Anguttara Nikaya


[Site Map]  [Home]  [Sutta Indexes]  [Glossology]  [Site Sub-Sections]

The Pali is transliterated as IAST Unicode (āīūṃṅñṭḍṇḷ). Alternatives:
[ ASCII (aiumnntdnl) | Mobile (āīūŋńñţđņļ) | Velthuis (aaiiuu.m'n~n.t.d.n.l) ]

 

Aŋguttara Nikāya
Dasaka-Nipāta
X: Upāsaka-Vagga

Sutta 92

Bhaya Suttaɱ

Adapted from the 1995 edition of the digital version of the
Sri Lanka Buddha Jayanti Tripitaka Series
and proofed against, and mostly resolved to
the Pali Text Society Aŋguttara-Nikāya
edited by Prof. E. Hardy, PhD., D.D.

 


 

[1][pts][than] Evaɱ me sutaɱ:|| ||

Ekaɱ samayaɱ Bhagavā Sāvatthiyaɱ viharati||
Jetavane Anāthapiṇḍikassa ārāme.|| ||

Atha kho Anāthapiṇḍiko gahapati yena Bhagavā ten'upasaɱkami.||
Upasaŋkamitvā Bhagavantaɱ abhivādetvā eka-m-antaɱ nisīdi.||
Eka-m-antaɱ nisinnaɱ kho Anāthapiṇḍikaɱ gahapati Bhagavā etad avoca:|| ||

Yato kho gahapati ariyasāvakassa pañcabhayāni verāni vūpasantāni honti,||
catūhi sotāpattiyaŋgehi samannāgato hoti,||
ariyo c'assa ñāyo paññāya sudiṭṭho hoti suppaṭividdho,||
ākaŋkhamāno attanā va attānaɱ vyākareyya:|| ||

Khīṇanirayomhi khīṇatiracchānayoni khīṇapettivisayo khīṇāpāyaduggativinipāto sotāpanno hamasmī,||
avinipāta dhammo niyato sambodhi parāyanoti.|| ||

Katamāni pañca bhayāni verāni vūpasantāni honti?|| ||

[183] Yaɱ gahapati, pāṇātipātī pāṇātipātappaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvedeti.|| ||

Pāṇātipātā paṭivirato n'eva diṭṭhadhammikaɱ bhayaɱ veraɱ pasavati na samparāyikaɱ bhayaɱ veraɱ pasavati na cetasikaɱ dukkhaɱ domanassaɱ paṭisaŋvedeti,||
pāṇātipātā paṭiviratassa evaɱ taɱ bhayaɱ veraɱ vūpasannaɱ hoti.|| ||

Yaɱ gahapati adinnādāyī adinnādānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvedeti.|| ||

Adinnādānā paṭivirato n'eva diṭṭhadhammikaɱ bhayaɱ veraɱ pasavati na samparāyikaɱ bhayaɱ veraɱ pasavati na cetasikaɱ dukkhaɱ domanassaɱ paṭisaŋvedeti,||
adinnādānā paṭiviratassa evaɱ taɱ bhayaɱ veraɱ vupasannaɱ hoti.|| ||

Yaɱ gahapati kāmesu micchācārī kāmesumicchārapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvedeti.|| ||

Kāmesumicchācārā paṭivirato n'eva diṭṭhadhammikaɱ bhayaɱ veraɱ pasavati na samparāyikaɱ bhayaɱ veraɱ pasavati na cetasikaɱ dukkhaɱ domanassaɱ paṭisaŋvedeti.|| ||

Kāmesemicchācārā paṭiviratassa evaɱ taɱ bhayaɱ veraɱ vupasannaɱ hoti.|| ||

Yaɱ gahapati musāvādī musāvādapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvedeti.|| ||

Musāvādā paṭivirato n'eva diṭṭhadhammikaɱ bhayaɱ veraɱ pasavati na samparāyikaɱ bhayaɱ veraɱ pasavati na cetasikaɱ dukkhaɱ domanassaɱ paṭisaŋvedeti,||
musā-vādā paṭiviratassa evaɱ taɱ bhayaɱ veraɱ vupasannaɱ hoti.|| ||

Yaɱ gahapati surāmeraya majjapamādaṭṭhāyī surāmeraya majjapamādaṭṭhānapaccayā diṭṭhadhammikam pi bhayaɱ veraɱ pasavati,||
samparāyikam pi bhayaɱ veraɱ pasavati,||
cetasikam pi dukkhaɱ domanassaɱ paṭisaŋvedeti.|| ||

Surāmeraya majjapamādaṭṭhānā paṭivirato n'eva diṭṭhadhammikaɱ bhayaɱ veraɱ pasavati na samparāyikaɱ bhayaɱ veraɱ pasavati na cetasikaɱ dukkhaɱ domanassaɱ paṭisaŋvedeti,||
surāmeraya majjapamādaṭṭhānā paṭiviratassa evaɱ taɱ bhayaɱ veraɱ vupasannaɱ hoti.|| ||

