Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
VIII: Ākaŋkha-Vagga

Sutta 76

Tayodhamma Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati.|| ||

Tatra kho Bhagavā bhikkhū āmantesi:|| ||

'Bhikkhavo' ti.|| ||

'Bhadante' ti te bhikkhū Bhagavato paccassosuɱ.|| ||

Bhagavā etad avoca:|| ||

2. Tayo me bhikkhave dhammā loke na saɱvijjeyyuɱ,||
na Tathāgato loke uppajjeyya arahaɱ Sammā-sambuddho,||
na Tathāgatappavedito dhammavinayo loke dippeyya.|| ||

Katame tayo?|| ||

3. Jāti ca jarā ca maraṇañ ca.|| ||

Ime kho bhikkhave tayo dhammā loke na saɱvijjeyyuɱ,||
na Tathāgato loke uppajjeyya arahaɱ Sammā-sambuddho,||
na Tathāgatappavedito dhammavinayo leke dippeyya.|| ||

Yasmā ca kho bhikkhave ime tayo dhammā loke saɱvijjanti,||
tasmā Tathāgato loke uppajjati arahaɱ Sammā-sambuddho,||
tasmā Tathāgatappavedito dhammavinayo loke dippati.|| ||

4. Tayo'me bhikkhave dhammā appahāya abhabbo jātiɱ pahātuɱ||
jaraɱ pahātuɱ||
maraṇaɱ pahātuɱ.|| ||

Katame tayo?|| ||

Rāgaɱ appahāya||
dosaɱ appahāya||
mohaɱ appahāya.|| ||

Ime kho bhikkhave tayo dhamme appahāya abhabbo jātiɱ pahātuɱ||
jaraɱ pahātuɱ||
maraṇaɱ pahātuɱ.|| ||

5. Tayo'me bhikkhave dhamme appahāya abhabbo rāgaɱ pahātuɱ||
dosaɱ pahātuɱ||
mohaɱ pahātuɱ.|| ||

Katame tayo?|| ||

Sakkāyadiṭṭhiɱ appahāya||
vicikicchaɱ appahāya||
sīlabbataparāmāsaɱ appahāya.|| ||

Ime kho bhikkhave tayo dhamme appahāya abhabbo rāgaɱ pahātuɱ||
dosaɱ pahātuɱ||
mohaɱ pahātuɱ.|| ||

[145] 6. Tayo'me bhikkhave dhamme appahāya abhabbo sakkāyadiṭṭhiɱ pahātuɱ,||
vicikicchaɱ pahātuɱ||
sīlabbataparāmāsaɱ pahātuɱ.|| ||

Katame tayo?|| ||

Ayonisomanasikākaraɱ appahāya||
kummaggasevanaɱ appahāya||
cetaso līnattaɱ appahāya.|| ||

Ime kho bhikkhave tayo dhamme appahāya abhabbo sakkāyadiṭṭhiɱ pahātuɱ||
vicikicchaɱ pahātuɱ||
sīlabbataparāmāsaɱ pahātuɱ.|| ||

7. Tayo'me bhikkhave dhamme appahāya abhabbo ayonisomanasikāraɱ pahātuɱ||
kummaggasevanaɱ pahātuɱ||
cetaso līnattaɱ pahātuɱ.|| ||

Katame tayo?|| ||

Muṭṭhasaccaɱ appahāya||
asampajaññaɱ appahāya||
cetaso vikkhepaɱ appahāya.|| ||

Ime kho bhikkhave tayo dhamme appahāya abhabbo ayonisomanasikāraɱ pahātuɱ||
kummaggasevanaɱ pahātuɱ||
cetaso līnattaɱ pahātuɱ.|| ||

8. Tayo'me bhikkhave dhamme appahāya abhabbo muṭṭhasaccaɱ pahātuɱ||
asampajaññaɱ pahātuɱ||
cetaso vikkhepaɱ pahātuɱ.|| ||

Katame tayo?|| ||

Ariyānaɱ adassanakamyataɱ appahāya||
ariya-Dhammaɱ asotukamyataɱ appahāya||
upārambhacittaɱ appahāya.|| ||

