Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
IX: Thera-Vagga

Sutta 85

U-N-A-B-R-I-D-G-E-D

Katthi Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts] Evaɱ me sutaɱ:|| ||

Ekaɱ samayaɱ āyasma Mahā Cundo Cetīsu viharati sahajātiyaɱ.|| ||

Tatra kho āyasmā Mahā Cundo bhikkhu āmantesi 'āvuso bhikkhavo' ti.|| ||

'Āvuso' ti kho te bhikkhu āyasmato Mahā Cundassa paccassosuɱ.|| ||

Āyasmā Mahā Cundo etad avoca:|| ||

2. Idh'āvuso bhikkhu katthī hoti vikatthī adhigamesu|| ||

"Ahaɱ paṭhamaɱ-jhānaɱ samāpajjāmi pi vuṭṭhahāmi pi.|| ||

Ahaɱ dutiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ tatiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ catutthaɱ-jhānaɱ samāpajjāmi pi vuṭṭhahāmi pi.|| ||

Ahaɱ [158] ākāsānañcāyatanaɱ samāpajjāmi pi vuṭṭhahāmi pi.|| ||

Ahaɱ viññāṇañcāyatanaɱ samāpajjāmi pi vuṭṭhahāmi pi.|| ||

Ahaɱ ākiñcaññāyatanaɱ samāpajjāmi pi vuṭṭhahāmi pi.|| ||

Ahaɱ n'eva-saññā-nāsaññāyatanaɱ samāpajjāmi pi vuṭṭhahāmi pi.|| ||

Ahaɱ saññāvedayitanirodhaɱ samāpajjāmi pi vuṭṭhahāmi pī" ti.|| ||

Tam enaɱ Tathāgato vā||
Tathāgatasāvako vā||
jhāyī samāpattikusalo||
paracittakusalo||
paracittapariyāyakusalo||
samanuyuñjati||
samanugāhati||
samanubhāsati.|| ||

So Tathāgatena vā||
Tathāgatasāvakena vā||
jhāyinā samāpattikusalena||
paracittakusalena||
paracittapariyāyakusalena||
samanuyuñjiyamāno||
samanugāhiyamāno||
samanubhāsiyamāno||
irīṇaɱ āpajjati,||
vijinaɱ āpajjati,||
anayaɱ āpajjati,||
vyasanaɱ āpajjati,||
anayavyasanaɱ āpajjati.|| ||

Tam enaɱ Tathāgato vā||
Tathāgatasāvako vā||
jhāyī samāpattikusalo||
paracittakusalo||
paracittapariyāyakusalo||
evaɱ cetasā ceto paricca manasikaroti,||
kin nu kho āyamāyasmā katthi hoti vikatthi adhigamesu:|| ||

"Ahaɱ paṭhamaɱ-jhānaɱ samāpajjāmi pi vuṭṭhahāmi pi.|| ||

Ahaɱ dutiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ tatiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ catutthaɱ-jhānaɱ samāpajjāmi pi vuṭṭhahāmi pi.|| ||

Ahaɱ ākāsānañcāyatanaɱ samāpajjāmi pi vuṭṭhahāmi pi.|| ||

Ahaɱ viññāṇañcāyatanaɱ samāpajjāmi pi vuṭṭhahāmi pi.|| ||

Ahaɱ ākiñcaññāyatanaɱ samāpajjāmi pi vuṭṭhahāmi pi.|| ||

Ahaɱ n'eva-saññā-nāsaññāyatanaɱ samāpajjāmi pi vuṭṭhahāmi pi.|| ||

Ahaɱ saññāvedayitanirodhaɱ samāpajjāmi pi vuṭṭhahāmi pī" ti?|| ||

Tam enaɱ Tathāgato vā||
Tathāgatasāvako vā||
jhāyī samāpattikusalo||
paracittakusalo||
paracittapariyāyakusalo||
evaɱ cetasā ceto paricca pajānāti.|| ||

Dīgharattaɱ kho pana ayam āyasmā,||
khaṇḍakārī||
chiddakārī||
sabalakārī||
kammāsakārī||
na santatakārī||
na santatavuttī sīlesu.|| ||

Dussīlo āyam āyasmā,||
dussīlyaɱ kho pana Tathāgatappavedite dhamma-vinaye parihānam etaɱ.|| ||

Assaddho kho pana ayam āyasmā,||
assaddhiyaɱ kho pana Tathāgatappavedite dhamma-vinaye parihānam etaɱ.|| ||

Appassuto kho pana ayam āyasmā,||
anācāro, appasaccaɱ kho pana Tathāgatappavedite dhamma-vinaye parihānam [159] etaɱ.|| ||