Taɱ bhayaɱ veraɱ vūpasannaɱ hoti.|| ||

Imāni pañcabhayāni verāni vūpasantāni honti.|| ||

Katamehi catūhi sotāpattiyaŋgehi samannāgato hoti:|| ||

Idha gahapati ariyasāvako Buddhe aveccappasādena samannāgato hoti:|| ||

'Iti pi so Bhagavā arahaɱ sammā sambuddho vijjācaraṇa sampanno sugato loka-vidū anuttaro purisadhammasārathī satthā deva-manussānaɱ buddho Bhagavā' ti.|| ||

Dhamme aveccappasādena samannāgato hoti:|| ||

'Svākkhāto Bhagavatā dhammo sandiṭṭhiko akāliko ehipassiko opanayiko paccattaɱ veditabbo viññūhī' ti.|| ||

Saŋghe aveccappasādena samannāgato hoti:|| ||

'Supaṭipanno Bhagavato sāvakasaŋgho,||
ujupaṭipanno Bhagavato sāvakasaŋgho,||
ñāyapaṭipanno Bhagavato sāvaka saŋgho sāmīcipaṭipanno Bhagavato sāvakasaŋgho,||
yad idaɱ cattāri purisayugāni aṭṭhapurisapuggalā,||
esa Bhagavato sāvakasaŋgho āhuṇeyyo pāhuṇeyyo dakkhiṇeyyo añjalikaraṇīyo anuttaraɱ puññakkhettaɱ lokassā' ti.|| ||

Ariyakantehi sīlehi samannāgato [184] hoti,||
akhaṇḍehi acchiddehi asabalehi akammāsehi bhujissehi viññūppasatthehi aparāmaṭṭhehi samādhisaɱvattanikehi imehi catuhi sotipattiyaŋgehi samannāgato hoti.|| ||

Katamo c'assa ariyo ñāyo paññāya sudiṭṭho hoti suppaṭividdho?|| ||

Idha gahapati ariyasāvako iti paṭisaɱcikkhati:|| ||

'Iti imasmiɱ sati idaɱ hoti,||
imass'uppādā idaɱ uppajjati,||
imasmiɱ asati idaɱ na hoti,||
imassa nirodhā idaɱ nirujjhati.|| ||

Yad idaɱ avijjāpaccayā sankhārā,||
sankhārapaccayā viññāṇaɱ,||
viñṇāṇa paccayā nāma rūpaɱ,||
nāma rūpa paccayā saḷāyatanaɱ,||
saḷāyatana paccayā phasso,||
phassa paccayā vedanā,||
vedanā paccayā taṇhā,||
taṇhā paccayā upādānaɱ,||
upādāna paccayā bhavo,||
bhava paccayā jāti,||
jāti paccayā jarā-maraṇaɱ||
sokaparidevadukkha domanassupāyāsā sambhavanti.|| ||

Evam etassa kevalassa dukkhakkhandhassa samudayo hoti.|| ||

Avijjāya tv eva asesavirāga nirodhā sankhāra nirodho,||
sankhāra nirodhā viñṇāṇa nirodho,||
viññāṇa nirodhā nāma rūpa nirodho,||
nāma rūpa nirodhā saḷāyatana nirodho,||
saḷāyatana nirodhā phassa nirodho,||
phassa nirodhā vedanā nirodho,||
vedanā nirodhā taṇhā nirodho,||
taṇhā nirodhā upādāna nirodho,||
upādāna nirodhā bhava nirodho,||
bhava nirodhā jāti nirodho,||
jāti nirodhā jarā maraṇaɱ||
sokaparidevadukkha domanassupāyāsā nirujjhanti.|| ||

Evam etassa kevalassa dukkhakkhandhassa nirodho hoti.|| ||

Ayañc'assa ariyo ñāyo paññāya sudiṭṭho hoti suppaṭi viddho.|| ||

Yato kho gahapati ariyasāvakassa imāni pañcabhayāni verāni vūpasantāni honti.|| ||

Imehi catuhi sotipattiyaŋgehi samannāgato hoti.|| ||

Ayam assa ariyo ñāyo paññāya sudiṭṭho hoti suppaṭividdho,||
so ākaŋkhamāno attanā va attānaɱ vyākareyya:||
'khīṇanirayomhi khīṇatiracchānayoniyo khīṇapettivisayo khīṇāpāyaduggativinipāto.|| ||

Sotāpanno hamasmi avinipāta dhammo niyato sambodhiparāyano ti.|| ||

 


Contact:
E-mail
Copyright Statement   Webmaster's Page