddhe pariyodāte,||
acche vā udapatte sakaɱ mukhanimittaɱ paccacavekkhamāno sace tattha passati rajaɱ vā aŋgaṇaɱ vā,||
tass'eva rajassa vā aŋgaṇassa vā pahānāya vāyamati,||
no ce tattha passati rajaɱ vā aŋgaṇaɱ vā,||
ten'ev'attamano hoti [104] paripuṇṇasaɱkappo,||
'lābhā vata me,||
parisuddhaɱ vata me' ti.|| ||

Evam eva kho āvuso bhikkhuno paccavekkhanā bahukārā hoti kusalesu dhammesu:|| ||

Anabhijjhālū nu kho bahulaɱ viharāmi,||
saɱvijjati nu kho me eso dhammo,||
udāhu no?|| ||

Avyāpannacitto nu kho bahulaɱ viharāmi,||
saɱvijjati nu kho me eso dhammo,||
udāhu no?|| ||

Vigatathīnamiddho bahulaɱ viharāmi,||
saɱvijjati nu kho me eso dhammo,||
udāhu no?|| ||

Anuddhato nu kho bahulaɱ viharāmi,||
saɱvijjati nu kho me eso dhammo,||
udāhu no?|| ||

Tiṇṇavicikiccho nu kho bahulaɱ viharāmi,||
saɱvijjati nu kho me eso dhammo,||
udāhu no?|| ||

Akkodhano nu kho bahulaɱ viharāmi,||
saɱvijjati nu kho me eso dhammo,||
udāhu no?|| ||

Asaɱkiliṭṭhacitto nu kho bahulaɱ viharāmi,||
saɱvijjati nu kho me eso dhammo,||
udāhu no?|| ||

Lābhī nu kho'mhi ajjhattaɱ dhammapāmujjassa,||
saɱvijjati nu kho me eso dhammo,||
udāhu no?|| ||

Lābhī nu kho'mhi ajjhattaɱ ceto samathassa,||
saɱvijjati nu kho me eso dhammo,||
udāhu no?|| ||

Lābhī nu kho'mhi adhipaññā dhammavipassanāya,||
saɱvijjati nu kho me eso dhammo,||
udāhu no ti?|| ||

7. Sace āvuso bhikkhu paccavekkhamāno sabbe pi'me kusale dhamme attani na samanupassati,||
ten āvuso bhikkhunā sabbesaɱ yeva imesaɱ kusalānaɱ dhammānaɱ paṭilābhāya adhimatto chando ca||
vāyāmo ca||
ussāho ca||
ussoḷahī ca||
appaṭivānī ca||
sati ca||
sampajaññañ ca karaṇīyaɱ.|| ||

Seyyathā pi āvuso ādittacelo vā||
ādittasiso vā tass'eva celassa vā||
sīsassa vā||
nibbāpanāya adhimattaɱ chandañ ca||
vāyāmañ ca||
ussāhañ ca||
ussoḷahiñ ca||
appaṭivāniñ ca||
satiñ ca||
sampajaññañ ca kareyya,||
evam eva kho āvuso tena bhikkhunā sabbesaɱ yeva imesaɱ kusalānaɱ dhammānaɱ paṭilābhāya adhimatto chando ca||
vāyāmo ca||
ussāho ca||
ussoḷahī ca||
appaṭivānī ca||
sati ca||
sampajaññañ ca karaṇīyaɱ.|| ||

8. Sace pan'āvuso bhikkhu paccavekkhamāno ekacce kusale dhamme attani samanupassati,||
ekacce kusale dhamme [105] attani na samanupassati,||
ten āvuso bhikkhunā ye kusale dhamme attani samanupassati,||
tesu kusalesu dhammesu patiṭṭhāya,||
ye kusale dhamme attani na samanupassati,||
tesaɱ kusalānaɱ dhammānaɱ paṭilābhāya adhimatto chando ca||
vāyāmo ca||
ussāho ca||
ussoḷahī ca||
appaṭivānī ca||
sati ca sampajaññañ ca karaṇīyaɱ.|| ||

Seyyathā pi āvuso ādittacelo vā||
ādittasiso vā tass'eva celassa vā||
sīsassa vā||
nibbāpanāya adhimattaɱ chandañ ca||
vāyāmañ ca||
ussāhañ ca||
ussoḷahiñ ca||
appaṭivāniñ ca||
satiñ ca||
sampajaññañ ca kareyya,||
evam eva kho āvuso tena bhikkhunā ye kusale dhamme attani samanupassati,||
tesu kusalesu dhammesu patiṭṭhāya ye kusale dhamme attani na samanupassati,||
tesaɱ kusalānaɱ dhammānaɱ paṭilābhāya adhimatto chando ca||
vāyāmo ca||
ussāho ca||
ussoḷahī ca||
appaṭivāni ca||
sati ca||
sampajaññañ ca karaṇīyaɱ.|| ||

Sace pan'āvuso bhikkhu paccavekkhamāno sabbe pi me kusale dhamme attani samanupassati,||
tenāvuso bhikkhunā sabbesuyeva imesu kusalesu dhammesu patiṭṭhāya uttariɱ āsavānaɱ khayāya yogo karaṇīyo ti.|| ||

 


Contact:
E-mail
Copyright Statement   Webmaster's Page