Dubbaco kho pana ayam āyasmā,||
dovacassatā kho pana Tathāgatappavedite dhamma-vinaye parihānam etaɱ.|| ||

Pāpamitto kho pana ayam āyasmā,||
pāpamittatā kho pana Tathāgatappavedite dhamma-vinaye parihānam etaɱ.|| ||

Kusīto kho pana ayam āyasmā,||
kosajjaɱ kho pana Tathāgatappavedite dhamma-vinaye parihānam etaɱ.|| ||

Muṭṭhassati kho pana ayam āyasmā,||
muṭṭhasaccaɱ kho pana Tathāgatappavedite dhamma-vinaye parihānam etaɱ.|| ||

Kuhako kho pana ayam āyasmā,||
kuhanā kho pana Tathāgatappavedite dhamma-vinaye parihānam etaɱ.|| ||

Dubbharo kho pana ayam āyasmā,||
dubbharatā kho pana Tathāgatappavedite dhamma-vinaye parihānam etaɱ.|| ||

Duppañño kho pana ayam āyasmā,||
duppaññatā kho pana Tathāgatappavedite dhamma-vinaye parihānam etaɱ.|| ||

3. Seyyathā pi āvuso sahāyako sahāyakaɱ evaɱ vadeyya:|| ||

'Yadā te samma dhanena dhanakaraṇīyaɱ assa,||
yācissasi maɱ dhanaɱ,||
dassāmi te dhanan' ti.|| ||

So kismiñci-d-eva dhanakaraṇīye samuppanne sahāyako sahāyakaɱ evaɱ vadeyya:|| ||

"Attho me samma dhanena,
dehi me dhanan" ti.|| ||

So evaɱ vadeyya:|| ||

"Tena hi samma idha khanāhī" ti.|| ||

So tatra khananto nādhigaccheyya,
so evaɱ vadeyya:|| ||

"Alikaɱ maɱ samma avaca,||
tucchakaɱ maɱ samma avaca:|| ||

"Idha khanāhī" ti.|| ||

So evaɱ vadeyya|| ||

"Nāhaɱ taɱ samma alikaɱ avacaɱ,||
tucchakaɱ avacaɱ,||
tena hi samma idha khanāhī" ti.|| ||

So tatra pi khananto nādhigaccheyya,||
so evaɱ vadeyya|| ||

"Alikaɱ maɱ samma avaca,||
tucchakaɱ maɱ samma avaca:|| ||

'Idha khanāhī' ti.|| ||

So evaɱ vadeyya|| ||

"Nāhaɱ taɱ samma alikaɱ avacaɱ,||
na tucchakaɱ [160] avacaɱ,||
tena hi samma idha khanāhī, ti.|| ||

So tatra pi khananto nādhigaccheyya,||
so evaɱ vadeyya|| ||

"Alikaɱ maɱ samma avaca,||
tucchakaɱ maɱ samma avaca:|| ||

'Idha khanāhī' ti.|| ||

So evaɱ vadeyya|| ||

"Nāhaɱ taɱ samma alikaɱ avacaɱ,||
tucchakaɱ avacaɱ,||
api ca aham'eva ummādaɱ pāpuṇiɱ cetaso vipariyāyan" ti.|| ||

Evam eva kho āvuso bhikkhu katthī vikatthī adhigamesu|| ||

"Ahaɱ paṭhamaɱ-jhānaɱ samāpajjāmi pi vuṭṭhahāmi pi.|| ||

Ahaɱ dutiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ tatiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ catutthaɱ-jhānaɱ samāpajjāmi pi vuṭṭhahāmi pi.|| ||

Ahaɱ ākāsānañcāyatanaɱ samāpajjāmi pi vuṭṭhahāmi pi.|| ||

Ahaɱ viññāṇañcāyatanaɱ samāpajjāmi pi vuṭṭhahāmi pi.|| ||

Ahaɱ ākiñcaññāyatanaɱ samāpajjāmi pi vuṭṭhahāmi pi.|| ||

Ahaɱ n'eva-saññā-nāsaññāyatanaɱ samāpajjāmi pi vuṭṭhahāmi pi.|| ||

Ahaɱ saññāvedayitanirodhaɱ samāpajjāmi pi vuṭṭhahāmi pī" ti.|| ||

Tam enaɱ Tathāgato vā||
Tathāgatasāvako vā||
jhāyī samāpattikusalo||
paracittakusalo||
paracittapariyāyakusalo||
samanuyuñjati||
samanugāhati||
samanubhāsati.|| ||

