Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
X. Dasaka-Nipāta
VII. Yamaka Vagga

Sutta 70

Dutiya Kathāvatthu Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts][ati] Ekaɱ samayaɱ Bhagavā Sāvatthiyaɱ viharati Jetavane Anāthapiṇḍikassa ārāme.|| ||

Tena kho pana samayena sambahulā bhikkhu pacchābhattaɱ piṇḍapātapaṭikkantā upaṭṭhānasālāyaɱ sannisinnā sannipatitā aneka-vihitaɱ tiracchāna-kathaɱ anuyuttā viharanti.|| ||

Seyyathīdaɱ:||
rāja-kathaɱ cora-kathaɱ mahāmatta-kathaɱ senā-kathaɱ bhaya-kathaɱ yuddha-kathaɱ anna-kathaɱ pāna-kathaɱ vattha-kathaɱ sayana-kathaɱ mālā-kathaɱ gandha-kathaɱ ñāti-kathaɱ yāna-kathaɱ gāma-kathaɱ nigama-kathaɱ nagara-kathaɱ janapada-kathaɱ itthi-kathaɱ sūra-kathaɱ visikhā-kathaɱ kumbhaṭṭhāna-kathaɱ pubba-peta-kathaɱ nānatta-kathaɱ lokakkhāyikaɱ samuddakkhāyikaɱ itibhavābhava-kathaɱ iti vāti.|| ||

1. Dasa imāni bhikkhave pāsaɱsāni ṭhānāni.|| ||

Katamāni dasa?|| ||

[130] 'Idha, bhikkhave, bhikkhu attanā ca appiccho hoti,||
appicchakathañ ca bhikkhūnaɱ kattā hoti.|| ||

'Appiccho bhikkhu appicchakathañ ca bhikkhūnaɱ kattā'||
ti pāsaɱsame taɱ ṭhānaɱ.|| ||

2. Attanā ca santuṭṭho hoti.|| ||

Santuṭṭhīkathañ ca bhikkhūnaɱ kattā 'santuṭṭho hoti,||
bhikkhu santuṭṭhīkathañ ca bhikkhūnaɱ kattā' ti,||
pāsaɱsame taɱ ṭhānaɱ.|| ||

3. Attanā ca pavivitto hoti,||
pavivkekathañ ca bhikkhūnaɱ kattā hoti.|| ||

'Pavivitto bhikkhu pavivkekathañ ca bhikkhūnaɱ kattā' ti pāsaɱsame taɱ ṭhānaɱ.|| ||

4. Attanā ca asaɱsaṭṭho hoti,||
asaɱsaṭṭhakathañ ca bhikkhūnaɱ kattā hoti,||
asaɱsaṭṭho bhikkhu asaɱsaṭṭhakathañ ca bhikkhūnaɱ kattā' ti pāsaɱsame taɱ ṭhānaɱ.|| ||

5. Attanā ca āraddhaviriyo hoti,||
viriyārambhakathañ ca bhikkhūnaɱ kattā hoti.|| ||

'Āraddhaviriyo bhikkhu viriyārambhakathañ ca bhikkhūnaɱ kattā' ti pāsaɱsame taɱ ṭhānaɱ.|| ||

6. Attanā ca sīlasampanno hoti,||
sīlasampadākathañca bhikkhūnaɱ kattā hoti.|| ||

'Sīlasampanno bhikkhu sīlasampadākathañca bhikkhūnaɱ kattā' ti pāsaɱsame taɱ ṭhānaɱ.|| ||

7. Attanā ca samādhisampanno hoti,||
samādhi-sampadā-kathañca bhikkhūnaɱ kattā hoti.|| ||

'Samādhisampanno bhikkhu samādhisampadākathañca bhikkhūnaɱ kattā' ti pāsaɱsame taɱ ṭhānaɱ.|| ||

8. Attanā ca paññāsampanno hoti,||
paññāsampadākathañca bhikkhūnaɱ kattā hoti.|| ||

"Paññāsampanno bhikkhu paññāsampadākathañca bhikkhūnaɱ kattā' ti pāsaɱsame taɱ ṭhānaɱ.|| ||

9. Attanā ca vimuttisampanno hoti,||
vimutti-sampadā-kathañca bhikkhūnaɱ kattā hoti.|| ||

'Vimuttisampanno bhikkhu vimuttisampadākathañ ca bhikkhūnaɱ kattā' ti pāsaɱsame taɱ ṭhānaɱ.|| ||

10. Attanā ca vimutti-ñāṇa-dassana-sampanno hoti,||
vimutti-ñāṇa-dassana-sampadā-kathañ ca bhikkhūnaɱ kattā hoti.||
'Vimutti-ñāṇa-dassana-sampanno bhikkhu vimutti-ñāṇa-dassana-sampadā-kathañ ca bhikkhūnaɱ kattā' ti||
pāsaɱsame taɱ ṭhanāɱ.|| ||

Imāni kho bhikkhave dasa pāsaɱsāni ṭhānānī ti.|| ||

 


Contact:
E-mail
Copyright Statement   Webmaster's Page