Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VII. Yamaka Vagga

Sutta 67

Paṭhama Naḷakapāna Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Kosalesu cārikaɱ caramāno mahatā bhikkhu-saŋghena saddhiɱ yena Naḷakapānaɱ nāma kosalānaɱ nigamo,||
tad avasari.|| ||

Tatra sudaɱ Bhagavā Naḷakapāne viharati Palāsavane.

Tena kho pana samayena Bhagavā tadah'uposathe bhikkhu-saŋgha-parivuto nisinno hoti.|| ||

Atha kho Bhagavā bahu-d-eva rattiɱ bhikkhū dhammiyā kathāya sandassetvā samādapetvā samuttejetvā sampahaɱsetvā tuṇhī-bhūtaɱ tuṇhī-bhūtaɱ bhikkhu-saŋghaɱ anuviloketvā āyasmantaɱ Sāriputtaɱ āmantesi:|| ||

'Vigata-thīnamiddho kho Sāriputta bhikkhusaŋgho,||
paṭibhātu taɱ [123] Sāriputta bhikkhunaɱ dhammī kathā,||
piṭṭhi me āgilāyati,||
tam ahaɱ āyamissāmī ti.|| ||

'Evaɱ bhante' ti kho āyasmā Sāriputto Bhagavato paccassosi.|| ||

Atha kho Bhagavā catugguṇaɱ saɱghāṭiɱ paññāpetvā dakkhiṇena passena sīhaseyyaɱ kappesi,||
pāde pādaɱ accādhāya sato sampajāno uṭṭhānasaññaɱ manasikaritvā.|| ||

2. Tatra kho āyasmā Sāriputto bhikkhu āmantesi:|| ||

"Āvuso bhikkhavo" ti.|| ||

'Āvuso' ti kho te bhikkhu āyasmato Sāriputtassa paccassosuɱ.|| ||

Āyasmā Sāriputto etad avoca:|| ||

3. Yassa kassaci āvuso saddhā n'atthi kusalesu dhammesu||
hiri n'atthi||
ottappaɱ n'atthi,||
viriyaɱ n'atthi,||
paññā n'atthi kusalesu dhammesu||
tassa yā ratti vā divaso vā āgacchati,||
hāni yeva pāṭikaŋkhā kusalesu dhammesu,||
no vuddhi.|| ||

Seyyathā pi āvuso kālapakkhe candassa||
yā ratti vā divaso vā āgacchati,||
hāyat'eva vaṇṇena,||
hāyati maṇḍalena,||
hāyati ābhāya,||
hāyati ārohapariṇāhena.|| ||

Evam eva kho āvuso yassa kassaci saddhā n'atthi kusalesu dhammesu,||
hiri n'atthi,||
ottappaɱ n'atthi,||
viriyaɱ n'atthi,||
paññā n'atthi kusalesu dhammesu
tassa yā ratti vā divaso vā āgacchati,||
hāni yeva pāṭikaŋkhā kusalesu dhammesu,||
no vuddhi.|| ||

"Assaddho purisapuggalo" ti āvuso parihānam etaɱ,||
"ahiriko purisapuggalo" ti āvuso parihānam etaɱ,||
"anottappī purisapuggalo" ti āvuso parihānam etaɱ,||
"kusīto purisapuggalo" ti āvuso parihānam etaɱ,||
"duppañño purisapuggalo" ti āvuso parihānam etaɱ,||
"kodhano purisapuggalo" ti āvuso parihānam etaɱ,||
"upanāhī purisapuggalo" ti āvuso parihānam etaɱ,||
"pāpiccho purisapuggalo" ti āvuso parihānam etaɱ,||
"pāpamittato purisapuggalo" ti āvuso parihānam etaɱ,||
"micchādiṭṭhiko purisapuggalo" ti āvuso parihānam etaɱ.|| ||

4. Yassa kassaci āvuso saddhā atthi kusalesu dhammesu,||
hiri atthi,||
ottappaɱ atthi,||
viriyaɱ atthi||
[124] paññā atthi kusalesu dhammesu,||
tassa yā ratti vā divaso vā āgacchati,||
vuddhi yeva pāṭikaŋkhā kusalesu dhammesu,||
no parihāni.|| ||

Seyyathā pi āvuso juṇhapakkhe candassa||
yā ratti vā divaso vā āgacchati,||
vaḍḍhat'eva vaṇṇena,||
vaḍḍhati maṇḍalena,||
vaḍḍhati ābhāya,||
vaḍḍhati ārohapariṇāhena.|| ||

Evam eva kho āvuso yassa kassaci saddhā atthi kusalesu dhammesu,||
hiri atthi,||
ottappaɱ atthi,||
viriyaɱ atthi||
paññā atthi kusalesu dhammesu,||
tassa yā ratti vā divaso vā āgacchati,||
vuddhiyeva pāṭikaŋkhā kusalesu dhammesu,||
no parihāni.|| ||