Ime kho bhikkhave tayo dhamme appahāya abhabbo muṭṭhasaccaɱ pahātuɱ||
asampajaññaɱ pahātuɱ||
cetaso vikkhepaɱ pahātuɱ.|| ||

9. Tayo'me bhikkhave dhamme appahāya abhabbo ariyānaɱ adassanakamyataɱ pahātuɱ||
ariya-Dhammaɱ asotukamyataɱ pahātuɱ||
upārambhacittataɱ pahātuɱ.|| ||

Katame tayo?|| ||

Uddhaccaɱ appahāya||
asaɱvaraɱ appahāya||
dussīlyaɱ appahāya.|| ||

Ime kho bhikkhave tayo dhamme appahāya abhabbo ariyānaɱ adassanakamyataɱ pahātuɱ||
ariya-Dhammaɱ asotukamyataɱ pahātuɱ||
upārambhacittataɱ pahātuɱ.|| ||

[146] 10. Tayo'me bhikkhave dhamme appahāya abhabbo uddhaccaɱ pahātuɱ||
asaɱvaraɱ pahātuɱ||
dussīlyaɱ pahātuɱ.|| ||

Katame tayo?|| ||

Assaddhiyaɱ appahāya||
avadaññutaɱ appahāya||
kosajjaɱ appahāya.|| ||

Ime kho bhikkhave tayo dhamme appahāya abhabbo uddhaccaɱ pahātuɱ||
asaɱvaraɱ pahātuɱ||
dussīlyaɱ pahātuɱ.|| ||

11. Tayo me bhikkhave dhamme appahāya abhabbo assaddhiyaɱ pahātuɱ||
avadaññutaɱ pahātuɱ||
kosajjaɱ pahātuɱ.|| ||

Katame tayo?|| ||

Anādariyaɱ appahāya||
dovacassataɱ appahāya||
pāpamittataɱ appahāya.|| ||

Ime kho bhikkhave tayo dhamme appahāya abhabbo assaddhiyaɱ pahātuɱ||
avadaññutaɱ pahātuɱ||
kosajjaɱ pahātuɱ.|| ||

12. Tayo me bhikkhave dhamme appahāya abhabbo anādariyaɱ pahātuɱ||
dovacassataɱ pahātuɱ||
pāpamittataɱ pahātuɱ.|| ||

Katame tayo?|| ||

Ahirikaɱ appahāya||
anottappaɱ appahāya||
pamādaɱ appahāya.|| ||

Ime kho bhikkhave tayo dhamme appahāya abhabbo anādariyaɱ pahātuɱ||
dovacassataɱ pahātuɱ||
pāpamittataɱ pahātuɱ.|| ||

13. Ahiriko'yaɱ bhikkhave anottappī pamatto hoti.|| ||

So pamatto samāno abhabbo anādariyaɱ pahātuɱ||
dovacassataɱ pahātuɱ||
pāpamittaɱ pahātuɱ.|| ||

So pāpamitto samāno abhabbo assaddhiyaɱ pahātuɱ||
avadaññutaɱ pahātuɱ||
kosajjaɱ pahātuɱ.|| ||

So kusīto samāno abhabbo uddhaccaɱ pahātuɱ||
asaɱvaraɱ pahātuɱ||
dussīlyaɱ pahātuɱ.|| ||

So dussīlo samāno abhabbo ariyānaɱ adassanakamyataɱ pahātuɱ||
ariya-Dhammaɱ asotukamyataɱ pahātuɱ,||
upārambhacittataɱ pahātuɱ.|| ||

So upārambhacitto samāno abhabbo muṭṭhasaccaɱ pahātuɱ||
asampajaññaɱ pahātuɱ||
cetaso vikkhepaɱ pahātuɱ.|| ||

So vikkhitta-[147] citto samāno abhabbo ayonisomanasikāraɱ pahātuɱ||
kummaggasevanaɱ pahātuɱ||
cetaso līnattaɱ pahātuɱ.|| ||

