Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
VIII: Ākaŋkha-Vagga

Sutta 72

Kaṇṭaka Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Vesāliyaɱ viharati Mahāvane Kūṭāgārasālāyaɱ sambahulehi abhiññātehi abhiññātehi therehi sāvakehi saddhiɱ āyasmatā ca Cālena||
āyasmatā ca Upacālena||
āyasmatā ca Kakkaṭena||
āyasmatā ca Kaṭimbena||
āyasmatā ca Kaṭena||
āyasmatā ca Kaṭissaŋgena||
aññehi ca abhiññātehi abhiññātehi therehi sāvakehi saddhiɱ.|| ||

2. Tena kho pana samayena sambahulā abhiññātā abhiññātā Licchavī bhaddehi bhaddehi yānehi carapurāya uccāsaddā mahāsaddā Mahāvanaɱ ajjhogāhantī Bhagavantaɱ dassanāya.|| ||

Atha kho tesaɱ āyasmantānaɱ etad ahosi:|| ||

"Ime kho sambahulā abhiññātā abhiññātā Licchavī bhaddehi bhaddehi yānehi carapurāya uccāsaddā mahāsaddā Mahāvanaɱ ajjhogāhanti Bhagavantaɱ dassanāya||
saddakaṇṭakā kho pana jhānā vuttā Bhagavatā,||
yan nūna mayaɱ yena Gosiŋgasālavanadāyo [134] ten'upasaŋkameyyāma,||
tattha mayaɱ appasaddā appakiṇṇā phāsuɱ vihareyyāmā" ti.|| ||

3. Atha kho te āyasmanto yena Gosiŋgasālavanadāyo ten'upasaɱkamiɱsu.|| ||

Tattha te āyasmanto appasaddā appakiṇṇā phāsuɱ viharanti.|| ||

Atha kho Bhagavā bhikkhu āmantesi:|| ||

"Kahannukho bhikkhave Cālo?|| ||

Kahaɱ Upacālo?|| ||

Kahaɱ Kakkaṭo?|| ||

Kahaɱ Kaṭimbo?|| ||

Kahaɱ Kaṭo?|| ||

Kahaɱ Kaṭisaŋgo?|| ||

Kahannū kho te bhikkhave therā sāvakā gatā ti?|| ||

'Idha bhante tesaɱ āyasmantānaɱ etad ahosi:|| ||

"Ime kho sambahulā abhiññātā abhiññātā Licchavī bhaddehi bhaddehi yānehi carapurāya uccāsaddā mahāsaddā Mahāvanaɱ ajjhogāhantī Bhagavantaɱ dassanāya,||
saddakaṇṭakā kho pana jhānā vuttā Bhagavatā,||
yan nūna mayaɱ yena Gosiŋgasālavanadāyo ten'upasaŋkameyyāma,||
tattha mayaɱ appasaddā appakiṇṇā phāsuɱ vihareyyāmā" ti.|| ||

Atha kho te bhante āyasmanto yena Gosiŋgasālavanadāyo ten'upasaŋkamiɱsu.|| ||

Tattha te āyasmanto appasaddā appakiṇṇā phāsuɱ viharantī ti.|| ||

4. Sādhu sādhu bhikkhave.|| ||

Yathā te mahāsāvakā sammā vyākaramānā vyākareyyuɱ.|| ||

Saddakaṇṭakā hi bhikkhave jhānā vuttā mayā.|| ||

Dasa yime bhikkhave kaṇṭakā.|| ||

Katame dasa?|| ||

5. Pavivekārāmassa saŋghanikārāmatā kaṇṭako.|| ||

Asubhanimittānuyogamanuyuttassa subhanimittānuyogo kaṇṭako|| ||

Indriyesu guttadvārassa visūkadassanaɱ kaṇṭako|| ||

Brahmacārissa mātugāmopavicāro kaṇṭako|| ||

Paṭhamassa [135] jhānassa saddo kaṇṭako|| ||

Dutiyassa jhānassa vitakkavicārā kaṇṭako tatiyassa jhānassa pīti kaṇṭako|| ||

Catutthassa jhānassa assāsapassāsā kaṇṭako|| ||

Saññāvedayitanirodhasamāpattiyā saññā ca vedanā ca kaṇṭako|| ||

Rāgo kaṇṭako|| ||

Doso kaṇṭako|| ||

Moho kaṇṭako|| ||

Akaṇṭakā bhikkhave viharatha,||
nikkaṇṭakā bhikkhave viharatha.|| ||

Akaṇṭakā bhikkhave arahanto,||
nikkaṇṭakā bhikkhave arahanto,||
akaṇṭa nikkaṇṭakā bhikkhave arahanto ti.|| ||

 


Contact:
E-mail
Copyright Statement   Webmaster's Page