So Tathāgatena vā||
Tathāgatasāvakena vā||
jhāyinā samāpattikusalena||
paracittakusalena||
paracittapariyāyakusalena||
samanuyuñjiyamāno||
samanugāhiyamāno||
samanubhāsiyamāno||
irīṇaɱ āpajjati,||
vijinaɱ āpajjati,||
anayaɱ āpajjati,||
vyasanaɱ āpajjati,||
anayavyasanaɱ āpajjati.|| ||

Tam enaɱ Tathāgato vā||
Tathāgatasāvako vā||
jhāyī samāpattikusalo||
paracittakusalo||
paracittapariyāyakusalo||
evaɱ cetasā ceto paricca manasikaroti,||
kin nu kho āyamāyasmā katthi hoti vikatthi adhigamesu:|| ||

"Ahaɱ paṭhamaɱ-jhānaɱ samāpajjāmi pi vuṭṭhahāmi pi.|| ||

Ahaɱ dutiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ tatiyaɱ-jhānaɱ samāpajjāmi pi vuṭṭhahāmi pi.|| ||

Ahaɱ catutthaɱ-jhānaɱ samāpajjāmi pi vuṭṭhahāmi pi.|| ||

Ahaɱ ākāsānañcāyatanaɱ samāpajjāmi pi vuṭṭhahāmi pi.|| ||

Ahaɱ viññāṇañcāyatanaɱ samāpajjāmi pi vuṭṭhahāmi pi.|| ||

Ahaɱ ākiñcaññāyatanaɱ samāpajjāmi pi vuṭṭhahāmi pi.|| ||

Ahaɱ n'eva-saññā-nāsaññāyatanaɱ samāpajjāmi pi vuṭṭhahāmi pi.|| ||

Ahaɱ saññāvedayitanirodhaɱ samāpajjāmi pi vuṭṭhahāmi pī" ti?|| ||

Tam enaɱ Tathāgato vā||
Tathāgatasāvako vā||
jhāyī samāpattikusalo||
paracittakusalo||
paracittapariyāyakusalo||
evaɱ cetasā ceto paricca pajānāti.|| ||

[161] Dīgharattaɱ kho pana ayam āyasmā,||
khaṇḍakārī||
chiddakārī||
sabalakārī||
kammāsakārī||
na santatakārī||
na santatavuttī sīlesu.|| ||

Dussīlo āyam āyasmā,||
dussīlyaɱ kho pana Tathāgatappavedite dhamma-vinaye parihānam etaɱ.|| ||

Assaddho kho pana ayam āyasmā,||
assaddhiyaɱ kho pana Tathāgatappavedite dhamma-vinaye parihānam etaɱ.|| ||

Appassuto kho pana ayam āyasmā,||
anācāro, appasaccaɱ kho pana Tathāgatappavedite dhamma-vinaye parihānam etaɱ.|| ||

Dubbaco kho pana ayam āyasmā,||
dovacassatā kho pana Tathāgatappavedite dhamma-vinaye parihānam etaɱ.|| ||

Pāpamitto kho pana ayam āyasmā,||
pāpamittatā kho pana Tathāgatappavedite dhamma-vinaye parihānam etaɱ.|| ||

Kusīto kho pana ayam āyasmā,||
kosajjaɱ kho pana Tathāgatappavedite dhamma-vinaye parihānam etaɱ.|| ||

Muṭṭhassati kho pana ayam āyasmā,||
muṭṭhasaccaɱ kho pana Tathāgatappavedite dhamma-vinaye parihānam etaɱ.|| ||

Kuhako kho pana ayam āyasmā,||
kuhanā kho pana Tathāgatappavedite dhamma-vinaye parihānam etaɱ.|| ||

Dubbharo kho pana ayam āyasmā,||
dubbharatā kho pana Tathāgatappavedite dhamma-vinaye parihānam etaɱ.|| ||

Duppañño kho pana ayam āyasmā,||
duppaññatā kho pana Tathāgatappavedite dhamma-vinaye parihānam etaɱ.|| ||

So vatāvuso bhikkhu ime dasadhamme appahāya imasmiɱ dhamma-vinaye vuḍḍhiɱ virūḷhiɱ vepullaɱ āpajjissatī ti n'etaɱ ṭhānaɱ vijjati.|| ||

So vatāvuso bhikkhu ime dasa dhamme pahāya imasmiɱ dhamma-vinaye vuḍḍhiɱ virūḷhiɱ vepullaɱ āpajjatīti ṭhāname taɱ vijjatī ti.|| ||

 


Contact:
E-mail
Copyright Statement   Webmaster's Page