So līnacitto samāno abhabbo sakkāyadiṭṭhiɱ pahātuɱ||
vicikicchaɱ pahātuɱ||
sīlabbataparāmāsaɱ pahātuɱ.|| ||

So vicikiccho samāno abhabbo rāgaɱ pahātuɱ||
dosaɱ pahātuɱ||
mohaɱ pahātuɱ.|| ||

So rāgaɱ appahāya||
dosaɱ appahāya||
mohaɱ appahāya||
abhabbo jātiɱ pahātuɱ||
jaraɱ pahātuɱ||
maraṇaɱ pahātuɱ.|| ||

 


 

14. Tayo me bhikkhave dhamme pahāya bhabbo jātiɱ pahātuɱ||
jaraɱ pahātuɱ||
maraṇaɱ pahātuɱ.|| ||

Katame tayo?|| ||

Rāgaɱ pahāya||
dosaɱ pahāya||
mohaɱ pahāya.|| ||

Ime kho bhikkhave tayo dhamme pahāya bhabbo jātiɱ pahātuɱ||
jaraɱ pahātuɱ||
maraṇaɱ pahātuɱ.|| ||

15. Tayo me bhikkhave dhamme pahāya bhabbo rāgaɱ pahātuɱ||
dosaɱ pahātuɱ||
mohaɱ pahātuɱ.|| ||

Katame tayo?|| ||

Sakkāyadiṭṭhiɱ pahāya||
vicikicchaɱ pahāya||
sīlabbataparāmāsaɱ pahāya.|| ||

Ime kho bhikkhave tayo dhamme pahāya bhabbo rāgaɱ pahātuɱ||
dosaɱ pahātuɱ||
mohaɱ pahātuɱ.|| ||

16. Tayo'me bhikkhave dhamme pahāya bhabbo sakkāyadiṭṭhiɱ pahātuɱ||
vicikicchaɱ pahātuɱ||
sīlabbataparāmāsaɱ pahātuɱ.|| ||

Katame tayo?|| ||

Ayonisomanasikāraɱ pahāya||
kummaggasevanaɱ pahāya||
cetaso līnattaɱ pahāya.|| ||

Ime kho bhikkhave tayo dhamme pahāya bhabbo sakkāyadiṭṭhiɱ pahātuɱ||
vicikicchaɱ pahātuɱ||
sīlabbataparāmāsaɱ pahātuɱ.|| ||

17. Tayo'me bhikkhave dhamme pahāya bhabbo ayonisomanasikāraɱ pahātuɱ||
kummaggasevanaɱ pahātuɱ||
cetaso līnattaɱ pahātuɱ.|| ||

Katame tayo?|| ||

Muṭṭhasaccaɱ pahāya||
asampajaññaɱ pahāya||
cetaso vikkhepaɱ pahāya.|| ||

Ime kho bhikkhave tayo dhamme pahāya bhabbo ayoniso manasikāraɱ pahātuɱ||
kummaggasevanaɱ pahātuɱ||
cetaso līnattaɱ pahātuɱ.|| ||

[148] 18. Tayo'me bhikkhave dhamme pahāya bhabbo muṭṭhasaccaɱ pahātuɱ||
asampajaññaɱ pahātuɱ||
cetaso vikkhepaɱ pahātuɱ.|| ||

Katame tayo?|| ||

Ariyānaɱ adassanakamyataɱ pahāya||
ariya-Dhammaɱ asotukamyataɱ pahāya||
upārambhacittataɱ pahāya.|| ||

Ime kho bhikkhave tayo dhamme pahāya bhabbo muṭṭhasaccaɱ pahātuɱ||
asampajaññaɱ pahātuɱ||
cetaso vikkhepaɱ pahātuɱ.|| ||

19. Tayo'me bhikkhave dhamme pahāya bhabbo ariyānaɱ adassanakamyataɱ pahātuɱ||
ariya-Dhammɱ asotukamyataɱ pahātuɱ||
upārambhacittataɱ pahātuɱ.|| ||