"Saddho purisapuggalo" ti āvuso aparihānam etaɱ,||
"hirimā purisapuggalo" ti āvuso aparihānam etaɱ,||
"ottappī purisapuggalo" ti āvuso aparihānam etaɱ,||
"āraddhaviriyo purisapuggalo" ti āvuso aparihānam etaɱ,||
"paññavā purisapuggalo" ti āvuso aparihānam etaɱ,||
"akkodhano purisapuggalo" ti āvuso aparihānam etaɱ,||
"anupanāhī purisapuggalo" ti āvuso aparihānam etaɱ,||
"appiccho purisapuggalo" ti āvuso aparihānam etaɱ,||
"kalyāṇamitto purisapuggalo" ti āvuso aparihānam etaɱ,||
"sammādiṭṭhiko purisapuggalo" ti āvuso aparihānam etan ti.|| ||

5. Atha kho Bhagavā paccupaṭṭhāya āyasmantaɱ Sāriputtaɱ āmantesi:|| ||

'Sādhu sādhu Sāriputta,||
yassa kassaci Sāriputta,||
saddhā n'atthi kusalesu dhammesu,||
hiri n'atthi,||
ottappaɱ n'atthi,||
viriyaɱ n'atthi,||
paññā n'atthi kusalesu dhammesu,||
tassa yā ratti vā divaso vā āgacchati,||
hāni yeva pāṭikaŋkhā kusalesu dhammesu,||
no vuddhi.|| ||

Seyyathā pi Sāriputta kālapakkhe candassa||
yā ratti vā divaso vā āgacchati,||
hāyat'eva vaṇṇena,||
hāyati maṇḍalena,||
hāyati ābhāya,||
hāyati ārohapariṇāhena.|| ||

Evam eva kho Sāriputta yassa kassaci saddhā n'atthi kusalesu dhammesu,||
hiri n'atthi,||
ottappaɱ n'atthi,||
viriyaɱ n'atthi,||
paññā n'atthi kusalesu dhammesu||
tassa yā ratti vā divaso [125] vā āgacchati,||
hāni yeva pāṭikaŋkhā kusalesu dhammesu,||
no vuddhi.|| ||

"Assaddho purisapuggalo" ti Sāriputta parihānam etaɱ,||
"ahiriko purisapuggalo" ti Sāriputta parihānam etaɱ,||
"anottappī purisapuggalo" ti Sāriputta parihānam etaɱ,||
"kusīto purisapuggalo" ti Sāriputta parihānam etaɱ,||
"duppañño purisapuggalo" ti Sāriputta parihānam etaɱ,||
"kodhano purisapuggalo" ti Sāriputta parihānam etaɱ,||
"upanāhī purisapuggalo" ti Sāriputta parihānam etaɱ,||
"Pāpiccho purisapuggalo" ti Sāriputta parihānam etaɱ,||
"pāpamitto purisapuggalo" ti Sāriputta parihānam etaɱ,||
"micchādiṭṭhiko purisapuggalo" ti Sāriputta parihānam etaɱ.|| ||

Yassa kassaci Sāriputta saddhā atthi kusalesu dhammesu,||
hiri atthi,||
ottappaɱ atthi,||
viriyaɱ atthi,||
paññā atthi kusalesu dhammesu,||
tassa yā ratti vā divaso vā āgacchati,||
vuddhiyeva pāṭikaŋkhā kusalesu dhammesu,||
no parihāni.|| ||

Seyyathā pi Sāriputta juṇhapakkhe candassa||
yā ratti vā divaso vā āgacchati,||
vaḍḍhateva vaṇṇena||
vaḍḍhati maṇḍalena,||
vaḍḍhati ābhāya,||
vaḍḍhati ārohapariṇāhena.|| ||

Eva meva kho Sāriputta yassa kassaci saddhā atthi kusalesu dhammesu,||
hiri atthi,||
ottappaɱ atthi,||
viriyaɱ atthi,||
paññā atthi kusalesu dhammesu,||
tassa yā ratti vā divaso vā āgacchati vuddhiyeva pāṭikaŋkhā kusalesu dhammesu,||
no parihāni.|| ||

"Saddho purisapuggalo" ti Sāriputta aparihānam etaɱ,||
"hirimā purisapuggalo" ti Sāriputta aparihānam etaɱ,||
"ottappī purisapuggalo" ti Sāriputta aparihānam etaɱ,||
"āraddhaviriyo purisapuggalo" ti Sāriputta aparihānam etaɱ,||
"paññavā purisapuggalo" ti Sāriputta aparihānam etaɱ,||
"akkodhano purisapuggalo" ti Sāriputta aparihānam etaɱ,||
"anupanāhī purisapuggalo" ti Sāriputta aparihānam etaɱ,||
"apapiccho purisapuggalo" ti Sāriputta aparihānam etaɱ,||
"kalyāṇamitto purisapuggalo" ti Sāriputta aparihānam etaɱ,||
"sammādiṭṭhiko purisapuggalo" ti Sāriputta aparihānam etan ti.|| ||


Contact:
E-mail
Copyright Statement   Webmaster's Page