Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VII. Yamaka Vagga

Sutta 69

Paṭhama Kathāvatthu Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts][ati][bd] Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena sambahulā bhikkhu pacchābhattaɱ piṇḍapātapaṭikkantā upaṭṭhānasālāyaɱ sannisinnā sannipatitā aneka-vihitaɱ tiracchāna-kathaɱ anuyuttā viharanti.|| ||

Seyyathīdaɱ:||
rāja-kathaɱ cora-kathaɱ mahāmatta-kathaɱ senā-kathaɱ bhaya-kathaɱ yuddha-kathaɱ anna-kathaɱ pāna-kathaɱ vattha-kathaɱ sayana-kathaɱ mālā-kathaɱ gandha-kathaɱ ñāti-kathaɱ yāna-kathaɱ gāma-kathaɱ nigama-kathaɱ nagara-kathaɱ janapada-kathaɱ itthi-kathaɱ sūra-kathaɱ visikhā-kathaɱ kumbhaṭṭhāna-kathaɱ pubba-peta-kathaɱ nānatta-kathaɱ lokakkhāyikaɱ samuddakkhāyikaɱ iti bhavābhava-kathaɱ iti vā ti.|| ||

2. Atha kho Bhagavā sāyaṇhasamayaɱ paṭisallānā vuṭṭhito yen'upaṭṭhānasālā ten'upasaŋkami upasaŋkamitvā paññatte āsane nisīdi.|| ||

Nisajja kho Bhagavā bhikkhu āmantesi:|| ||

'Kāya nu'ttha bhikkhave etarahi kathāya sannisinnā,||
kā ca pana vo antarākathā vippakatā' ti?|| ||

Idha mayaɱ bhante pacchābhattaɱ piṇḍapātapaṭikkanta,||
upaṭṭhānasālāyaɱ sannisinnā sannipatitā aneka-vihitaɱ tiracchāna-kathaɱ anuyuttā viharāma.|| ||

Seyyathīdaɱ:||
rāja-kathaɱ cora-kathaɱ mahāmatta-kathaɱ senā-kathaɱ bhaya-kathaɱ yuddha-kathaɱ anna-kathaɱ pāna-kathaɱ vattha-kathaɱ sayana-kathaɱ mālā-kathaɱ gandha-kathaɱ ñāti-kathaɱ yāna-kathaɱ gāma-kathaɱ nigama-kathaɱ nagara-kathaɱ janapada-kathaɱ itthi-kathaɱ sūra-kathaɱ visikhā-kathaɱ kumbhaṭṭhāna-kathaɱ pubba-peta-kathaɱ nānatta-kathaɱ lokakkhāyikaɱ samuddakkhāyikaɱ iti bhavābhava-kathaɱ iti vā ti.|| ||

Na kho pan'etaɱ bhikkhave tumhākaɱ paṭirūpaɱ kulaputtānaɱ saddhāya agārasmā anagāriyaɱ pabbajitānaɱ,||
yaɱ tumhe aneka-vihitaɱ tiracchāna-kathaɱ anuyuttā vihareyyātha.|| ||

Seyyathīdaɱ:||
rāja-kathaɱ cora-kathaɱ mahāmatta-kathaɱ senā-kathaɱ bhaya-kathaɱ yuddha-kathaɱ anna-kathaɱ pāna-kathaɱ vattha-kathaɱ sayana-kathaɱ mālā-kathaɱ gandha-kathaɱ ñāti-kathaɱ yāna-kathaɱ gāma-kathaɱ nigama-kathaɱ nagara-kathaɱ janapada-kathaɱ itthi-kathaɱ sūra-kathaɱ visikhā-kathaɱ kumbhaṭṭhāna-kathaɱ pubba-peta-kathaɱ nānatta-kathaɱ lokakkhāyikaɱ samuddakkhāyikaɱ iti bhavābhava-kathaɱ iti vā ti.|| ||

Dasa yimāni bhikkhave kathāvatthūni.|| ||

Katamāni dasa?|| ||

3. Aappicchakathā||
santuṭṭhikathā||
pavivkekathā||
asaɱsaggakathā||
viriyārambhakathā||
sīlakathā||
samādhikathā||
paññākathā||
vimuttikathā||
vimuttiñāṇadassanakathā.|| ||

Imāni kho bhikkhave dasakathāvatthūni.|| ||

4. Imesaɱ ce tumhe bhikkhave dasannaɱ kathāvatthūnaɱ upādāyupādāya kathaɱ katheyyātha.|| ||

Imesam pi candima-suriyānaɱ evaɱ mahiddhikānaɱ evaɱ mahānubhāvānaɱ tejasā tejaɱ pariyādiyeyyātha,||
ko pana vādo aññatitthiyānaɱ paribbājakānan ti.


Contact:
E-mail
Copyright Statement   Webmaster's Page