Katame tayo?|| ||

Uddhaccaɱ pahāya||
asaɱvaraɱ pahāya||
dussīlyaɱ pahāya.|| ||

Ime kho bhikkhave tayo dhamme pahāya bhabbo ariyānaɱ adassanakamyataɱ pahātuɱ||
ariya-Dhammɱ asotukamyataɱ pahātuɱ||
upārambhacittataɱ pahātuɱ.|| ||

20. Tayo'me bhikkhave dhamme pahāya bhabbo uddhaccaɱ pahātuɱ||
asaɱvaraɱ pahātuɱ||
dussīlyaɱ pahātuɱ.|| ||

Katame tayo?|| ||

Assaddhiyaɱ pahāya||
avadaññutaɱ pahāya||
kosajjaɱ pahāya.|| ||

Ime kho bhikkhave tayo dhamme pahāya bhabbo uddhaccaɱ pahātuɱ||
asaɱvaraɱ pahātuɱ||
dussīlyaɱ pahātuɱ.|| ||

21. Tayo'me bhikkhave dhamme pahāya bhabbo assaddhiyaɱ pahātuɱ||
avadaññutaɱ pahātuɱ||
kosajjaɱ pahātuɱ.|| ||

Katame tayo?|| ||

Anādariyaɱ pahāya||
dovacassataɱ pahāya||
pāpamittataɱ pahāya.|| ||

Ime kho bhikkhave tayo dhamme pahāya bhabbo assaddhiyaɱ pahātuɱ||
avadaññutaɱ pahātuɱ||
kosajjaɱ pahātuɱ.|| ||

22. Tayo me bhikkhave dhamme pahāya bhabbo anādariyaɱ pahātuɱ||
dovacassataɱ pahātuɱ||
pāpamittataɱ pahātuɱ.|| ||

Katame tayo?|| ||

Ahirikaɱ pahāya||
anottappaɱ pahāya||
pamādaɱ pahāya.|| ||

Ime kho bhikkhave tayo dhamme pahāya bhabbo anādariyaɱ pahātuɱ||
dovacassataɱ pahātuɱ||
pāpamittataɱ pahātuɱ.|| ||

23. Hirimāyaɱ bhikkhave ottappī appamatto hoti.|| ||

So appamatto samāno bhabbo anādariyaɱ pahātuɱ||
dovacassataɱ pahātuɱ||
pāpamittataɱ pahātuɱ.|| ||

So kalyāṇamitto [149] samāno bhabbo assaddhiyaɱ pahātuɱ||
avadaññutaɱ pahātuɱ||
kosajjaɱ pahātuɱ.|| ||

So āraddhaviriyo samāno bhabbo uddhaccaɱ pahātuɱ||
asaɱvaraɱ pahātuɱ||
dussīlyaɱ pahātuɱ.|| ||

So sīlavā samāno bhabbo ariyānaɱ adassanakamyataɱ pahātuɱ||
ariya-Dhammaɱ asotukamyataɱ pahātuɱ||
upārambhacittataɱ pahātuɱ.|| ||

So anupārambhacitto samāno bhabbo muṭṭhasaccaɱ pahātuɱ||
asampajaññaɱ pahātuɱ||
cetaso vikkhepaɱ pahātuɱ.|| ||

So avikkhittacitto samāno bhabbo ayonisomanasikāraɱ pahātuɱ||
kummaggasevanaɱ pahātuɱ||
cetaso līnattaɱ pahātuɱ.|| ||

So alīnacitto samāno bhabbo sakkāyadiṭṭhiɱ pahātuɱ||
vicikicchaɱ pahātuɱ,||
sīlabbataparāmāsaɱ pahātuɱ.|| ||

So avicikiccho samāno bhabbo rāgaɱ pahātuɱ||
dosaɱ pahātuɱ||
mohaɱ pahātuɱ;||
so rāgaɱ pahāya||
dosaɱ pahāya||
mohaɱ pahāya||
bhabbo jātiɱ pahātuɱ||
jaraɱ pahātuɱ||
maraṇaɱ pahātunti.|| ||

 


Contact:
E-mail
Copyright Statement   Webmaster's Page