Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VII. Yamaka Vagga

Sutta 64

Aveccappasanna Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Ye keci bhikkhave mayi aveccappasannā,||
sabbe te sotāpannā.|| ||

Tesaɱ sotāpannānaɱ pañcannaɱ idha niṭṭhā,||
pañcannaɱ idha vihāya niṭṭhā.|| ||

Katamesaɱ pañcannaɱ idha niṭṭhā?|| ||

3. Sattakkhattuparamassa,||
kolaɱkolassa,||
ekabījissa,||
sakadāgāmissa,||
yo ca diṭṭhe va dhamme arahā.|| ||

Imesaɱ pañcannaɱ idha niṭṭhā.|| ||

4. Katamesaɱ pañcannaɱ idha vihāya niṭṭhā?|| ||

Antarāparinibbāyissa,||
upahaccaparinibbāyissa,||
asankhāraparinibbāyissa,||
sasankhāraparinibbāyissa,||
uddhaɱ sotassa akaniṭṭhagāmino.|| ||

Imesaɱ pañcannaɱ idha vihāya niṭṭhā.|| ||

Ye keci bhikkhave mayi aveccappasannā,||
sabbe te sotāpannā.|| ||

Tesaɱ sotapannānaɱ imesaɱ pañcannaɱ idha niṭṭhā,||
imesaɱ pañcannaɱ idha vihāya niṭṭhā ti.|| ||

 


Contact:
E-mail
Copyright Statement   Webmaster's Page