Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
IX: Thera-Vagga

Sutta 81

Bāhuna Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts][than][olds] Evaɱ me sutaɱ:|| ||

Ekaɱ samayaɱ Bhagavā Campāyaɱ viharati Gaggarāya pokkharaṇiyā tīre.|| ||

Atha kho āyasmā Bāhuno yena Bhagavā ten'upasaŋkami.|| ||

Upasaŋkamitvā Bhagavantaɱ abhivādetvā eka-m-antaɱ nisīdi.|| ||

Eka-m-antaɱ nisinno kho āyasmā Bāhuno Bhagavantaɱ etad avoca:|| ||

Katihi nu kho bhante dhammehi Tathāgato nissaṭṭho visaŋyutto vippamutto vimariyādīkatena cetasā viharitī ti?|| ||

[152] Dasahi kho pana Bāhuna dhammehi Tathāgato nissaṭṭho visaŋyutto vippamutto vimariyādīkatena cetasā viharati.|| ||

Katamehi dasahi?|| ||

Rūpena kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Vedanāya kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Saññāya kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Sankhārehi kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Viññāṇena kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Jātiyā kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Jarāya kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Maraṇena kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Dukkhehi kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Kilesehi kho Bāhuna Tathāgato nissaṭṭho visaŋyutto vippamutto vimariyādīkatena cetasā viharati.|| ||

Seyyathā pi Bāhuna uppalaɱ vā padumaɱ vā puṇḍarīkaɱ vā udake jātaɱ udake saɱvaḍḍhaɱ udakā accuggamma tiṭṭhati anupalittaɱ udakena.|| ||

Evam eva kho Bāhuna imehi dasahi dhammehi Tathāgato nissaṭṭho visaŋyutto vippamutto vimariyādīkatena cetatasā viharitī ti.|| ||

 


Contact:
E-mail
Copyright Statement   Webmaster's Page